विश्वविद्यालय सञ्चालन गर्न कति सहज ? मन्त्रालय भन्छ– भौतिक उपस्थितिमा पठनपाठन सम्भव छैन

विश्वविद्यालय सञ्चालन गर्न कति सहज ? मन्त्रालय भन्छ– भौतिक उपस्थितिमा पठनपाठन सम्भव छैन

A+ A A-

सरकारले १५ माघसम्म विद्यालयहरू बन्द गर्न निर्देशन दिएसँगै विश्वविद्यालयहरूले पनि आफ्नो तयारी थालेका छन् । विश्वविद्यालयले अनुकूलता हेरेर कक्षा सञ्चालनको निर्णय आफैँ गर्ने अधिकार पाएकोले पनि आन्तरिक छलफलमा जुटेको हो ।

शिक्षा, विज्ञान तथा प्रविधि मन्त्रालय भने सीसीएमसीको निर्णयलाई मान्दा विश्वविद्यालयमा पनि पठनपाठन गराउन सम्भव नरहेको बताउँछ । मन्त्रालयका शिक्षा सचिव यादव कोइराला २५ जनाभन्दा बढी भेला हुन नपाइने निर्णयले विश्वविद्यालयमा भौतिक उपस्थितिमा पठनपाठन हुननसक्ने बताउँछन् ।

‘घुमाउरो पाराले २५ जनाभन्दा धेरै भेला नहुने भनेर विश्वविद्यालयमा भौतिक उपस्थिति गराउन सीसीएमसीले अंकुश लगाएको छ,’ उनले भने, ‘अब उहाँहरूले २५ जनाभन्दा कम भेला गराएर पढाउन सक्नुहुन्छ भने त ठिकै छ । नत्र भौतिक उपस्थितिमा पठनपाठन गराउने कुरा सम्भव छैन ।’

यता विश्वविद्यालयहरू भने कक्षा सञ्चालनको विषयलाई लिएर आन्तरिक छलफलमा जुटेका छन् ।

परिस्थिति हेरेर निर्णय लिन्छौँ : त्रिवि

त्रिभुवन विश्वविद्यालयले परिस्थितिअनुसार निर्णय लिने जनाएको छ । अहिले विद्यार्थी र शिक्षकहरूको छुट्टी पनि भएकोले खुलेपछि यस विषयमा निर्णय लिने त्रिविको प्रतिक्रिया छ ।

‘अहिले हाम्रो छुट्टी नै छ । पुस मसान्तसम्म त छुट्टी नै दिएका छौँ । त्यसपछि के गर्ने भन्नेबारे परिस्थिति हेरेर निर्णय गर्छौं,’ त्रिविका कार्यकारी सचिव सूर्य अधिकारीले भने ।

हाल चलिरहेको परीक्षा भने नरोकिने अधिकारी बताउँछन् । त्यस्तै कक्षा सञ्चालनको हकमा पनि थोरै विद्यार्थी हुने अनिवार्य कक्षा चलिरहेको छ । कोर्स नसकिएका कक्षाहरू मात्र अहिले सञ्चालनमा रहेको उनले बताए ।

‘पोहोर अनलाइनमा पढाइ भएकोले शिक्षकहरूलाई बिदा दिन पाइएको थिएन । त्यसैले यसवर्ष एक महिना छुट्टी दिएका हौँ,’ अधिकारीले भने, ‘अब छुट्टीको समय सकिएपछि परिस्थिति हेरेर निर्णय गर्छौं । तत्काललाई केही भन्न सकिने अवस्था छैन ।’

अनलाइन र भौतिक उपस्थिति दुबैमा कक्षा सञ्चालन : काठमाडौं विश्वविद्यालय

काठमाडौं विश्वविद्यालय भने अनलाइन र भौतिक उपस्थिति दुबै मिलाएर कक्षा सञ्चालन गर्ने बताउँछ । काठमाडौं विश्वविद्यालय स्कुल अफ एजुकेसजनका डिन बालाचन्द्र लुइटेलका अनुसार अहिले पनि केयूमा भौतिक दूरी कायम गरेर पठनपाठन भइरहेको छ ।

‘ल्याबहरूको काम भौतिक दूरी कायम गरेरै भइरहेको छ । प्रयोगात्मक बाहेकका कक्षाहरू अनलाइनमा सञ्चालन छन् । प्रयोगात्मक कक्षाहरू पनि सानो–सानो संख्यामा विद्यार्थीहरूको उपस्थिति गराएर भएको छ,’ लुइटेलले भने, ‘हामीले अनुकूलता हेरेर केहीलाई अनलाइन, केहीलाई भौतिक उपस्थितिमै पढाएका छौँ । अलिबार अब यसैगरी नै चल्छ । अलि गम्भीर परिस्थिति आएमा सोहीअनुरुप निर्णय हुन्छ ।’

संघीय सरकारले पत्र पठाए मात्र बन्द गर्छौं ः नेपाल संस्कृत विश्वविद्यालय

नेपाल संस्कृत विश्वविद्यालय भने शिक्षा मन्त्रालयको मुख ताकेर बसेको छ । विश्वविद्यालय संघीय सरकारको मातहतमा रहेकोले पनि मन्त्रालयकै पत्र कुरेको बताउँछन्, विश्वविद्यालयका उपकुलपति कार्यलयका शाखा प्रमुख विनय कुमार पोखरेल ।

‘हामी आफैँले तत्काललाई केही निर्णय गर्दैनौँ । संघीय सरकारको मातहतमा रहेको विश्वविद्यालय भएकोले मन्त्रालयले बन्द गर्न पत्र पठाएपछि मात्र बन्द गर्छौं,’ उनले भने, ‘सायद सरकारले अब बन्द गर्नै भनेर पत्र पठाउला । सोहीअनुरुप हामी चल्ने हो ।’

अहिले विद्यार्थीहरूको जोडो बिदा रहेकोले पनि यसबारे निर्णय गर्न हतार नरहेको पोखरेल बताउँछन् । सरकारको पत्र नआएको अवस्थामा स्वास्थ्य मापदण्ड पालना गराएर पठनपाठन गराउने उनले बताए ।

यस्तै अन्य विद्यालयहरूले पनि छलफल गरिरहेका छन् । यद्यपि आजै सरकारले स्कुल कलेज बन्द गर्ने निर्णय गरेकोले पनि तत्काल विश्वविद्यालयहरूले कुनै योजना बनाइसक्न भ्याएका भने छैनन् ।

‘हामीले पनि आजै सरकारको निर्णय आएकोले यसबारे काम गर्न भ्याएका छैनौँ । आवश्यक छलफल गरेर सूचना निकाल्छौँ,’ पोखरा विश्वविद्यालयका योजना शाखा प्रमुख दीपकराज पौडेलले भने ।

प्रकाशित मिति: सोमबार, पुस २६, २०७८ १८:४७