वैदेशिक रोजगारीमा ओमिक्रोनकाे प्रभाव : ३० प्रतिशत मागपत्र कटौती

A+ A A-

काेराेना भाइरसकाे ओमिक्रोन भेरियन्ट तीव्र गतिमा फैलिएसँगै नेपालबाट श्रमिक आपूर्ति गर्दै आएका रोजगारदाता कम्पनीले कामदार नपठाउन म्यानपावर व्यवसायीलाई मेल गर्न थालेका छन् । म्यानपावर व्यवसायीका अनुसार विभिन्न देशबाट करिब १ लाख ५० हजार मागपत्र आएका छन् । जसमा ९० हजारभन्दा बढीको पूर्व श्रम स्वीकृतिसमेत जारी भइसकेको छ ।

विशेष गरेर खाडीका देशमा ओमिक्रोन भाइरस फैलिएसँगै रोजगारदाता कम्पनीले ३० प्रतिशतसम्म कोटा कटौती गरिरहेका छन् । कोटा कटौती गरेका कम्पनीले ओमिक्रोनको कारण देखाउँदै कामदार नपठाउन मेलमार्फत पत्राचार गरिरहेको व्यवसायीहरूले जानकारी दिएका छन् ।

साउदी, यूएई, कतार, ओमान, कुवेत र बहराइनका कतिपय कम्पनीले ओमिक्रोन भाइरस फैलिएको भन्दै नेपालबाट कामदार तत्काल नलिने जानकारी गराएका हुन् । कतिपय अन्तिम श्रम स्वीकृति अथवा भिसा लागेका कामदारको समेत कोटा कटौती हुन थालेको वैदेशिक रोजगार व्यवसायी संघका सदस्य लक्ष्मण पौडेलले बताए ।

ओमिक्रोनका कारण धेरै मागपत्र रोजगारदाता कम्पनीले खारेज गर्दा सम्रग वैदेशिक रोजगारीकाे क्षेत्रमा प्रभाव पर्ने उनले बताए । ‘रोजगारदाता देशमा पछिल्लो समय ओमिक्रोन भाइरस तीव्र गतिमा फैलिन थालेको छ । त्यसको प्रत्यक्ष प्रभाव नेपालको वैदेशिक रोजगारी क्षेत्रमा पर्‍यो । यो विषयमा सरकार गम्भीर पनि छैन’, उनले भने, ‘सरकारले विदेश जाने कामदारका हकमा बुस्टर डोजको व्यवस्थापन पनि गर्न सकेको छैन । कतिपय रोजगारदाता कम्पनीले बुस्टर डोज अनिवार्य गरेका छन् ।’

कोभिड महामारीका कारण दुई वर्षको अवधिमा करिब ३ लाख मानिसले रोजगारी गुमाउने परेको उनको भनाइ छ । वैदेशिक रोजगार विभागले तयार पारेको मासिक प्रतिवेदनअनुसार मंसिर महिनामा संस्थागत तथा व्यक्तिगत र पुनः श्रम स्वीकृति गरेर कूल ६९ हजार ४ सय ४३ जना विदेशीएका छन् । पुस महिनामा रोजगारदाता देशमा ओमिक्रोन फैलिएका कारण विदेशीने युवाहरूकाे संख्या घट्ने विभागकाे अनुमान छ ।गत वर्षको पहिलो पाँच महिनामा ३३ हजार युवाले मात्र विदेश जान श्रम स्वीकृति लिएकोमा यो संख्या चालु आर्थिक वर्षकाे सोही अवधिसम्ममा १ लाख ९८ हजार ८ सय पुगेको विभागको तथ्यांकमा उल्लेख छ ।

चालु आर्थिक वर्षको पाँच महिना लयमा फर्किएको वैदेशिक रोजगारीमा विश्वव्यापी रूपमा फैलिएको ओमिक्रोन भाइरसको प्रभाव पर्ने वैदेशिक रोजगार विभागका महानिर्देशक दिपक काफ्लेले बताए । सरकारले विदेशीने कामदारका हकमा कोभिड खोपकाे व्यवस्थापन गर्ने उनले बताए ।

प्रकाशित मिति: सोमबार, पुस २६, २०७८ १२:१७