कार्यालय तीन वर्षपहिले खोलियो, बल्ल तयार पार्न थालियो मेडिकल कलेजको गुरुयोजना

कार्यालय तीन वर्षपहिले खोलियो, बल्ल तयार पार्न थालियो मेडिकल कलेजको गुरुयोजना

A+ A A-

सुर्खेतमा मेडिकल कलेज स्थापनाका लागि कार्यालय स्थापना भएको तीन वर्षपछि गुरुयोजना निर्माणको काम सुरु भएको छ ।

गुरुयोजना निर्माणको प्रारम्भिक चरणअन्तर्गत अहिले सर्भे भइरहेको छ भने आउँदो सातादेखि वातावरणीय प्रभाव मूल्यांकन (ईआईए) को काम सुरु हुने आयोजनाले जनाएको छ । आर्थिक वर्ष २०७३-७४ यताका हरेक नीति तथा कार्यक्रम र बजेटमा संघीय सरकारले ‘एक प्रदेश एक सरकारी मेडिकल कलेज’ अवधारणालाई निरन्तरता दिँदै आएको छ । त्यसैअन्तर्गत कर्णाली प्रदेशको सुर्खेतमा मेडिकल कलेज स्थापना गर्ने सरकारको योजना छ ।

मेडिकल कलेजका लागि पूर्वाधार निर्माण आयोजना स्वीकृत गरेकोसमेत तीन वर्ष पुगिसकेको छ । तर, आयोजनाको कामले उचित गति भने लिन सकेको छैन । विसं २०७५ फागुन ३ गते मन्त्रिपरिषद्ले मेडिकल कलेज स्थापनाका लागि पूर्वाधार निर्माण विकास आयोजना स्वीकृत गरेको थियो । मन्त्रिपरिषद्को उक्त निर्णयका आधारमा २०७६ जेठमा वीरेन्द्रनगरमा ‘सुर्खेत मेडिकल कलेज पूर्वाधार विकास कार्यालय’ स्थापना भयो ।

बर्सेनि बजेटमा विनियोजन हुँदै आए पनि सुर्खेतमा मेडिकल कलेजको पूर्वाधार निर्माणमा भने हालसम्म प्रगति भएको छैन । सुरुमा जग्गा पहिचानमै अल्झिएको आयोजनाले अब भने वीरेन्द्रनगर-११ को गाग्रेल ताल र १३ को बतासेडाँडामा संरचना बनाउने गरी गुरुयोजना निर्माणको काम थालेको छ ।

गुरुयोजनाको प्रारम्भिक रिपोर्ट प्रस्तुत भएपछि मात्रै ईआईएको काम सुरु हुने आयोजनाका इन्जिनियर शंकर तिमिल्सेनाले बताए । उनका अनुसार चालु आर्थिक वर्षमा सर्भेका लागि साढे तीन महिना र ईआईएका लागि ६ महिना समय लाग्छ । मंसिर अन्त्यतिरबाट सर्भेको काम सुरु भएको हो भने यसै महिनाको अन्त्य तिरबाट मात्रै ईआईए सुरु हुने इन्जिनियर तिमिल्सेनाले जानकारी दिए ।

चालु आर्थिक वर्षमा वातावरणीय प्रभाव मूल्याङ्कन र गुरुयोजना निर्माणको काम मात्रै सम्पन्न हुने सम्भावना रहेको उनले बताए ।आउँदो आर्थिक वर्षको सुरुमै विस्तृत परियोजना रिपोर्ट (डीपीआर) को काम हुने इन्जिनियर तिमिल्सेनाले बताए । गुरुयोजना र ईआईए सकिएपछि मात्रै जग्गा प्राप्तिको प्रक्रिया सुरु हुनेछ ।

सुरुमा वीरेन्द्रनगर नगरपालिका वडा नम्बर ११, १२ र १३ मा पर्ने गाग्रेताल वन क्षेत्रको जग्गामा अस्पताल बनाउने भनिए पनि प्रदेश सरकारको मन्त्रिपरिषद्ले २०७६ मंसिर ४ मा नयाँ स्थानमा संरचना बनाउन समय धेरै लाग्ने भन्दै कालागाउँस्थित प्रदेश अस्पताललाई नै सुर्खेत शिक्षण अस्पतालका रूपमा आवश्यक पूर्वाधार निर्माण गरी सञ्चालन गर्न सहमति दिएको थियो । तर, संघीय सरकारले प्रदेशको उक्त प्रस्तावमाथि कुनै निर्णय दिएन । अहिले उक्त जंगल क्षेत्रमै अध्ययन सुरु भएको छ ।

छरितो बाटो रोज्न सुझाव

तीन-चार वर्षसम्म जग्गा पहिचान नै गर्न नसक्नुले संरचना बनाएर मेडिकल कलेज स्थापना गर्न अझै धेरै समय लाग्ने सरोकारवालाको चिन्ता छ । प्रदेश अस्पताल र मध्यपश्चिम विश्वविद्यालयसँग जोडेर जाँदा सुर्खेतमा तत्काल मेडिकल कलेज स्थापना हुनसक्ने डा. नवराज केसीको सुझाव छ । मेडिकल कलेज स्थापनाका विषयमा सरोकारवालासँग प्रर्याप्त छलफल समेत नभएको बताउँछन् ।

डा. केसीले मध्यपश्चिम विश्वविद्यालय र प्रदेश अस्पतालसँग सहकार्य गरेर अगाडि बढ्न आवश्यक रहेको बताए । शैक्षिक अभियान्ता गेहेन्द्र प्रसाद दाहाल पनि प्रदेश अस्पतालको संरचनालाई प्रयोग गरे तत्कालै एमडीसम्मको अध्यापन सुरु गर्न सकिने बताउँछन् ।

पूर्वाधार निर्माणका लागि सुरुवातमै भइहेको ढिलाइले मेडिकल कलेज चाँडै सञ्चालनमा आउनेमा कर्णालीवासीमा शंका उब्जिएको छ । स्वास्थ्य क्षेत्रको व्यवस्थापनमा लामो समयदेखि क्रियाशिल विनोद ढकाल प्रदेश सरकार र संघीय सरकारबीचको समन्वयको अभावले मेडिकल कलेज स्थापनामा ढिलाइ भइरहेको बताउँछन् ।

प्रकाशित मिति: शुक्रबार, माघ २१, २०७८ १७:५४