एआईजीको प्रस्तावित थप दरबन्दी तीनबाट पाँच पुर्‍याउने सरकारको तयारी

A+ A A-

प्रहरीमा एआईजी पदमा पुग्ने आकांक्षी बढेपछि सरकारले कम्तीमा पाँचवटा दरबन्दी थप्ने तयारी गरेको छ । सरकारको निर्देशनमा प्रहरी प्रधान कार्यालयले प्रहरी अतिरिक्त महानिरीक्षक (एआईजी)को तीनवटा दरबन्दी थप्न २९ पुसमा गृह मन्त्रालयमा प्रस्ताव पठाएको थियो ।

गृह मन्त्रालय स्रोतका अनुसार प्रधानमन्त्री शेरबहादुर देउवाले अझै थप दुईवटा दरबन्दी थपेर प्रस्ताव तयार गर्न भनेका छन् । तीनवटा दरबन्दी थप्ने प्रस्ताव गृहमा पुगेपछि नै प्रहरी नायब महानिरीक्षक (डीआईजी)हरूले प्रधानमन्त्री र सत्ता साझेदार दलका नेतामार्फत आफ्नो बढुवाका लागि दबाब दिइरहेका छन् । ‘सिट थोरै र उम्मेदवार धेरै भएपछि केही पद थप्ने प्रधानमन्त्रीको मनसाय छ,’ गृह मन्त्रालयका एक उच्च अधिकारीले शिलापत्रसँग भने, ‘तीनवटा दरबन्दीमा अर्थसमेत सहमत भइसकेको छ । अझ कम्तीमा थप दुईवटा दरबन्दी थपिन सक्छ ।’

यसरी थपिएको दुईवटा दरबन्दीलाई विशेष पद भनिने गृहले दाबी गरेको छ । विशेष पदमा बढुवा हुनेहरूले अवकाश पाएसँगै यो खारेज हुनेछ ।

गृह स्रोतकाअनुसार धीरजप्रताप सिंह, उत्तमराज सुवेदी, रवीन्द्र धानुक, गणेश ऐर, ईश्वरबाबु कार्की थपिने दरबन्दीमा एआईजी बन्न सबैभन्दा बढी दौडधुपमा छन् । यसबाहेक बसन्त पन्त, बसन्त लामा पनि आकांक्षी छन् ।

पद बाँडफाँटमा प्रधानमन्त्री देउवा उदार मानिन्छन् । २०७४ मा चौथो पटक प्रधानमन्त्री बन्दा पनि देउवा सरकारले सबैभन्दा बढी एआईजी संख्या पुर्‍याएर रेकर्ड राखेको थियो । ०७४ जेठमा प्रधानमन्त्री बनेका देउवाले कात्तिकमा चारवटा एआईजी दरबन्दी थप्ने निर्णय गरेका थिए । देउवापछि सरकार चलाएका केपी ओलीले एआईजी पद तीनमा झारेर पुनः पाँच पुर्‍याएका थिए ।

यो संख्यालाई देउवा सरकारले फेरि बढाउने तयारी गरेको हो । सत्ता साझेदार दलहरूको आ–आफ्ना आकांक्षी भएकालेसमेत एआईजीको दरबन्दी कम्तीमा पाँचवटा पुग्ने गृह स्रोतको भनाइ छ । केन्द्रीय अनुसन्धान ब्युराे (सीआईबी)मा कार्यरत डीआइजी सिंहलाई माओवादी र कांग्रेस दुवैको साथ छ । माओवादीसँग नजिक सिंह बालुवाटार जग्गा प्रकरणको ठगी मुद्दाको कमजोर अनुसन्धान गरेर मुद्दा ढिसमिस बनाइदिन खोजेपछि धेरैको प्रिय बनेका छन् ।

डीआईजी धानुकलाई माओवादीको समर्थन छ । अर्थमन्त्री जनार्दन शर्माले धानुकलाई एआईजी बनाउने भएमात्र अर्थले सहमति दिने शर्त राखेका छन् । सुवेदीलाई कांग्रेसले एआईजी बनाउन चाहेको छ । ऐरलाई भने नेकपा एकीकृत समाजवादीका नेता माधवकुमार नेपालले एआईजी बनाउन चाहेका हुन् । आकांक्षीमध्ये तुलनात्मक रूपमा सुवेदीलाई प्रहरीभित्र व्यवसायिक अधिकृत मानिन्छ । दल र नेताहरूले आड दिएका प्रहरीलाई पदमा पुर्‍याउन एआईजी र डीआईजी पद थप्ने चलन प्रहरीमा स्थापित छ, जसलाई देउवा सरकारले पुनरावृत्ति गर्न लागेको मात्र हो ।

प्रकाशित मिति: शनिबार, माघ ८, २०७८ १४:२६