पाँच महिनामा हेटौँडाको खर्च साढे २१ प्रतिशत मात्रै, नगरसभामा बजेट संशोधन प्रस्ताव पेस

पाँच महिनामा हेटौँडाको खर्च साढे २१ प्रतिशत मात्रै, नगरसभामा बजेट संशोधन प्रस्ताव पेस

A+ A A-

बागमती प्रदेशको एकमात्र उपमहानगरपालिका हेटौँडाले चालु आर्थिक वर्ष २०७८–७९ को पाँच महिनामा साढे २१ प्रतिशतमात्रै खर्च गरेको छ ।

हेटौँडा उपमहानगरले चालु आर्थिक वर्षमा ६० करोड ५४ लाख अर्थात् २१ दशमलव ५४ प्रतिशत मात्रै बजेट खर्च गरेको उपप्रमुख मिनाकुमारी लामाले जानकारी दिइन् । बिहीबार उपमहानगरपालिकाको दशौं नगरसभामा वित्तीय अवस्था प्रस्तुत गर्दै उपप्रमुख लामाले चालु आर्थिक वर्षको पाँच महिनासम्म खर्च कम देखिनुमा प्राविधिक कारण रहेको बताएकी छन् । उनले अधिकांश क्षेत्रगत आयोजना तथा कार्यक्रम सम्झौता भएर सञ्चालन भइरहेको र खर्च भुक्तानी भइनसकेका कारण बजेट खर्च कम भएको बताइन् ।

‘धेरै आयोजना र कार्यक्रम चलिरहेकै कारण भुक्तानी भइसकेको छैन । त्यसकारण खर्च कम देखिएको हो । क्षेत्रगत खर्चमा कमी देखिए पनि असार मसान्तसम्म बजेट खर्चमा उल्लेखनीय प्रगति हुने अपेक्षा लिएका छौँ,’ लामाले भनिन् । उपमहानगरपालिकाले विकासको क्षेत्रमा २० करोड ८२ लाख ५३ हजार, कार्यालय सञ्चालन तथा प्रशासनिक क्षेत्रमा ९ करोड ७७ लाख ५४ हजार, सुशासन तथा अन्तर सम्बन्धित क्षेत्रतर्फ १ करोड २ लाख ८९ हजार, सामाजिक विकासमा २७ करोड ५० लाख ९७ हजार, आर्थिक विकासको क्षेत्रमा १ करोड ४० लाख ४८ हजार खर्च भएको उपप्रमुख लामाले जानकारी दिइनु ।

उपमहानगरपालिकाले आर्थिक वर्ष २०७८–७९ का लागि दुई अर्ब ६० करोड १५ लाख ५२ हजार ९ सय १० रुपैयाँको बजेट ल्याएको थियो । दशौं नगरसभामा बजेट संशोधनको प्र्रस्ताव पेस गरेको छ । लामाका अनुसार संशोधित बजेट २ अर्ब ८५ करोड प्रस्ताव गरिएको हो । नगरसभाबाट पारित नीति तथा कार्यक्रम र संशोधित बजेटले नगरवासीको जीवनस्तरमा गुणात्मक सुधार हुँदै जाने नगर प्रमुख हरिबहादुर महतले बताए ।

सफाइ कर्मचारीदेखि डाक्टर रुइतसम्म सम्मानित

उपमहानगरले नगर क्षेत्र सरसफाइ गर्ने मजदुरदेखि आँखाका डाक्टर सन्दुक रुइतलाई सम्मान प्रदान गरेको छ । दृष्टिविहीनलाई दृष्टि प्रदान गर्ने, शल्यक्रियाको क्षेत्रमा आफ्नो छुट्टै पहिचान बनाउन सफलतासँगै आँखा उपचारको क्षेत्रमा प्रविधिको विकास गर्न सफल भएको भन्दै डा. रुइतलाई सम्मान गरिएको हो ।

नगरसभामा रुइत उपस्थित नभएपछि नेपाल आँखा कार्यक्रमका कार्यकारिणी सदस्य हेटौँडा सामुदायिक आँखा अस्पतालका संरक्षक सिद्धिलाल श्रेष्ठमार्फत डा. रुइतलाई सम्मानपत्र दिइएको छ । ललितकलाका माध्यमबाट आफ्नो विशिष्ट पहिचान बनाउन सफल भएको भन्दै हेटौँडा–१८ का मूर्तिकार लक्ष्मण भुजेललाई सम्मान गरिएको छ ।

हेटौँडाका खेलाडी अन्जन विष्ट, हेटौँडा–१४ का सुनिल बल र हेटौँडा–१८ का आयुष घलान पुरस्कृत भएका छन् । उनीहरुले जनही ३५ हजार रुपैयाँ पाएका छन् । यसैगरी पूर्वराष्ट्रिय बक्सिङ खेलाडीसमेत रहेका पिप्ले युवा क्लबका अध्यक्ष सुशील घिमिरेलाई खेल क्षेत्रको विकासमा अनवरत लागिपरेको भन्दै सम्मान गरिएको छ । हेटौँडा–७ का आशा विशेष पाठशाला तथा पुनस्र्थापना केन्द्र सञ्चालन गरी बौद्धिक अपाङ्गता संरक्षण र विकासका क्षेत्रमा काम गर्ने आइना वार्का न्यौपानेलाई सम्मान गरिएको छ ।

यसैगरी नगरका दुई वडालाई उत्कृष्ट घोषित गर्दै थप अनुदानसहित पुरस्कृत गरिएको छ । नगरसभाबाट गत आर्थिक वर्ष २०७७–७८ मा वित्तीय प्रगतिका आधारमा हेटौँडा–१९ नम्बर वडा प्रथम भएको छ । हेटौँडा–१९ का वडाध्यक्ष नरनाथ सुवेदीसहित वडा कार्यालयलाई २० लाख रुपैयाँ थप अनुदानसहित पुरस्कृत गरिएको हो । हेटौँडाको ९ नम्बर वडा कार्यालय द्वितीय घोषित भएको छ । ९ नम्बर वडालाई १५ लाख रुपैयाँ थप अनुदानसहित पुरस्कृत गरिएको छ । हेटौँडा–९ का वडाध्यक्ष लक्ष्मण प्रसाद भण्डारी हुन् ।

नगरसभाबाट ६ जना कर्मचारी पुरस्कृत भएका छन् । उपमहानगरका अधिकृत आठौँ तहका मनोज कुमार सुवेदी, सातौँ तहका रामकृष्ण थापा, सुबोध थापा, अधिकृत छैठौँ तहका महेन्द्र चापागाईं, बरिष्ठ सहायक पाँचौँ तहका केसबप्रसाद देवकोटा र हेल्थ असिस्टेन्ट मिना कुमारीलाई पुरस्कृत गरिएको हो । उनीहरुले जनही नगद ७५ हजार रुपैयाँ पाएका छन् ।

हेटौँडा उपमहानगरपालिका न्यायिक समितिका मेलमिलापकर्ता संयोजक रामचन्द्र अर्याल र मेलमिलापकर्ता हटिया संयोजक सरस्वती पौडेललाई पुरस्कृत गरिएको छ । उनीहरुलाई जनही २५ हजार नगदसहित पुरस्कृत गरिएको हो । दीर्घ सेवा पदक कर्मचारी सम्मानबाट अधिकृत नवौं तहका भिम प्रसाद तिमल्सिना, आठौँ तहका रोशन रिजाल, जगनाथ सापकोटा, भैरव कुमाल, छैठौँ तहका अमोदप्रसाद मैनाली, सहायक स्तरका जयराम पुलामी मगर, विनोद सुवेदी, हिम प्रसाद पौडेल, राजेन्द्रनाथ पोख्रेल, सावित्री श्रेष्ठ, शिवध्वज गोदार, शोभाकान्त लम्साल, फडिन्द्र शर्मा र दुर्गा कार्की सम्मानित भएका छन् ।

प्रकाशित मिति: बिहीबार, पुस १५, २०७८ १८:१४