'कोर्स' नसकिँदै परीक्षा सञ्चालन गर्ने त्रिविकाे तयारी, विद्यार्थीको विराेध

'कोर्स' नसकिँदै परीक्षा सञ्चालन गर्ने त्रिविकाे तयारी, विद्यार्थीको विराेध

A+ A A-

त्रिभुवन विश्वविद्यालयले स्नातक प्रथम वर्षको परीक्षा मिति तोकेको छ । कोरोना महामारीले प्रभावित नगरे आउँदो २ फागुनबाट परीक्षा गराउने तयारी त्रिविको छ । त्रिविको उक्त निर्णयलाई लिएर विद्यार्थीहरूले भने आपत्ति जनाएका छन् । आधा कोर्स पनि सकिँन नभ्याउँदै त्रिविले परीक्षा लिन हतारो गरेको भन्दै विद्यार्थीहरूले आपत्ति जनाएका हुन् ।

त्रिचन्द्र बहुमुखी क्याम्पसमा अध्ययनरत प्रथम वर्षका विद्यार्थीले परीक्षा मिति संशोधन गर्न भन्दै परीक्षा नियन्त्रकलाई निवेदन दिएका छन् । करिब ४५ दिनमात्र पठनपाठन भएको र २० देखि ४० प्रतिशतमात्र कोर्स सकिएकोले परीक्षा मिति हेरफेर गर्न विद्यार्थीकाे माग छ ।

‘त्रिविले निकालेको तालिकाअनुसार परीक्षा आउन २५ दिनमात्र बाँकी रहँदा कोर्स सकिँन गाह्रो छ । परीक्षा दिन हामी शैक्षिक वा मानसिक रूपमा तयार छैनौँ । तालिका शंसोधन होस्’, विद्यार्थीले पत्रमार्फत परीक्षा नियन्त्रकको ध्यानाकषर्ण गराएका छन् ।

त्रिचन्द्रमा अध्ययनरत जेनिश काफ्लेका अनुसार उनीहरूको कोर्स आधा पनि सकिएको छैन । कोरोना महामारीका कारण बीचमा पठनपाठन अवरुद्ध भएको थियो । महिना दिन जति चलेको अनलाइन कक्षामा पनि प्राविधिक समस्याले उपस्थिति जनाउन उनलाई सहज भएन ।

कोरोनाको दोस्रो लहर सकिएपछि (भदौबाट) बल्ल भौतिक रूपमा पठनपाठन हुन थालेको काफ्ले बताउँछन् । तर, कोर्स ५० प्रतिशत पनि सकिँन नपाउँदै त्रिविले परीक्षा मिति तोकेर अन्याय गरेको उनको भनाइ छ ।

‘वैशाखमै हाम्रो भर्ना भए पनि थुप्रै समय पढाइ हुन पाएन । कोर्स नै नसकेर अब कसरी परीक्षा दिने’, उनले भने ।

त्यस्तै त्रिचन्द्रकै प्रथम वर्षमा अध्ययनरत सुजन पौडेल पढाइ नभइ परीक्षा मात्र गराउनु चित्तबुझ्दो नभएको बताउँछन् । त्रिविले शैक्षिक क्यालेण्डर मिलाउने नाममा विद्यार्थीलाई यातना दिन नमिल्ने उनको भनाइ छ ।

‘यसरी पाठ नसकेरै परीक्षा लिनु विद्यार्थीलाई यातना दिनुसरह हो । परीक्षा मिति त्रिविले तुरुन्त सच्याउनुपर्छ’, उनले भने ।

सुजनका अनुसार चैतमा त्रिचन्द्रमा प्रवेशिका परीक्षा पास गरेपछि उनले १४ वैशाखमा भर्ना गरे । त्यसपछि लगत्तै कोरोनाको दोस्रो लहरले च्याप्याे । लकडाउन भएपछि पढाइ अस्तव्यस्त भयो । भदौबाट बल्ल एक महिनाजति अनलाइन कक्षा चल्यो । यद्यपि अनलाइन कक्षाबाट दूरदराजमा गएका विद्यार्थी छुटेको उनले बताए ।

‘अनलाइनमा एक महिना र भौतिक रूपमा एक महिना पनि पढाइ भएन । ४० प्रतिशत पनि कोर्स सकिएको छैन । अनि के आधारमा परीक्षा दिने ?’, सुजनले भने ।

पशुपति बहुमुखी क्याम्पसमा अध्ययनरत पावेल पोखरेल पनि अचानक परीक्षा मिति तोकिएकोमा चिन्तित छन् । हठात् परीक्षा फारम भर्नू भनेर त्रिविले उर्दी जारी गरे पनि असम्भव रहेको उनले बताए । क्याम्पस प्रशासनका कर्मचारीहरूमा कोरोना संक्रमण देखिएकोले तत्काल फारम भर्न पनि गाह्रो रहेको उनी बताउँछन् ।

‘एकातिर पाठ नै नसकेर फारम खुलायो । अर्काेतिर बन्द क्याम्पस प्रशासनमा गएर कसरी भर्ने ? अनि नपढी परीक्षा चाहीँ के दिने ?,’ पावेलको प्रश्न छ ।

यस्तै, अमृत साइन्स क्याम्पसकी निहारीका यादव पनि त्रिविको निर्णयप्रति आक्रोशित सुनिइन् । पाठ नै नसकी हचुवाको भरमा परीक्षा मिति तोकिएकोमा उनी असन्तुष्ट बनेकी छन् । त्रिविले शैक्षिक क्यालेण्डर मिलाउने नाममा विद्यार्थीको भविष्यलाई बेवास्ता गरेको उनको भनाइ छ ।

त्रिविका शिक्षाध्यक्ष शिवलाल भुसाल भने विद्यार्थीलाई पढ्न पर्याप्त समय दिएको दाबी गर्छन् । लकडाउनको समयमा सबैतिर जसो अनलाइनबाट र सामान्य समयमा भौतिक उपस्थितिमै पढाएको उनी बताउँछन् । प्रथम वर्षको पठनपाठन पनि गएको चैतबाटै सुरु भएको उनले बताए ।

‘कोरोनामा लकडाउनको समय पर्दा अनलाइन नै चल्ने भैहाल्यो । सामान्य अवस्था भइकन पनि भदौबाट भौतिक रूपमा पढेकै हुन् । अब कोर्स नै नसकिएको हो भने त्यो कलेजसँगै बुझ्नुपर्छ,’ भुसालले भने, ‘बरु अस्ति नै हुनुपर्ने प्रथम वर्षको परीक्षा डोटी अछाम तिरका विद्यार्थी हेरेर अझै ढिलो गरेका हौँ । शैक्षिक क्यालेण्डरलाई मिलाउन पनि मिति यताउता गर्नुपरेको हो ।’

प्रकाशित मिति: बिहीबार, माघ ६, २०७८ ०७:५३