त्रिविमा तेस्रो वर्षको नतिजा निकाल्न ढिलासुस्ती, नतिजा नआउँदै चौथो वर्षको परीक्षा

त्रिविमा तेस्रो वर्षको नतिजा निकाल्न ढिलासुस्ती, नतिजा नआउँदै चौथो वर्षको परीक्षा

A+ A A-

त्रिभुवन विश्वविद्यालयले बीबीएस तेस्रो वर्षको नतिजा नआउँदै चौथो वर्षको परीक्षा लिन सुरु गरेको छ । गएको मंगलबारदेखि त्रिविले चौथो वर्षको परीक्षा सुरु गरिसकेको छ । यता परीक्षा भएको एक वर्ष बितिसक्दा पनि तेस्रो वर्षको नतिजा आएको छैन ।

विगतमा भने एउटा कक्षाको नतिजा सार्वजनिक भइसकेको केही समयपछि मात्र माथिल्लो कक्षाको परीक्षा लिइने गरिन्थ्यो । तर, यस वर्ष अन्य संकायको नतिजा सार्वजनिक भइसके पनि व्यवस्थापन संकायको हुन सकेको छैन । जसलाई लिएर विद्यार्थीहरू चिन्तित देखिन्छन् ।

पशुपति बहुमुखी क्याम्पसमा अध्ययनरत लक्ष्मी ढकाल नतिजा ढिलो आएकोमा आक्रोशित सुनिइन् । परीक्षा दिएको एक वर्ष बित्दा पनि नतिजा प्रकाशन नभएकाले विद्यार्थीको भविष्यप्रति त्रिवि जिम्मेवार नरहेको उनी बताउँछिन् । त्यसमाथि अघिल्लो वर्षको नतिजा नै नआई चौथो वर्षको परीक्षा लिएर विद्यार्थीलाई मानसिक दबाब दिएको उनको भनाइ छ ।

‘हामीलाई त्रिविले हेपेको हो । अरु संकायका साथीहरूको नतिजा आएर ढुक्क छन् । हामीलाई भने अत्तोपत्तो छैन,’ ढकालले भनिन्, ‘त्यसमाथि चौथो वर्षको परीक्षा सुरु भएको छ । अघिल्लो वर्षबारे मूल्यांकन नै नगरी अर्को वर्षको परीक्षा कसरी दिने ?’

त्यस्तै, शंकरदेव क्याम्पसमा पढ्ने सञ्जिता तामाङ त्रिविले विद्यार्थीलाई परीक्षाका लागि मानसिक रूपमा तयार हुने समयसमेत नदिएको बताउँछिन् । तेस्रो वर्षको नतिजा कुरिरहेका विद्यार्थीलाई एकाएक चौथो वर्षको परीक्षा लिइनु अन्याय भएको उनको भनाइ छ ।

‘हामी तेस्रो वर्षको नतिजा कुरिरहेका छौँ । परीक्षा भएको एक वर्ष बित्नै लाग्दा पनि नतिजा आएको छैन । त्यसमाथि चौथो वर्षको परीक्षा लियो । हामीलाई त त्रिविले मानसिक रूपमा तयार हुने समय पनि दिएन’, उनले शिलापत्रसँग भनिन् ।

हाल चौथो वर्षको परीक्षा दिइरहेकी सञ्जिता गिरी पनि तेस्रो वर्षको नतिजा नआउँदा बिलखबन्दमा छिन् । अघिल्ला वर्षहरूमा नतिजा आएको दुई/तीन महिनापछि मात्र अर्को वर्षको परीक्षा हुनेगरेको थियो । तर, यस वर्ष भने चौथो वर्षको परीक्षा सम्पन्न हुने बेलासम्म पनि अघिल्लो वर्षको नतिजा आएन । यसलाई त्रिविले विद्यार्थीमाथि खेलबाड गरेको उनी ठान्छिन् ।

गिरीले प्रश्न गरिन्, ‘त्रिविले पक्कै केही गडबड गरेको छ । नत्र किन हाम्रो चाहिँ नतिजा यति ढिलो आउँछ ? अनि नतिजा नआई परीक्षा लिन किन हतारो परेको ? विद्यार्थीलाई प्रेसर पर्छ, मानसिक रूपमा तयार हुन पनि कठिन हुन्छ भन्ने त्रिविले बुझेको छैन ?’

नतिजा आउन किन ढिलो ?

गएको ११ फागुनदेखि त्रिविले तेस्रो वर्षको परीक्षा लिए पनि हालसम्म बीबीएसको नतिजा निकाल्न सकेको छैन । जबकि सँगै परीक्षा दिएका अन्य संकायको नतिजा सार्वजनिक भइसकेको छ । बीबीएसको मात्र नतिजा सार्वजनिकमा त्रिविले गडबड गरेको अशङ्का भइरहेको छ ।

विगत वर्षमा परीक्षा भएको ५/६ महिनाभित्रै नतिजा आउने गरेको बताउँछन्, व्यवस्थापन संकाय पशुपति क्याम्पसमा अध्यापन गराउँदै आएका प्राध्यापक दुर्गा बजगाईं । उनी भन्छन्, ‘पहिलाको उदाहरण हेर्दा गएको भदौ–असोजभित्रै नतिजा आउनुपर्ने हो । तर, पुस सकिनै लाग्दासमेत आएको छैन । पक्कै त्रिविमा केही प्राविधिक गडबडी भएको छ ।’

त्रिवि स्रोत भने केही विद्यार्थीको उत्तरपुस्तिका नै हराएकाले नतिजा आउन ढिला भइरहेको बताउँछ । ‘यहाँभित्र उत्तरपुस्तिका नै हराएको भन्ने हल्ला छ । नभए पनि केही गडबड त पक्कै भएको छ । नत्र अरु संकाय आउँदा बीबीएसको किन नआउने ?,’ त्रिवि परीक्षा नियन्त्रण कार्यलयका (पनिका) का एक अधिकारीले शिलापत्रसँग भने ।

तर, सहायक परीक्षा नियन्त्रक घनश्याम ठाकुर भने परीक्षार्थीको संख्या धेरै भएकाले नतिजा आउन समय लागेको बताउँछन् । उनका अनुसार ७० हजार परीक्षार्थीको उत्तरपुस्तिका जाँच्नुपरेकाले अरु विषयको भन्दा ढिलो भएको हो ।

त्यस्तै, कोरोना महामारीका कारण बिग्रिएको शैक्षिक क्यालेन्डर मिलाउन तत्काल चौथो वर्षको परीक्षा गर्नुपरेको ठाकुरले बताए ।

‘कर्मचारीहरू पर्याप्त छैनन् । नतिजा निकाल्न हामी काम गरिरहेका छौँ । काम सकिएपछि नतिजा आउँछ’, उनले भने, ‘त्यस्तै ‘इयर लस’ नहोस् भनेर परीक्षा लिएको हो । कोरोनाले बिग्रिएको शैक्षिक क्यालेन्डर पनि मिलाउनुपर्‍यो नि ।’

प्रकाशित मिति: शुक्रबार, पुस २३, २०७८ १७:५८