वैदेशिक रोजगारीमा जाँदै हुनुहुन्छ ? यस्ता छन् अनिवार्य पालना गर्नुपर्ने स्वास्थ्यका नियम

वैदेशिक रोजगारीमा जाँदै हुनुहुन्छ ? यस्ता छन् अनिवार्य पालना गर्नुपर्ने स्वास्थ्यका नियम

A+ A A-

काेराेना भाइरसकाे नयाँ भेरियन्ट ओमिक्रोनबाट संक्रमित हुनेहरूको संख्या बढेपछि धेरै नेपालीहरूको रोजगारगन्तव्य रहेका मध्यपूर्वका देशहरूले स्वास्थ्य मापदण्डमा कडाइ गर्न थालेका छन् । कतिपय देशहरूले काेभिडविरुद्धकाे खाेपकाे बुस्टर डोज अनिवार्य गरेका छन् । कोभिड परीक्षण र क्वारेन्टाइन बस्नुपर्ने नियम पनि अनिवार्य पारिएकाे छ ।

नेपाली कामदारको मुख्य रोजगारदाता देशभित्र कतार, यूएई, साउदी, कुवेत, दक्षिण कोरिया, इजरायल, ओमन र बहराइन पर्छन् ।ओमिक्रोन भाइरसको संक्रमण फैलिएसँगै मुख्य रोजगारदाता देशमा स्वास्थ्य मापदण्डमा कडाइ गरिएकाे हाे ।

कतार

कतारले संक्रमितहरूको संख्या बढ्न थालेपछि अनिवार्य रूपमा फेस मास्क लगाउनुपर्ने नियम ल्याएको छ । फेस मास्क नलगाएर सार्वजनिकस्थलमा हिँड्नेलाई १ हजार रियालसम्म जरिवाना गर्ने व्यवस्था गरिएकाे छ ।

कोरोनाको खोप लगाएको ९ महिनापछि एह्तेराज एपमा हुने गोल्डेन बक्स हराएर जाने र बुस्टर डोजको खोप लगाएपछि पुनः गोल्डेन बक्स आउने बनाइएको छ । बुस्टर डोजका लागि सबै नागरिक र आप्रवासीहरूले पूर्वस्वीकृतिबिना सिधै खोप केन्द्रमा गएर खोप लगाउने व्यवस्था गरिएको छ ।

कतार रोजगारीमा जाने कामदारले कोभिड परीक्षण र १० दिन क्वारेन्टाइन बस्नुपर्ने नियमसमेत लागू गरिएकाे छ । कतारले विश्व स्वास्थ्य संगठनले मान्यता दिएका सबै कोभिड खोपलाई मान्यता दिएको छ । कतारले ओमिक्रोन भाइरस संक्रमण फैलिए पनि लकडाउन भने नगर्ने बताउँदै आएको छ ।

साउदी

१७ अक्टोबरबाट साउदी अरबले आफूलाई ‘मास्क फ्रि’ घोषणा गरे पनि डिसेम्बर ३० तारिखबाट अनिवार्य रूपमा फेरि मास्क लगाउने नियम ल्याएको छ । त्यसैगरी एक व्यक्तिबाट अर्को व्यक्तिले कम्तीमा १.५ मिटरको भौतिक दूरी कायम गर्नुपर्ने नियम लागू गरिएको छ । साउदी अरबले बुस्टर डोजका लागि सबै नागरिक र आप्रवासीहरूलाई अनुरोध गरेको छ ।

साउदी रोजगारीमा जाने कामदारले बुस्टर डोज खोप अनिवार्य लगाएको हुनुपर्नेछ भने साउदी पुगेपछि १० दिन कम्पनीमा क्वारेन्टाइन बस्नुपर्ने र कोभिड परीक्षण गर्नुपर्ने हुन्छ ।

साउदीले पनि अहिले लकडाउन गर्न नीति लिएको छैन । साउदीले पनि सबै कोभिड खोपलाई मान्यता दिएको छ । साउदीमा सार्वजनिकस्थलमा मास्क नलागाए ५ सय रियाल जरिवाना तिर्नुपर्ने निमय लागू भएको छ ।

यूएई

यूएईले अबुधावी प्रवेश गर्नका लागि नयाँँ नियम ल्याएको छ । अब अबुधावी प्रवेशकर्ताको अल हुसेन मोबाइल एप्समा ग्रिन सिग्नल आउनुपर्नेछ । मास्क नलगाई बाहिर निस्कनेलाई ३ हजार दिरामसम्म जरिवाना गरिनेछ । बुस्टर डोजका लागि सबै नागरिक र आप्रवासीहरूलाई सिधै खोप केन्द्रमा जान यूएईले आह्वान गरेको छ ।

यूएईमा क्वारेन्टाइन भने अनिवार्य अहिलेसम्म गरिएको छैन । कोभिड परीक्षण भने अनिवार्य गरिएकाे छ । रोजगारीका लागि यूएई पुगेका विदेशी कामदारको दुई पटक कोभिड परीक्षण गरिन्छ । यूएईले जिम्बाबे, घाना, युगान्डा, केन्यालगायत आठवटा देशका यात्रुहरूलाई प्रवेश निषेध गरेको छ ।

कुवेत

गएकाे अक्टोबर अन्तिम साता कुवेतले आफूलाई ‘मास्क फ्रि’ घोषणा गरेको थियो । तर, सधैँका लागि याे कदम कायम रहन सकेन । पुनः कोरोनाका संक्रमित बढन थालेपछि कुवेतले केही नयाँ नियम ल्याएको छ ।

कुवेत सरकारले २८ फेब्रुअरीसम्म सार्वजनिक स्थान, मल तथा होटलभित्र हुने सबै प्रकारका भेला गर्न प्रतिबन्ध लगाउने निर्णय गरेको छ । त्यसैगरी बुस्टर डोजका लागि ५० वर्ष माथिका नागरिक र आप्रवासीहरूका लागि सिधै खोप केन्द्रमा गएर खोप लगाउन पाउने तथा त्योभन्दा कम उमेर समूहकाले अनलाइनबाट स्वीकृति लिनुपर्ने नियम ल्याएको छ ।

कुवेत भित्रिने हरेक यात्रुहरूले ७२ घण्टा अगाडि कोरोना परीक्षण गराउन अनिवार्य गरिएको छ । यद्यपि कुवेतले प्रतिदिन १० हजार यात्रुहरूलाई कोरोनाका मापडण्ड पालना गर्दै भित्र्याउनेछ ।

कुवेत भित्रिने हरेक यात्रुहरूले १० दिन होम क्वारेन्टाइन बस्नुपर्नेछ । होम क्वारेन्टाइन बसेको तीन दिनमा कोरोना परीक्षण नकारात्मक आएकाहरूले भने थप क्वारेन्टाइन बस्नुपर्ने छैन । यस्तै, खाडीका देश ओमान र बहराइनमा पनि साउदी, कतार र यूएईको जस्तै नियम लागू भएको छ ।

इजरायल

इजरायलमा नेपालीहरू बुधबारदेखि वैदेशिक रोजगारीमा जान थालेका छन् । इजरायल रोजगारीमा जाने कामदारले विश्व स्वास्थ्य संगठनले मान्यता दिएको दुईवटा खोप अनिवार्य लगाएको हुनुपर्छ । नेपालबाट रोजगारीमा जाने कामदारले कोभिड परीक्षण इजरायल पुगेर पनि गर्नुपर्छ । इजरायल पुगेपछि एक साता क्वारेन्टाइन बस्नुपर्छ । ओमिक्रोन भाइरस फैलिएसँगै इजरायलले अफ्रिकी देशबाट आउने नागरिकलाई रोक लगाएको छ । नेपाली कामदारका हकमा भने स्वास्थ्यमापदण्ड पालना गरेका कामदार भित्रिन पाउनेछन् ।

दक्षिण कोरिया

कोरोनाका कारण दुई वर्षदेखि रोकिएको कोरियाको रोजगारी गत कात्तिक महिनादेखि खुलेको थियो । कोरिया रोजगारीमा जाने कामदारले अनिवार्य दुवै डोज खोप लगाएको हुनुपर्नेछ । नेपालमा १० दिन र कोरिया पुगेपछि १० दिन अनिवार्य होटल क्वारेन्टाइन बस्नुपर्ने स्वास्थ्य मापदण्ड लागू भएको छ ।

कोरियामा फेस मास्क अनिवार्य गरिएको छ । कोरियामा सार्वजनिक स्थलमा फेस मास्क नलगाउने स्वदेशी तथा विदेशी नागरिकलाई ३ सय अमेरिकी डलर जरिवाना र एक महिना जेल हुने निमय लागू गरिएकाे छ । कोरिया सरकारले श्रमिकका हकमा कार्यस्थलमा पनि मास्क अनिवार्य गरिएको छ ।

प्रकाशित मिति: बिहीबार, माघ ६, २०७८ १५:५६