अलपत्र आयोजनाको काममा तीव्रता दिँदै बागमती सरकार

A+ A A-

बागमती सरकारले प्रदेशभित्र अलपत्र अवस्थामा रहेका पूर्वाधारका आयोजनालाई अगाडि बढाउन सक्रियता देखाएको छ । वर्षाैँदेखि आयोजनाहरू अलपत्र हुँदा विकास खर्चमा कमजोर बन्दै गइरहेको प्रदेश सरकारले योजना निर्माणमा तदारुकता देखाएको हो ।

११ कार्तिकमा मुख्यमन्त्री नियुक्त भएका राजेन्द्रप्रसाद पाण्डेले अलपत्र आयोजनाको निरीक्षण गरेर निर्माण कम्पनीलाई समयमै काम सक्न निर्देशन दिइसकेको मुख्यमन्त्रीका निजी सचिव अच्युत उपाध्यायले जानकारी दिए ।

पाण्डेले चितवन, सिन्धुली, मकवानपुर, धादिङमा प्रदेश सरकारबाट यसअघि सुरू भएका आयोजनाको निरीक्षण गरिसकेको उपाध्यायले बताए । पाण्डेले संघीय सरकारबाट सञ्चालित आयोजनाहरूको निरन्तर निरीक्षण गर्दै सम्झौताअनुसार समयमै निर्माण सक्न निर्देशन दिएको उनका निजी सचिव उपाध्यायले शिलापत्रलाई जानकारी दिए । ‘प्रदेशभित्र सञ्चालित वा संघीय सरकारबाट निर्माणाधीन आयोजना होस् मुख्यमन्त्री ज्यूले निरन्तर निरीक्षण गरिरहनु भएको छ । अलपत्र योजनाहरू समयमै सक्न निर्देशन दिइसक्नु भएको छ’, उनले भने ।

विकास निर्माणका आयोजनामा भइरहेका ढिलासुस्तीलाई हटाउन मुख्यमन्त्री पाण्डेले आकस्मिक तथा नियमित अनुगमनलाई तीव्रता दिइरहेका छन् । मुख्यमन्त्रीमा नियुक्त भएसँगै उनले भैंसे–भिमफेदी सडक निर्माणमा निर्माण व्यवसायीबाट भइरहेको ढिलासुस्ती र स्थानीय बासिन्दाहरूबाट भएको अवरोध हटाउन भौतिक पूर्वाधार विकास मन्त्रीदेखि सचिव र यातायात निर्देशनालयका निर्देशकलाई निर्देशन दिइसकेको उपाध्यायले बताए ।

मुख्यमन्त्री पाण्डेले निर्माण रोक्ने निर्माण व्यवसायीलाई तत्काल कारबाही गर्न पनि निर्देशन दिएको उनले जनाए । पाण्डेको निर्देशनपछि मुआब्जा विवादले अलपत्र परिरहेको भैंसे–भीमफेदी सडक निर्माणले गति लिइसकेको छ । मन्त्रालयको समन्वयमा जिल्ला प्रशासन कार्यालय मकवानपुरले स्थानीय र जनप्रतिनिधि राखेर मुआब्जा विवाद समाधान गरेको थियो । भैंसे–भीमफेदी हुँदै दैनिक हजारौँ संख्यामा सवारीसाधन काठमाडौं–हेटौंडा आवतजावत गर्छन् ।

बागमती प्रदेशसभा भवन निर्माणमा भइरहेको ढिलासुस्तीमाथि पनि मुख्यमन्त्री पाण्डेले चासो देखाएका थिए । भवन निर्माण कार्य अघि नबढाए निर्माण व्यवसायीलाई कारबाही गर्न मुख्यमन्त्रीले निर्देशन दिएपछि प्रदेशसभा भवन निर्माणले तीव्रता पाएको निजी सचिव उपाध्यायले जानकारी दिएका छन् । उपाध्यायले प्रदेशभित्र धेरै अलपत्र आयोजनाहरू निरीक्षण गरिसकेको र निर्माण कम्पनीलाई समयमै सक्न निर्देशन भइसकेकोले पुनः अनुगमनलाई निरन्तरता दिइने बताए ।

बागमती पुलमा निर्माण अन्तिम चरणमा

मकवानपुरको बागमती गाउँपालिका र सिन्धुलीको हरिहरपुरगढी गाउँपालिका जोड्ने बागमती पुल विगत १० वर्षदेखि अलपत्र थियो ।

मदन भण्डारी मार्ग (धरान–चतरा–हेटौंडा सडकखण्ड)अन्तर्गत् बागमती नदीमा पुल नबन्दा दुई जिल्लबासी तराई हुँदै ओहोरदोहोर गर्नुपर्ने बाध्यताबाट हैरान थिए । ठेक्का लागेको १० वर्षभन्दा बढी भैसक्दा पनि निर्माण पूरा नभएको पुलको मुख्यमन्त्रीमा नियुक्त हुनासाथ पाण्डेले निरीक्षण गरेका थिए । बागमतीमा पुल नबन्दा दोलखा, रामेछाप र सिन्धुलीबासीलाई प्रदेश राजधानी आउन कठिनाई भएको भन्दै पाण्डेले स्थलगत निरीक्षण गरेर निर्माण छिटो सक्न ताकेता गरेको उनका निजी सचिव उपाध्यक्ष बताउँछन् ।

‘बागमती पुललाई तोकिएको समयमा नै सम्पन्न गर्न मंसिर पहिलो हप्ता मुख्यमन्त्रीबाट आकस्मिक निरीक्षण भएको थियो । त्यति बेला छिटो निर्माण सक्न बढी जनशक्ति परिचालन गरेर भए पनि पुललाई पूर्णता दिन निर्देशन भएको थियो,’ उपाध्यायले भने । निर्देशन कार्यान्वयनको अवस्था बुझ्न मुख्यमन्त्री पाण्डे नै मंगलबार दिउँसो बागमती पुल पुगेका थिए ।

‘यतिका वर्षसम्म पुलको पिल्लर हेरेर हामीले बागमती खोला तरेका थियौँ । अब पुलबाट गाडी गुड्ने सक्ने भएछ । हामीलाई धेरै राहत मिलेको छ । मुख्यमन्त्रीलाई धन्यवाद दिन चाहन्छु,’ मंगलबार स्थानीय खड्गबहादुर पुलामीले सुनाए । मुख्यमन्त्री पाण्डेले मदन भण्डारी मार्गका आयोजना प्रमुख, मकवानपुर र सिन्धुलीका प्रमुख जिल्ला अधिकारीलाई बोलाएर निरन्तर निगरानी गर्दै पुल निर्माण सम्पन्न गर्न निर्देशन दिएका थिए ।

बागमती नदीमा पुल निर्माणको ठेक्का लागेको १० वर्ष ६ महिना पुगेको छ । पुलको ठेक्का पाएको स्वच्छन्द निर्माण सेवाले पेटी ठेकेदार लगाएर काम गराउँदा पुल अलपत्र बनेको थियो । स्वच्छन्द निर्माण सेवाले तीन वर्षभित्र काम सक्ने गरी २९ असार २०६८ मा २० करोड ६२ लाख रुपैयाँमा सम्झौता गरेको थियो । स्वच्छन्द निर्माण सेवाका प्रोप्राइटर जयराम लामिछानेले पुलमा दुई पांग्रे र चार पांग्रे साना सवारी सञ्चालन हुन सक्ने जानकारी दिए ।

‘यातायात सञ्चालनमा समस्या छैन, पुलमा सामान्य कालोपत्रे र पुलसँगै केही ड्याक बनाउने काम चाँडै नै सक्छौँ । ३ वर्षसम्म अर्कै कम्पनीले काम गर्छु भनेर ढाँट्दा आफू पनि समस्यामा परेँ, अब काम करिब–करिब सकिएको छ,’ लामिछानेले भने । पुल निर्माणको लागि फाउण्डेसन नै बदल्नु परेकाले ढिलाइ भएको उनले बताए । बागमती पुलले आगामी १५ वैशाखभित्र पूर्णता पाइसक्ने पनि उनले दाबी गरे ।

पुल निर्माणका लागि चैत मसान्तसम्म समयसीमा थपिएको र काम सकेर १५ वैशाखमा हस्तान्तरण गर्न तयार रहेको लामिछानेकाे भनाइ छ । निर्माण व्यवसायी लामिछानेलाई मुख्यमन्त्री पाण्डेले दोलखा, रामेछाप र सिन्धुलीका जनप्रतिनिधि र प्रदेश सदस्यहरू १२ माघमा हेटौंडामा हुने राष्ट्रियसभा निर्वाचनमा भोट हाल्न आउन सक्छन् ? भन्दै प्रश्न गरेका थिए । ‘कालोपत्रेका लागि एक दिन पुल बन्द हुन सक्छ, नत्र यातायात रोकिन्न,’ लामिछानेले जवाफ दिएका थिए ।

बागमती पुलबाट हाल दैनिक २ सयभन्दा बढी साना सवारीसाधन सञ्चालन भइरहेका छन् । पुल समयमै निर्माण नहुँदा पुलमा भर्‍याङको सहायता लिनुपर्ने समस्या थियो । पक्कि पुल पूर्ण रूपमा निर्माण सम्पन्न नहुँदा बागमती नदी पार गर्नका लागि स्थानीयले पुलमा भर्‍याङ लगाउनुपर्ने बाध्यता अब हटेको छ । मदन भण्डारी मार्गअन्तर्गत सिन्धुली र मकवानपुरतर्फ सडक कालोपत्रे भइसकेको छ ।

प्रकाशित मिति: बुधबार, पुस २८, २०७८ ११:३६