जोर बिजोरको असर : ठेलमठेल गर्दै यात्रा

काठमाडाैं उपत्यकामा ८ माघमा सुरु भएको सवारीसाधनमा जोर बिजोर प्रणालीका कारण यात्रुहरूले सकसपूर्ण यात्रा गर्नुपरेको छ । काेराेनाकाे ग्राफ बढेसँगै सरकारले सार्वजनिक तथा निजी यातायातमा जोर बिजोर प्रणली लागू गरेको हो ।

जोर बिजोर प्रणली लागू भएपछि सार्वजनिक यातायातमा यात्रुहरूको चाप बढेको छ । सवारीसाधन कम चलेपछि यात्रुकाे चाप बढेकाे हाे । सीमित सार्वजनिक यातायात चलेकाले यात्रुहरू ठेलमठेल गरेर जोखिमपूर्ण यात्रा गर्न बाध्य भएका छन् ।

बागबजारमा रहेको भक्तपुर बसपार्कमा सोनिका लामा गाडी कुरिरहेकी थिइन् । बिहान भक्तपुरको सल्लाघारीबाट पुतलिसडक आएकी उनको यात्रा निकै सकसपूर्ण भयाे । ‘कोरोना छ, त्यसमाथि कुर्दाकुर्दा एउटा बस भेटिन्छ, त्यो पनि काेचाकाेच’, उनले आक्रोशमा भनिन्, ‘कि सबै ठप्प गर्नुपर्छ नभए काममा जाँदाआउँदा नै संक्रमित हुन बेर छैन ।’

त्यस्तै, अदालतको काम सकेर आरएनएसीअगाडि बस कुरेका यातुस श्रेष्ठकाे पनि उस्तै पीडा छ । टोखा पुग्नुपर्ने श्रेष्ठ निकै बेरदेखि गाडीको पर्खाइमा थिए । शिलापत्रसँग उनले भने, ‘माइक्रो र बस दुवै आउँछ । माइक्रो चढ्दिनँ ।’ किन भन्ने प्रश्नमा उनले भने, ‘सानो स्पेसमा पनि कोचिएर यस्तो बेलामा कसैले यात्रा गर्छ ? माइक्रोमा त कोरोना सर्ने जोखिम झन् बढी हुन्छ ।’

सरकारले प्रहरीलाई अनुगमनकाे जिम्मेवारी दिएकाे छ । तर, सार्वजनिक यातायातमा काेचिँदै यात्रा गरेकाे देख्दासमेत प्रशासन माैन देखिएकाे बारे श्रेष्ठ भन्छन्, ‘यातायात व्यवसायीले प्रशासनलाई मिलाएका हुन्छन् जस्ताे लाग्छ । हेरे पनि केही भन्दैन, गर्दैन ।’

याे विषयमा भक्तपुरकी प्रमुख जिल्ला अधिकारी रुद्रदेवी शर्मा भन्छिन्, ‘स्कुल/कलेज बन्द छन् । कार्यालयहरूमा पनि आलोपालो सिस्टम गरिएको छ । अनलाइनबाट हुने काम घरघरबाट पनि भएका छन् । त्यसैले पहिलेको जस्तो मानिस बाहिर निस्किएका छैनन् ।’

उनले भनिन्, 'गाडी कम चल्ने रुटमा केही समस्या होला तर काम नपरी अनावश्ययक मानिस हिँड्दैनन् । आवश्यक माानिस मात्र निस्किए भने पनि जोर बिजोरले गाडी सबैलाई पुग्छ ।’