कोरोनाका कारण चितवनका मेला-महोत्सव के होलान् ? प्रशासन भन्छ- केही आदेश हुन सक्छ

कोरोनाका कारण चितवनका मेला-महोत्सव के होलान् ? प्रशासन भन्छ- केही आदेश हुन सक्छ

A+ A A-

कोरोना महामारी केही मत्थर भएसँगै लयमा फर्किएको चितवनको व्यापार व्यवसायमा कोरोना संक्रमण दर बढेसँगै पुनः पहिलेकै अवस्थामा पुग्ने त होइन भन्ने आशंका हुन थालेको छ । गत हप्तादेखि बढ्न थालेको कोरोनाको संक्रमणले यसैको संकेत गरेको व्यवसायीहरू बताउँछन् ।

कोरोना महामारीका कारण गत वर्ष रोकिएका मेला महोत्सवहरू यस वर्ष भइरहेका छन् भने केही सुरु हुने अवस्थामा छन् । चितवन महोत्सवको तेह्रौँ संस्करण आइतबारदेखि सुरु भएको छ । चितवनकै रत्ननगरमा भोलि (मंगलबार) अर्को महोत्सव उद्घाटन हुने कार्यक्रम छ ।

तर, आइतबार नै कोभिड- १९ संकट व्यवस्थापन समन्वय केन्द्र (सीसीएमसी) को बैठक बस्यो । उक्त बैठकले कोरोना संक्रमण बढेको भन्दै रोकथाम तथा नियन्त्रणका लागि १३ बुँदे निर्णय गरेको छ । सीसीएमसीको यो निर्णयका कारण चितवनमा हुने मेला महोत्सवमा पनि अन्योल बढेको छ ।

यस विषयमा जिल्ला प्रशासन कार्यालय चितवनले हालसम्म कुनै निर्णय गरिसकेको छैन । यद्यपि सोमबार दिउँसो ३ बजे सीडीओ कार्यालयमा बैठक बस्दैछ । चितवनका सहायक सीडीओ चिरञ्जीवी शर्मा आज साँझसम्म केही आदेश हुन सक्ने सम्भावना रहेको बताउँछन् ।

चितवनमा पनि कोरोना संक्रमण दर बढ्दै गएकाले ठूलो भिडभाड हुने कार्यक्रम नगर्न आदेश हुन सक्ने शर्माले बताए । ‘निर्णय त भएको छैन तर, जिल्लामा २५ जनाभन्दा धेरैको जमघट हुन नपाउने आदेश आउन सक्छ’ उनले भने, ‘चितवनमा भिडभाड हुने मेला महोत्सव सेमिनारजस्ता कार्यक्रम बन्द हुन सक्छन् ।’

जिल्लामा रहेका शैक्षिक संस्थाहरू पनि केन्द्रकै निर्णयअनुसार माघ १५ गतेसम्म बन्द गरिने भएको छ । तर, सञ्चालन भइराखेका परीक्षाहरू भने यथावत् राख्ने कि भन्ने कुरा पनि आएको शर्माले बताए ।

प्रकाशित मिति: सोमबार, पुस २६, २०७८ १५:०८