जाडाेमा छाला किन फुस्राे हुन्छ र फुट्छ ? डाक्टरबाटै थाहा पाउनुहोस् हेरचाह गर्ने तरिका (भिडियोसहित)

जाडाेमा छाला किन फुस्राे हुन्छ र फुट्छ ? डाक्टरबाटै थाहा पाउनुहोस् हेरचाह गर्ने तरिका (भिडियोसहित)

A+ A A-

जाडोको मौसममा धेरै मानिसमा छाला सुक्खा हुने, फुट्नेजस्ता समस्याहरू देखिन्छन् । गर्मी मौसममा वाातावरण तातो र ‘ह्युमिड’ हुन्छ भने जाडो मौसममा चिसो र सुक्खा हुने गर्छ । वातावरणको यही परिवर्तन हाम्रो छालामा देखिने हो । किनकि, सुक्खा मौसमले हाम्रो छाला पनि सुक्खा बनाउँछ ।

सुक्खा हुनुको अर्काे कारण वातावरणअनुसार हाम्रो जीवनशैली फरक हुनु हो । जस्तै, नुहाउँदा अत्यधिक तातो पानीको प्रयोगले छालामा मोइस्चर घट्छ र सुक्खा हुन्छ । गर्मी मौसमको दाँजोमा जाडो मौसममा पेय पदार्थहरू पनि कम सेवन गरिन्छ । जाडोमा कतिपयले कम मात्रामा पानी पिउने भएकाले पनि छालामा थप समस्या निम्तिन सक्छ ।

चिसोबाट बच्न हिटर, एसी आदिको नियमित प्रयोग पनि छाला सुक्खा हुनुको कारणमध्येमा पर्छ । सुक्खा हुने, पोल्ने, चिलाउनेजस्ता समस्या हुनुको अर्को कारण हामीले प्रयोग गर्ने लुगा हो । जाडो मौसमको लुगा गर्मी मौसममा प्रायः प्रयोग हुँदैनन् । सफा अनि राम्रोसँग नराखिएको लुगामा भने फङ्गसहरू, किटाणुहरू जम्मा हुन सक्छन् । ती नदेखिने किटाणुहरूको असर छालामा देखिन्छ ।

समाधानका उपाय

छाला रोग विशेषज्ञ डाक्टर रूपक घिमिरेका अनुसार जुनसुकै मौसममा पनि छालामा मोइस्चर घट्न दिनुहुँदैन । जाडो मौसममा भने समय–समयमा छालामा मोइस्चराइजरको प्रयोग गर्नुपर्छ । छालामा नियमित सनस्क्रिनको प्रयोग गर्नुपर्छ । सनस्क्रिनको प्रयोग घाममा निस्कँदाबाहेक पनि प्रयोग गर्न आवश्यक छ ।

त्यस्तै, मन्द तातो पानीले मात्र शरीर नुहाउनुपर्छ । लुगाहरू प्रयोग गर्दा आफ्नो छालाको प्रकार हेरेर मात्र प्रयोग गर्नुपर्छ । धेरै दिन प्रयोग नगरिएको लुगालाई लगाउनुअघि धुने अथवा घाममा सुकाउने गर्नुपर्छ ।

हिटरहरू प्रयोग गरिएको ठाउँमा अक्सिजन अभाव हुने भएकाले झ्यालढोका लगाएर गर्नुहुँदैन । त्यसरी प्रयोग गरिएको अवस्थामा छालालाई मोइस्ट राख्न चाहिने अक्सिजन पर्याप्त हुँदैन । तसर्थ झ्यालढोका खुल्ला राखेर हिटरको प्रयोग गर्न आवश्यक छ ।

कस्ता केमिकलको प्रयोग गर्ने ?

हामीले छालाको समस्या समाधान गर्न भान्सामा रहेका सामग्री मात्र पर्याप्त नहुने डा. रूपक बताउँछन् । उनका अनुसार सबै उपाय भान्सामा मात्र हुन्छ भन्ने कुरा नै गलत हो । वैज्ञानिक पुष्टि भएका उपाय मात्र प्रयोग गर्न उनी सुझाउँछन् । जस्तो, मोइस्चराइजर नभएको खण्डमा नरिवल तेलको प्रयोग पनि गर्न सकिन्छ ।

कस्मेटिक्स सामानको प्रयोग गर्दा छालाको प्रकार जाँचेर मात्रै प्रयोग गर्नुपर्छ । उमेरअनुसार फरकफरक प्रकारका समस्याहरू देखिने गर्छन् । बच्चाका लागि बिहानको घाम ताप्दा आवश्यक ‘भिटामिन डी’ पर्याप्त हुन्छ । तर, दिनभर घाममा राख्ने गर्नु हुँदैन ।

जाडोमा छालामा के-कस्ता समस्या आउँछन्, किन र कसरी हेरचाह गर्न सकिन्छ, यसबारे तपाईंलाई छर्लङ्ग पार्ने प्रयासमा हामीले छाला रोग विशेषज्ञ डाक्टर रूपक घिमिरेसित भिडियाे कुराकानी गरेका छाैँः