असुरक्षित बन्दै सडक: चितवनमा साढे पाँच महिनामा २३ पैदलयात्रीले गुमाए ज्यान

असुरक्षित बन्दै सडक: चितवनमा साढे पाँच महिनामा २३ पैदलयात्रीले गुमाए ज्यान

फाइल तस्वीर ।

A+ A A-

१२ पुसमा भरतपुर-९, शरदपुरकी लेखादेवी ढकाल साँझको खाना खाएर एकैछिन हिँडडुल गर्न घरबाट बाहिर निस्किइन् । सडकमा घरनजिकै सडकछेउमा आफ्नै सुरमा हिँडिरहेकी उनलाई पछाडिबाट तीव्र गतिमा आएको प्रदेश २-०३-०२१ ६८७७ नम्बरको स्कुटरले ठक्कर दियो ।

स्कुटरको ठक्करबाट ढकाल र उनीसँगै गएकी गएकी शरदपुरकै खगिसरा कँडेल घाइते भए । दुवैलाई उपचारका लागि अस्पताल पुर्‍याइयो । तर, विडम्बना उपचारकै क्रममा ६५ वर्षीया लेखादेवीको भोलिपल्ट चितवन मेडिकल कलेज (सीएमसी) मा मृत्यु भयो भने ६० वर्षीय कँडेल त्यही उपचाररत छिन् ।

२ पुसमा आमाको हात समातेर बाटो काट्दै गरेकी बालिकालाई ट्रकले ठक्कर दिँदा घटनास्थलमै ज्यान गयो । भरतपुरबाट पूर्वतर्फ जाँदै गरेको बागमती प्रदेश ०३९००१ ब १३ ०६ नम्बरको ट्रकले भरतपुर-१२ बाटो काट्ने क्रममा बसन्तचोकमा ठक्कर दिँदा दुई वर्षीया बालिका दीपिका जोशीको घटनास्थलमै मृत्यु भएको थियो ।

उनकी आमा २४ वर्षीया सम्झना जोशी घाइते भइन् । बालिकाको मृत्यु भएपछि आवेशमा आएर स्थानीयले ट्रक नै जलाइदिए । पूर्व-पश्चिम राजमार्ग पनि अवरुद्ध गरे । प्रहरीले भिड नियन्त्रणका लागि अश्रुग्यास चलायो । तर, सडक असुरक्षाका कारण दुई वर्षको कलिलो उमेरमै दीपिकाले ज्यान गुमाउनु पर्‍यो ।

यो घटना भएको पाँच दिन अगाडिमात्रै २६ मंसिरमा भरतपुर-१५ मा अतिथि पार्टी प्यालेस अगाडि भित्री सडकखण्डमा चौबिसकोठीबाट चनौलीतर्फ जाँदै गरेको से १ च ५८८ नम्बरको एम्बुलेन्सले पैदलयात्री तुलबहादुर मक्मी मगरलाई ठक्कर दिँदा उनी गम्भीर घाइते भए । भरतपुर-१५ का ३५ वर्षीय मगरको पुरानो मेडिकल कलेजमा उपचारका क्रममा मृत्यु नै भयो ।

यी त प्रतिनिधि घटनामा मात्रै हुन् । चितवनमा पछिल्लो तीन सातामा सवारीसाधनको ठक्करबाट तीन जना पैदलयात्रीले ज्यान गुमाएका छन् । जिल्ला ट्राफिक कार्यालय चितवनको तथ्याङ्क हेर्ने हो चालु आर्थिक वर्षको साढे पाँच महिनामा सडक दुर्घटनामा ६९ जनाले ज्यान गुमाएका छन् भने चार सय २६ जना घाइते भएका छन् । जसमा २३ जना पैदलयात्रीको मात्रै ज्यान गएको छ भने ५८ जना घाइते भएका छन् ।

ट्राफिक कार्यालय चितवनका अनुसार, साउनमा एक, भदौ तीन, असोजमा आठ, कात्तिकमा चार, मंसिर दुई र पुस १५ सम्म पाँच जना पैदलयात्रीले ज्यान गुमाएका छन् । जिल्ला ट्राफिक कार्यालय चितवनका प्रहरी नायब निरीक्षक अर्जुन पौडेल चालक र पैदलयात्रीमा नै ट्राफिक सचेतनाको अभाव र बेवास्ताका कारण दुर्घटना बढेको बताउँछन् ।

सड़क पूर्वाधारका कारण पनि धेरै पैदलयात्रीले अनाहकमै ज्यान गुमाउनु परेको पौडेल बताउँछन् । पैदलयात्रीलाई धेरैजसो दुईपाङ्ग्रे र ठूला सवारीसाधनले ठक्कर दिने गरको उनले बताए ।

यातायात व्यवसायी संघ चितवनका दुर्घटना निरीक्षक केपी शर्मा वर्षैंपिच्छे परिवर्तन गरिने यातायातका संरचनाका कारण पनि दुर्घटना निम्तिने गरेको बताउँछन् । दुर्घटना न्यूनीकरणका लागि विशेष कार्यक्रम नै चलाउनु पर्ने उनको भनाइ छ ।

प्रकाशित मिति: मंगलबार, पुस २०, २०७८ ०७:५७