सहायता बढाएर पनि सञ्चिति सहज बनाउने सरकारको योजना, ६३ प्रतिशत बढ्यो अनुदान

A+ A A-

चालु आर्थिक वर्षको पहिलो ६ महिनामा विदेशी अनुदानको प्राप्ति ६३ प्रतिशतले बढेको छ । ७ पुससम्म १ रुपैयाँ पनि अनुदान प्राप्त नभएकोमा त्यसयता १३ अर्ब ८८ करोड ३३ लाख रुपैयाँ अनुदान आएको सरकारी आय-व्ययको विवरण राख्ने महालेखा नियन्त्रकको कार्यालयको तथ्यांकमा देखिएको छ ।

महालेखाको रेकर्डअनुसार ८ पुसमा ६ अर्ब ३० करोड २८ लाख रुपैयाँ विदेशी अनुदान प्राप्त भएको छ । १८ पुसमा ७ अर्ब ५८ करोड ५ लाख र २० पुसमा १९ लाख रुपैयाँ अनुदान सरकारी सञ्चित कोषमा जम्मा भएको छ ।

अघिल्लो आर्थिक वर्षको पहिलो ६ महिनामा जम्मा ५ अर्ब रुपैयाँ अनुदान सञ्चितिमा देखिएको थियो । त्यो अनुदान पनि असोज महिनामा नै आएकोमा २९ पुस २०७७ मा ३० करोड रुपैयाँ बढेको थियो ।

चालु आर्थिक वर्षको पुस महिनासम्म गत वर्षको भन्दा ६३ प्रतिशत बढी अनुदान आएकोमा त्यो सबै रकम एकै महिनामा आएको छ ।

यस वर्ष सरकारले करिब ६० अर्ब रुपैयाँ अनुदान आउने प्रक्षेपण गरेको छ । महालेखा नियन्त्रकको कार्यालयका एक अधिकारीले भने अहिले अनुदानको रूपमा देखिएको रकमले सञ्चितिमा भने खासै अर्थ नराखेको तर्क गरे ।

'विगतमा नै आयोजनाको नाममा नेपालमा पैसा आएको र राष्ट्र बैंकको सञ्चिति देखिएको अवस्थामा अहिले सोधभर्ना भएपछि मात्रै अनुदानको रुपमा देखिएको हो, यसले अहिले देखिएको सञ्चिति चापमा खासै राहत पुग्न सक्‍ने देखिँदैन,' ती अधिकारीले भने ।

आयात उच्च दरले बढेको र रेमिट्यान्स घटेको अवस्थामा सरकार विदेशी सञ्चितिको सन्तुलन कायम राख्नका लागि सहायत बढाउन केन्द्रित भएको छ ।

चालु आर्थिक वर्षको चार महिनाको अवधिमा नै राष्ट्र बैंकसँग जम्मा ७.२ महिनालाई पुग्ने विदेशी सञ्चिति रहेको छ । यस्तो अवस्था देखिएपछि सरकारले नेपाल नआइसकेको विदेशी सहायताको सोधभर्ना गर्ने काममा जुटेको अर्थ मन्त्रालयका अधिकारीहरूले बताएका छन् ।

अर्थसचिव मधुकुमार मरासिनीले माघ महिनासम्म आउने विदेशी सहायताको कारण पनि विदेशी मुद्राको सञ्चिति बढाउन सहयोग पुग्ने बताए ।

'अहिले सकारात्मक रूपमा विदेशी सहायता बढेको छ, केही रकम माघ महिनासम्म प्रवाह हुँदैछ, यसले सञ्चिति सहज अवस्थामा पुग्न सहयोग पुग्ने देखिन्छ,' मरासिनीले भने ।

अर्थ मन्त्रालयको अन्तर्राष्ट्रिय समन्वयन महाशाखाका अधिकारीका अनुसार पोष्ट कोभिड वित्तीय व्यवस्थापनका लागि अन्तर्राष्ट्रिय मुद्रा कोषबाट १ सय १० मिलियन (११ करोड) रकम माघ महिनासम्म प्रवाह हुने तालिका रहेको छ भने जाइका, विश्व बैंकअन्तर्गत यूके एडबाट पनि सहयोग बढेर आउने जनाइएको छ ।

प्रकाशित मिति: मंगलबार, पुस २७, २०७८ २०:०३