गौतमबुद्ध अन्तर्राष्ट्रिय क्रिकेट रंगशालाको स्वामित्व भरतपुर महानगरले लिन्छः रेनु दाहाल

गौतमबुद्ध अन्तर्राष्ट्रिय क्रिकेट रंगशालाको स्वामित्व भरतपुर महानगरले लिन्छः रेनु दाहाल

A+ A A-

भरतपुर महानगरपालिकाकी मेयर रेनु दाहालले गौतमबुद्ध अन्तर्राष्ट्रिय क्रिकेट रंगशालाको स्वामित्व महानगरपालिकाले लिने बताएकी छन् ।

धुर्मुस–सुन्तली फाउण्डेशनले दिएको आर्थिक र प्राविधिक प्रतिवेदनको सरकारी पक्षबाट मूल्यांकन गरिसकेपछि रंगशालाको स्वामित्व भरतपुर महानगरपालिकाले लिने उनले बताइन् ।

आइतबार न्यूज एजेन्सी नेपालसँग कुरा गर्दै दाहालले धुर्मुस–सुन्तली फाउण्डेशनले आफूलाई १७ करोड ऋण लागिसकेको र राष्ट्रिय तथा अन्तर्राष्ट्रिय स्तरबाट पनि सोचेअनुरुपको सहयोग प्राप्त नभएको भन्दै महानगरलाई स्वामित्व लिन आग्रह गरेको जानकारी दिइन् ।

महानगरले अब रंगशालाको काम अघि बढाउने उनको भनाइ छ । सरकार जिम्मेवारीबाट पन्छिन नमिल्ने भन्दै रंगशाला बनाउँदा लागेको ऋण र बहुवर्षीय योजनाअनुसार काम अघि बढाउन संघीय सरकारलाई आग्रह गर्ने दाहालले जानकारी दिइन् ।

'सरकारले जिम्मेवारीबाट पन्छिन मिल्दैन, स्वामित्व लिन्छ,' दाहालले भनिन्, 'सबै सरकारको आपसी र समझदारीबाट यो योजनालाई अघि बढाउँछौँ ।’

दाहालले सम्झौताअनुसार महानगरपालिकाले जग्गा उपलब्ध गराउने, वातावरण सिर्जना गरिदिने र स्रोत जुटाएर निर्माण गर्ने दायित्व धुर्मुस-सुन्तली फाउन्डेसनको भएको बताइन् । त्यसका बाबजुत आफूहरूले स्रोत जुटाउनका लागि आर्थिक सहयोग पनि गरेको उनको भनाइ छ ।

'लगभग १० करोड बजेट महानगरको आन्तरिक बजेटबाट उपलब्ध गराएको हो । महायज्ञ धनधान्याञ्चल आयोजना गरेर पनि सहयोग गरेका हौँ । १८/२० करोडको बजेट फाउण्डेशनलाई उपलब्ध गराएको हो,' दाहालले भनिन्, 'उहाँहरूले १७ करोड ऋण लागिसक्यो गर्न सक्ने स्थिति भएन भनेपछि ऋण लगाएर गर्ने कुरा भएन ।'

दाहालले पछिल्लो समय चितवन राजनीतिको केन्द्रबिन्दु बनेको भन्दै त्यसो हुनुका पछाडि मा‌ओवादी केन्द्रका अध्यक्ष प्रचण्ड रहेको दाबी गरिन् । शान्ति प्रक्रियायता मुलुक प्रचण्डकै वरिपरि रहेको र देशका हरेक समस्याको समाधान प्रचण्डबाटै भएको उनले बताइन् ।

आफ्नो साढे ४ वर्षको कार्यकालमा जनताले सोचेको र जनतासँग वाचा गरेभन्दा धेरै काम गरेको रेनुको दाबी छ । चितवन अहिले दुग्ध उत्पादन, माछा, केराखेती, कृषिको क्षेत्रमा आत्मनिर्भर रहेको बताइन् ।

प्रकाशित मिति: आइतबार, पुस २५, २०७८ १५:१८