घोडाहा जंगलमा मृत भेटिएका महिला र बालिकाको पहिचान भएन

A+ A A-

रूपन्देहीको देवदह नगरपालिका वडा नम्बर ९ घोडाहा जंगलमा मंगलवार बेवारिसे अवस्थामा फेला परेका दुई शवको पहिचान हुन सकेको छैन । मृत अवस्था फेला परेका महिला र बालिका पहिचान हुन नसकेको हो । रूपन्देही प्रहरीले उनीहरूको सनाखतका लागि पत्राचार र सूचना जारी गरे पनि अहिलेसम्म पत्ता लाग्न सकेको छैन ।

उनीहरूको शव लुम्बिनी प्रादेशिक अस्पताल बुटवलमा राखिएको छ । दुवै शवको पोष्टमार्टम गरी प्रादेशिक अस्पतालमा राखिएको प्रहरीले जनाएको छ । प्रहरीले उनीहरूका आफन्तको खोजीका लागि हुलिया सातै प्रदेशदेखि भारतसम्म पठाइसकेको छ । जिल्ला प्रहरी कार्यालय रूपन्देहीका प्रहरी प्रमुख प्रहरी उपरीक्षक मनोज कुमार केसीले उनीहरूका आफन्तको खोजीका लागि सबै क्षेत्रमा सूचना र पत्राचार गरिए पनि अझै पत्ता लाग्न नसकेको बताए ।

यस्तो थियो घटनास्थल

घोडाहा जंगलमा मंगलबार दिउँसो अन्दाजी ३५ वर्षकी महिला र ७ वर्षकी बालिकाको धारिलो हतियारले घाँटी रेटेर हत्या गरिएको अवस्था शव फेला परेको थियो । पूर्व–पश्चिम महेन्द्र राजमार्गबाट २५ मिटर दक्षिणतर्फ सडक छेउको खाल्डोमा फालिएको अवस्थामा शव फेला परेको थियो ।

घटनाको वस्तुस्थिति हेर्दा अन्यत्र कतै हत्या गरी त्यहाँ ल्याएर फालेको जस्तो देखिन्छ । इलाका प्रहरी कार्यालय बुटवलका डीएसपी ठगबहादुर केसीले सबैतर्फ खोजतलास गरिए पनि आफन्त पत्ता लाग्न नसकेको बताए ।

महिलाले रातो ब्लाउज, रातो ज्याकेट लगाएकी छन् । पातलो शरीर भएकी उनको शव हेर्दा तराई मूलको जस्तो देखिन्छ । त्यस्तै बालिकाको शरीरमा निलो पाइन्ट, गुलाबी रंगको लेडिज सेन्डल र पहेलो छिर्केमिर्के सर्ट लगाएको देखिन्छ । उनले रातो टोपी पनि लगाएकी छन् । बालिका पनि तराई मूलको जस्तै देखिन्छन् ।उनीहरू ‘आमा छोरी’ हुनसक्ने इप्रका बुटवलका डीएसपी केसीले बताए ।

प्रमाणपत्र तथा कागजात नहुँदा समस्या

झोला वा अन्य कागजपत्र नहुँदा शवको पहिचान गर्न प्रहरीलाई गाह्रो भएको प्रहरीले बताएको छ । शव भेटिएको स्थानमा अन्य कुनै सामान थिएन । हत्या गरेर जंगलमा शव फालिएकाले हुनसक्ने प्रहरीले जनाएको छ । जाडो मौसमका कारण शव सडेको थिएन । मंगलवार बिहान ११ बजेतिर स्थानीयले झाडीमा महिला र बच्चा मृत देखेपछि प्रहरीलाई खबर गरेका थिए ।

प्रकाशित मिति: बिहीबार, माघ १३, २०७८ १९:१६