कोरोना महामारीमा के हुन्छ शिक्षकको परीक्षा ? आयोग भन्छ- तयारीमा बाधा छैन, चैतको कुरा भन्न सकिन्न

कोरोना महामारीमा के हुन्छ शिक्षकको परीक्षा ? आयोग भन्छ- तयारीमा बाधा छैन, चैतको कुरा भन्न सकिन्न

A+ A A-

कोरोना महामारीका कारण शैक्षिक संस्था बन्द हुन थालेको अवस्थामा शिक्षक सेवा आयोगले खुलाएको शिक्षकको विज्ञापनअनुसार परीक्षा हुन्छ कि हुँदैन भन्ने अन्योल देखिएको छ । तर, महामारीले परीक्षाको आन्तरिक तयारीको काममा बाधा नपुगेको आयोगले जनाएको छ ।

आयोगले खुलाएको विज्ञापनअनुसार आगामी चैतमा परीक्षा गर्ने मिति तोकिएको छ । सोहीअनुसार आयोगले आन्तरिक कामलाई तीव्रता दिइरहेको बताउँछन् सूचना अधिकारी सुदर्शन मरहट्ठा । परीक्षार्थीको अनलाइन दरखास्त संकलन गर्ने क्रममा आयोग रहेको उनले बताए ।

सूचना अधिकारी सुदर्शन मरहट्ठा

‘आवेदकहरूले अनलाइन दरखास्त दिइरहेका छन् । हाम्रो आन्तरिक काम भइरहेको छ,’ मरहट्ठाले भने, ‘अब चैतमा हुने परीक्षाको हकमा भने अहिले नै बोल्न सकिने स्थिति छैन । परिस्थिति हेरेर त्यसबेलै निर्णय हुन्छ । सामान्य अवस्था भइरहे परीक्षा गराउन हामी तयार नै छौँ ।’

मरहट्ठाका अनुसार हालसम्म प्राथमिक तहको शिक्षकका लागि ४८ हजारले आवेदन दिएका छन् । त्यस्तै, निम्न माध्यमिक तहमा ४९ हजार ७ सय ४० र माध्यमिक तहमा ३२ हजार २ सय १५ जनाको आवेदन परेको छ । हालसम्म कुल १ लाख २९ हजार ९ सय ६८ जनाले अनलाइन दरखास्त दिएको उनले बताए ।

आवेदन दिएकामध्ये १ लाख ४ हजार ६ सय ५१ जनाले पैसा बुझाएर प्रमाणपत्र लिइसकेको मरहट्ठाले बताए । ‘परीक्षार्थीको आवेदन परिसकेपछि प्रश्नपत्र कसले छाप्ने के गर्ने भन्ने कुराहरू निर्णय हुन्छ । त्यो हाम्रो आन्तरिक काम भएकाले लकडाउनले खासै असर गर्दैन,’ उनले शिलापत्रसँग भने ।

यही १५ चैतमा मावि तहको परीक्षा हुँदैछ । त्यस्तै आयोगले चैत १७ गते निमावि र १९ गते प्रावि तहको परीक्षा लिँदैछ । मरहट्ठाका अनुसार आयोगले प्रदेशगत रूपमा विज्ञापन खुलाएको छ । ‘प्रदेशअनुसार विभिन्न ठाउँमा परीक्षा केन्द्र तोकेका छौँ । सोहीअनुरुप परीक्षा हुन्छ,’ उनले भने ।

प्रदेश नं. १ को मोरङ, प्रदेश २ का लागि धनुषा, बागमती प्रदेशका लागि हेटौँडा, गण्डकी प्रदेशका लागि कास्की, लुम्बिनी प्रदेशका लागि दाङ, कर्णाली प्रदेशका लागि सुर्खेत र सुदूरपश्चिम प्रदेशका लागि कैलालीमा परीक्षा केन्द्र तोकिएको छ ।

प्रमुख जिल्ला अधिकारीको अध्यक्षतामा बनेको प्रदेशस्तरीय परीक्षा सञ्चालन समन्वय समितिले परीक्षा सञ्चालन गर्नेछ ।

प्रकाशित मिति: बुधबार, पुस २८, २०७८ १९:३६