भिजिट भिसामा युएई गएर काम गर्नेलाई ३ महिना जेल र १० हजार दिराम जरिवाना, हजाराैँ नेपाली प्रभावित

भिजिट भिसामा युएई गएर काम गर्नेलाई ३ महिना जेल र १० हजार दिराम जरिवाना, हजाराैँ नेपाली प्रभावित

A+ A A-

भिजिट भिसामा युएई गएर रोजगारी गर्ने विदेशी नागरिकलाई जेल र जरिवाना दुवै सजाय हुने भएको छ ।

श्रमस्वीकृति बिना युएईमा काम गर्नु अवैध हो । युएईमा श्रम स्वीकृति नलिएरै भिजिट भिसामा रोजगारी गर्ने विदेशी नागरिकलाई ३ महिना जेल र १० हजार दिरामसम्मको जरिवाना गरिने ‘दुबई सार्वजनिक अभियोजन’ले ट्वीटरमार्फत जानकारी गराएको छ ।

दुबई सार्वजनिक अभियोजनले ट्वीटरमार्फत गत १२ जनवरीमा भिजिट भिसामा आएर काम गर्ने प्रवृत्ति मौलाएको भन्दै यस सम्बन्धमा ध्यानाकर्षणसमेत गराउँदै यस्तो चेतावनी दिएकाे हाे ।

'भिजिट भिसाअन्तर्गत स्वदेश प्रवेश गर्ने र काम गर्न चाहने प्रत्येक विदेशीले सम्बन्धित निकायबाट अनिवार्य श्रम स्वीकृति अनुमति लिनुपर्छ, अन्यथा उनीहरूलाई ३ महिनासम्म कैद सजाय वा १० हजार रुपैयाँभन्दा बढी जरिवाना वा यी दुईमध्ये कुनै एक जरिवाना हुनेछ । साथै अदालतले राज्यबाट निष्कासन गर्न आदेश दिन सक्नेछ', सूचनामा भनिएकाे छ ।

दुई वर्षमा ३० हजार नेपाली भिजिट भिसामा युएई पुगे

युएई भिजिट भिसा सरकारको पनि टाउकाे दुखाईको विषय भएको छ । नेपालबाट विभिन्न प्रलोभन देखाउँदै वैदेशिक रोजगारीको नाममा ठगी गर्ने गिरोहले युएई भिजिट भिसामा नेपालीलाई पुर्‍याउने गरेका छन् ।

पछिल्लो दुई वर्षमा ३० हजार नेपाली भिजिट भिसामा युएई पुगेको अध्यागमन विभागको तथ्यांक छ । उनीहरू म्यानपावर, एजेन्ट र कन्सल्टेन्सीमार्फत भिजिट भिसामा युएई पुगेका हुन् ।

व्यक्तिगत तवरले रोजगारीको प्रलोभनमा धेरै नेपालीहरू भिजिट भिसामा युएई जाने गरेको र उनीहरू ठगिएकाे थाहा पाएपछि मात्रै न्याय खोज्न सरकारी निकायमा धाउने गरेको वैदेशिक रोजगार विभागका महानिर्देशक दीपक काफ्लेले जानकारी दिए ।

भिजिट भिसामा गएर काम पाइन्छ भनेर दलालको विश्वास गर्दा धेरै जना आर्थिक शोषणमा पर्ने गरेको र प्रमाण पुगेका मुद्दामा कानुनी कारबाही समेत भइरहेको महानिर्देशक काफ्लेले बताए ।

युएईस्थित नेपाली दूतावासका अनुसार भिजिट भिसामा युएई गएका १० हजारभन्दा बढी नेपालीहरू अलपत्र अवस्थामा बसेका छन् । उनीहरू रोजगारीको प्रलोभनमा भिजिट भिसामा दलालमार्फत त्यहाँ पुगेका हुन् ।

भिजिट भिसामा जाने युवासँग एजेन्ट र कन्सल्टेन्सीहरूले चर्को रकम असुलेर पठाउने गरेको उजुरी वैदेशिक रोजगार विभागमासमेत पर्ने गरेको छ । भिजिट भिसामा कामदार ओसार्नेहरूको सञ्जाल काठमाडौंदेखि युएईसम्म नै फैलिएको विभागका कर्मचारीहरू बताउँछन् ।

कोरोना महामारीमासमेत कतिपय म्यानपावरहरूले भिजिट भिसाको धन्दा चलाउँदै आएका छन् । उनीहरूले प्रतिव्यक्ति ३ लाख रुपैयाँभन्दा बढी लिएर नेपालीलाई भिजिट भिसामा युएई पठाउने गरेको उजुरी विभागमा पर्ने गरेको छ ।

रोजगारीको प्रलोभनमा पारेर लैजाने तर, त्यहाँ पुगेपछि एजेन्ट र म्यानपावरले बेवास्ता गर्दा कैयौँ नेपालीहरू ओभर स्टे हुनुपर्ने तथा काम नपाएर अलपत्र भएर स्वदेश फर्किर्नुपर्ने बाध्यता छ ।

भिजिटमा पुगेका कतिपय युवाहरूलाई एजेन्टले उल्टै हप्की–दप्की र कुटपिट गर्ने गरेकोसमेत गुनासो लिएर पीडित विभागमा धाउने गरेका छन् । यसरी भिजिट भिसाका नाम ठगिएर स्वदेश फर्किएका पीडितहरूले नेपालमा न्याय पाउने आधार पनि हुँदैन । जसका कारण उनीहरूको फसेको रकम दलालले फिर्ता गर्दैनन् ।

प्रकाशित मिति: बुधबार, माघ ५, २०७८ ०८:४६