ओमिक्रोन भेरियन्ट कति खतरनाक ? यसो भन्छन् अनुसन्धानकर्ताहरू

A+ A A-

गत नोभेम्बरमा दक्षिण अफ्रिकामा पहिलोपटक ओमिक्रोन नामको नयाँ भेरियन्ट पहिचान भएपछि यसले तत्कालै विश्वका देशहरूलाई सतर्क बनाएको थियो । उक्त भेरियन्टबारे सबै तथ्य र सूचना अज्ञात रहँदा विश्वलाई त्रसित थियो । त्यसलगत्तै वैज्ञानिक तथा अनुसन्धानकर्ताहरू ओमिक्रोन भेरियन्टबारेको खोजीमा लागिहाले । अहिले आएर उक्त भेरियन्ट यसअघिको डेल्टा भेरियन्टभन्दा कम घातक तर बढी संक्रामक रहेको विभिन्न अनसन्धानहरूले निष्कर्ष निकालेका छन् । अनुसन्धानले विभिन्न कम्पनीका खोपको ओमिक्रोनविरुद्धको प्रभावकारितामाथि पनि केही निष्कर्ष निकालेका छन् । आउनुहोस्, हालसालैका अध्ययनबारे चर्चा गरौँ ।

डेल्टा भेरियन्टको तुलनामा कम खतरनाक

लण्डनको इम्पेरियल कलेजमा गरिएको अध्ययनले डेल्टाभन्दा ओमिक्रोन भेरियन्टबाट संक्रमित बिरामीको अस्पताल भर्ना हुनुपर्ने दर कम भएको जनाएको छ । उक्त अध्ययनमा कोभिड-१९ बाट संक्रमित ३ लाख २५ हजार व्यक्तिमध्ये ५६ हजार जना ओमिक्रोन र बाँकी डेल्टा भेरियन्टबाट संक्रमित बिरामी समावेश थिए । जसमा डेल्टाको तुलनामा ओमिक्रोन भेरियन्टबाट बिरामी व्यक्तिलाई अस्पतालको उपचार चाहिने आवश्यकता २० देखि २५ प्रतिशतले कमी थियो ।

उक्त अध्ययनले खोपको दुई मात्रा डेल्टा वा ओमिक्रोनबाट बच्न पर्याप्त नभएको र गम्भीर बिरामी हुनबाट बच्न खोपको बुस्टर डोज आवश्यक पर्ने बताएको छ । ओमिक्रोनका कारण अस्पताल पुग्नपर्ने अवस्था कम भए पनि भाइरसले आक्रमण गर्ने उच्च जोखिम कायम रहने भन्दै अनुसन्धानकर्तामध्येका एक प्राध्यापक अज्रा घानीले सचेत गराएका छन् ।

यो पनि : ओमिक्रोन भेरियन्ट के हो, के यो खतरनाक छ ?

दक्षिण अफ्रिकामा गरिएको अर्को एक अध्ययनले पनि ओमिक्रोनका कारण अस्पताल भर्ना हुनुपर्ने बाध्यता कम भएको देखाएको छ । नेसनल इन्स्टिच्युट फर कम्युनिकेबल डिजिजेज (एनआईसीडी) ले १ लाख ६० हजार कोभिड संक्रमितमाथि गरेको अनुसन्धानले ओमिक्रोनबाट संक्रमित व्यक्तिको अस्पताल बसाइँ अरु भेरियन्टभन्दा ८० प्रतिशतसम्म कम हुने निष्कर्ष निकालेको छ ।

यस्तै, स्कटल्याण्डमा सानो समूहमा गरिएको अध्ययनमा पनि ओमिक्रोनका कारण अस्पताल भर्ना हुनुपर्ने दर डेल्टाभन्दा ६५ प्रतिशत कम रहेको निष्कर्ष दिएको छ । बेलायतको हेल्थ सेक्युरिटी एजेन्सीको गत शुक्रबार प्रकाशित अनुसन्धानको निष्कर्ष अनुसार डेल्टाभन्दा ओमिक्रोन भेरियन्टबाट संक्रमित व्यक्ति अस्पताल जानुपर्ने अवस्था एक तिहाइले कमी आएको छ । क्याम्ब्रिज विश्वविद्यालयसँगको सहकार्यमा गरिएको सो अनुसन्धानमा दश लाखभन्दा बढी डेल्टा र ओमिक्रोनबाट संक्रमित व्यक्ति सहभागी थिए ।

खोपको बुस्टर डोज आवश्यक

कोभिडविरुद्ध सिनोभ्याक्स खोपको दुई मात्रा ओमिक्रोन भेरियन्टविरुद्ध अपर्याप्त रहेको अनुसन्धानहरूले जनाएका छन् । त्यति मात्र नभएर सिनोभ्याक्स खोपको दुई मात्रा र यसपछि दिइएको फाइजर-बायोटेकको बुस्टर डोजले समेत ओमिक्रोनको विरुद्धमा कम ‘एन्टिबडी’ उत्पादन गर्ने अनुसन्धानले बताएका छन् । यसकारण नयाँ भेरियन्टसँग बच्न यो खोपपछि पनि दुई पटक बुस्टर डोज लिइनुपर्ने कुरा सुझाएका छन् ।

बेलायतको ‘हेल्थ सेक्युरिटी एजेन्सी’को तथ्यांक अनुसार अक्सफोर्डको अस्ट्रोजेनेका खोप पनि कोभिड संक्रमणको विरुद्ध थोरै मात्रै प्रभावकारी छ । फाइजर, बायोटेक वा मोडेर्ना खोपले दोस्रो मात्रा लगाएको २० हप्तापछि ओमिक्रोनविरुद्ध १० प्रतिशत मात्रै बचाउँछ । तर, यी खोपको बुस्टर खोपको मात्राले ६५ देखि ७५ प्रतिशतसम्म बिरामीलाई बचाउनेछ । अनुसन्धान अनुसार यी खोपहरूको बुस्टर मात्रा लगाएको २ हप्तापछि अस्पताल भर्ना हुनुपर्ने अवस्था ८८ प्रतिशतले कमी हुनेछ ।

उच्च संक्रामक भेरियन्ट

दक्षिण अफ्रिकामा पहिलोपटक ओमिक्रोन देखिएलगत्तै प्रारम्भिक अध्ययनका आधारमा यो भेरियन्ट उच्च संक्रामक छ भन्ने कुरा विज्ञहरूले बताएका थिए । हाल विश्वका विभिन्न देशको संक्रमणको उच्च फैलावटले यसलाई पुष्टि गरिदिएको छ । त्यसैले विश्व स्वास्थ्य संगठनका प्रमुखले आगामी दिनमा ओमिक्रोन र डेल्टा भेरियन्टले सुनामी ल्याउन सक्ने चेतावनी दिइरहेका छन् । तर, ओमिक्रोनको संक्रमण दरबारेमा भने थप अध्ययनहरू भइरहेका छन् ।

ओमिक्रोन भेरियन्टलाई मानिसमा पहिल्यै लगाइएको खोपका कारणले शरीरमा विकास भएको प्रतिरोधात्मक शक्तिको कारणले कमजोर बनाएको कतिपय वैज्ञानिकले औंल्याएका छन् । तर, यसको उच्च संक्रामक शक्तिका कारण ठूलो जनसंख्यालाई यसले संक्रमित बनाउन सक्ने भएकाले अस्पताल पुग्ने बिरामी बढ्न सक्ने कुरा विज्ञहरूले बताएका छन् । त्यसैले कोभिडविरुद्धका सावधानीका उपाय पूर्णरूपमा पालना गर्नु/गराउनु र नै बुद्धिमानी हुनेछ ।

कैयौं मानिसमा खोपको दोस्रो मात्रा लगाइसकेपछि पनि कोभिडले संक्रमित बनाएको छ । किनकि मानिसले खोप लगाएको निश्चित समयपछि शरीरमा एन्टिबडी अर्थात् सम्बन्धित रोगविरुद्ध लड्ने प्रतिरोधात्मक शक्तिको कमी हुँदै जान्छ । यसो हुन नदिन खोपको बुस्टर डोज चाहिन्छ । शरीरको रोग प्रतिरोधात्मक प्रणालीलाई भाइरसविरुद्ध लड्नुपर्ने अवस्थाबारे सम्झाइराख्न खोपको बुस्टर डोजको आवश्यकता परेको हो । बुस्टर डोजले रोग प्रतिरोधात्मक शक्तिलाई लम्ब्याउन मद्दत गर्छ ।

(एजेन्सीको सहयोगमा)

प्रकाशित मिति: आइतबार, पुस १८, २०७८ ०८:०१