युनिलिभरले ब्रेकर चलाउँदा उद्घाटन गरेको दुई दिनपछि चिरा पर्‍यो ५० लाखको पार्टी प्यालेस

युनिलिभरले ब्रेकर चलाउँदा उद्घाटन गरेको दुई दिनपछि चिरा पर्‍यो ५० लाखको पार्टी प्यालेस

A+ A A-

हेटाैँडा उपमहानगरपालिका-३, बसामाडीस्थित बुहराष्ट्रिय कम्पनी युनिलिभरको लापर्वाहीका कारण एक युवक रन्थनिएका छन् । युनिलिभरसँगै पूर्वतर्फ जोडिएको ‘काकाको पार्टी प्यालेस’ चिरा परेपछि त्यसका सञ्चालक नरहरिनन्दन बर्तौंला यतिबेला न्याय खोज्दै रन्थनिइरहेका हुन् ।

आफूलाई युनिलिभरले गर्दा सडकमा पुर्‍याएको भन्दै क्षतिपूर्तिको माग गर्दै जनप्रतिनिधिदेखि नेताहरूको दैलोसम्म पुगेर बर्तौंलाले हारगुहार गरिरहेका छन् । तर, उनले आफ्नो पीडा बुझ्ने जनप्रतिनिधि र नेता भने नभेटेको गुनासो शिलापत्रसँग गरे ।

घटना १९ पुसको हो । बर्तौंलाले २ वर्ष लगाएर ५० लाख खर्चिएर बनाएको पार्टी प्यालेस क्षण भरमै चिराचिरा पर्‍यो । युनिलिभरले सवारी तौलपुल भत्काउन ल्याएको एक्साभेटर ब्रेकर लगाउँदा पार्टी प्यालेसमा पूर्ण रूपमा क्षति पुगेको हो । बर्तौंलाले १७ पुसमा मात्रै पार्टी प्यालेसको उद्घाटन गरेका थिए । उद्घाटन गरेको भोलिपल्ट एउटा कार्यक्रम गर्न पाए पनि दोस्रो दिनदेखि उनको योजनामा युनिलिभर बाधक बनेर आएको छ ।

युनिलिभरले स्थानीयको जनधनको ख्याल नै नगरी ब्रेकर हान्दा भर्खरै उद्घाटन गरिएको पार्टी प्यालेसमा लाखौँको क्षति पुगेको हो । युनिलिभरले तौलपुल भत्काएर अर्को तौल पुल राख्न ब्रेकर लगाएको थियो । पीडित बर्तौलाले ब्रेकर हान्दा भौतिक संरचनामा क्षति पुग्ने भन्दै कामदार लगाएर भत्काउन आग्रह गरे पनि युनिलिभरले कुनै चासो नै नदिएको बताए । युनिलिभरले बर्तौंलाको आग्रहलाई वेवास्ता गरी ब्रेकर चलाउँदा पार्टी प्यालेस छियाछिया बनेको पाइएको छ ।

‘मैले १७ गते मात्रै पार्टी प्यालेस उद्घाटन गरेको थिएँ । पूरा निर्माण पनि गरिसकेको थिइनँ । एउटा कार्यक्रम गर्न पाइयो । तर, १९ जेठमा युनिलिभरले पहाडको चट्टान भत्काउने ब्रेकर लगाएपछि भत्कियो', बर्तौंलाले भने । पार्टी प्यालेससँगै एक घरमा पनि क्षति पुगेको भन्दै बर्तौंला र घरधनीले वडा कार्यालयमा उजुरी पनि दिए ।

पीडितहरूको निवेदनमाथि वडा कार्यालयले उद्योग, पीडित र प्रतिनिधिबीच छलफलबाट कुनै निकास ननिस्किएको भन्दै आवश्यक प्रक्रिया अगाडि बढाइदिनेसम्बन्धमा जिल्ला प्रशासन कार्यालय मकवापुरलाई पत्र पठाएको छ । प्रशासनले पनि कुनै चासो नदेखाएको पीडित बर्तौंलाले बताए । पार्टी प्यालेसको भवनका भित्ताहरू फुट्दा भवन प्रयोगमा ल्याउन नमिल्ने भएको बर्तौंलाको गुनासो छ ।

प्रशासनले वडा कार्यालयबाट आएको पत्रबारे अनविज्ञता प्रकट गरेको छ । मकवानपुरका प्रमुख जिल्ला अधिकारी भरतमणि पाण्डेले वडा कार्यालयबाट आएको पत्रबारे जानकारी नभएको बताए । युनिलिभर र स्थानीयबीच भएको समस्याको विषयमा आफू जानकार नभएको पाण्डेको भनाइ छ । युनिलिभर हेटौँडाका एचआर अफिसर गोविन्द शाही भने यस विषयमा बोल्नै चाहेनन् । ‘आफूहरूलाई माथिल्लो आदेश केही नबोल्नू भन्ने छ । तपाईंहरूको प्रश्न के हो भन्नुस् । म प्रश्न पुर्‍याइदिन्छु, के जवाफ आउँछ अनि मात्रै भन्छु', उनले भने ।

पार्टी प्यालेसमा पुगेको क्षतिबारे कम्पनीका प्रतिनिधिलाई जानकारी गराउँदा उल्टै आफूमाथि नै हातपात गरेको बर्तौंलाले आरोप लगाएका छन् । युनिलिभरका सवारीचालकले आफूमाथि आक्रमण गरेको उनको आरोप छ । बर्तौंलाले उद्योगसँग पूर्ण क्षतिपूर्तिको माग गरेका छन् । बर्तौंलाले २६ वर्षअघि युनिलिभरले आफ्नो ४ धुर जग्गा पनि मिचेको आरोप लगाएका छन् । कम्पनीलाई आफ्नो ४ धुर जग्गा मिचिएको बारे ध्यानाकर्षण गराउँदा पनि कम्पनीले उक्त जग्गा हालसम्म खाली नगरेको उनको आरोप छ ।

बसामाडीका स्थानीय निरध्वज खड्काले युनिलिभरले तौलपुल मापदण्डविपरीत बनाएको बताएका छन् । स्थानीयको घर र तौल पुलको दूरी कायम नै नगरी तौलपुल राखेको भन्दै युनिलिभरले विगतदेखि नै स्थानीयलाई पीडित बनाएर राखेको आरोप लगाए । उनले पूर्व–पश्चिम राजमार्गसँगै रहेको युनिलिभरले पार्किङ व्यवस्थापन नगर्दा दुर्घटनाको जोखिम भएको बताए । युनिलिभरले ज्यादती नरोक्ने र क्षति भएका संरचनाको क्षतिपूर्ति नदिने अवस्था आएमा कडा आन्दोलन गर्ने चेतावनी स्थानीयले दिएका छन् ।

प्रकाशित मिति: आइतबार, पुस २५, २०७८ १२:१०