पहिलो बैठकमा मुख्यमन्त्री पाण्डेसँग जबाफ मागेको एमाले दोस्रो बैठकमा सदनमै गएन

पहिलो बैठकमा मुख्यमन्त्री पाण्डेसँग जबाफ मागेको एमाले दोस्रो बैठकमा सदनमै गएन

A+ A A-

बागमती प्रदेशको प्रमुख प्रतिपक्ष नेकपा एमालेले मुख्यमन्त्री राजेन्द्र पाण्डेसँग प्रष्टोक्ति मागेर संसद बैठक छाडेको छ । बिहीबारको पहिलो संसद बैठकमा उपस्थित एमालेले दोस्रो चरणको बैठकमा मुख्यमन्त्री पाण्डेले जबाफ दिने कार्यसूची तय भएपछि संसद छाडेको हो ।

बुधबारको बैठकमा पूर्वमुख्यमन्त्री डोरमणि पौडेलले एमालेको तर्फबाट पाण्डेसँग प्रदेशलाई आर्थिक भार पार्ने गरी १४ वटा मन्त्रालय विस्तार गर्नुको औचित्य पुष्टि गर्नुपर्ने, प्रदेशको महत्वका योजनाको कटौती गर्नुको कारण र मुख्यमन्त्रीले आफ्नो पार्टीको कमिटी बनेमा मात्रै बजेट हाल्ने अभिव्यक्ति दिएको विषयमा जबाफ माग गरेका थिए ।

बिहीबार दोस्रो चरणको बैठकमा मुख्यमन्त्री पाण्डेले जबाफ दिने कार्यसूचीअनुसार बैठक अघि बढाइए पनि संसद अवरुद्ध गर्ने नीतिका साथ एमालेका सांसदहरू अनुपस्थित भए । एमालेका साथसाथै नेमकिपा र राप्रपाका सांसदहरू बैठकमा थिएनन् ।

बिहीबारकै पहिलो बैठकमा भने नेमकिपा र राप्रपाका सांसदहरू उपस्थिति थिए । विपक्षीको प्रतिनिधित्व गर्दै विवेकशील साझा पार्टी सदनमा रहँदा सानुकुमार श्रेष्ठले बैठक अघि बढाएका थिए ।

एमालेको अवरोधले पहिलो बैठक स्थगित भएपछि प्रदेशसभा सचिवालयले २ बजेका लागि दोस्रो बैठक आह्वान गरेको थियो । तर, २ घण्टा ढिला गरी बैठक सुरु भएको थियो ।

एमाले बागमतीका सचेतक दीपक निरौलाले दोस्रो बैठकको सूचना ढिला गरी आएको र मुख्यमन्त्रीले बोल्ने जानकारी पनि नगराएकाले बैठकमा उपस्थिति नभएको बताए । ‘पहिलो बैठक स्थगित भएपछि हामी हिँडिसकेका थियौँ । सबै सांसदहरूले हेटौँडा छोडिसक्नुभएको थियो । मुख्यमन्त्रीले जबाफ दिनेबारे जानकारी पनि नगराएकाले बैठकमा सहभागी हुन सकेनौँ,’ निरौलाले भने ।

सचेतक निरौलाले मुख्यमन्त्री पाण्डेले गल्तीको माफी नमागेसम्म सदन अवरुद्ध गर्ने बताए । मन्त्रालय विभाजनको औचित्य पुष्टि गर्दै सुरुङमार्ग र विद्युतीय बस सञ्चालन रद्द गर्ने निर्णय फिर्ता लिनुपर्ने उनको भनाइ छ । उनले सदनको ठूलो दलको अनुपस्थितिमा संसद बैठक अगाडि बढाउन खोजे अर्को दुर्घटना निम्तिने चेतावनीसमेत दिए ।

बिहीबारकै पहिलो बैठकमा एमालेले सदन अवरुद्ध गरेपछि सभामुख श्रेष्ठले बैठक स्थगित गरेका थिए । यद्यपि, पहिलो बैठकमा मुख्यमन्त्री पाण्डे अनुपस्थित थिए ।

एमाले सांसद केशवराज पाण्डेले सदनमा बोल्दै मुख्यमन्त्रीले जबाफ दिनुपर्ने ठाउँमा आफैँ अनुपस्थित भएको भन्दै बैठक अघि बढ्न नसक्ने बताएका थिए । ‘सदनको ठूलो दल एमालेले प्रश्नहरू उठाउँदा मुख्यमन्त्रीले जबाफ दिनुपर्ने डरले बैठकमा उपस्थिति हुनुभएन । यो अवस्थामा बैठक अगाडि बढाउन मिल्दैन,’ पाण्डेले भनेका थिए ।

दोस्रो बैठकमा मुख्यमन्त्रीले सदनमा उठेका जबाफ दिने कार्यसूची सभामुखले हटाएका थिए । कार्यव्यवस्था परामर्श समितिले मुख्यमन्त्रीले जबाफ दिने निर्णय गरे पनि सभामुखले सदनमा उक्त कार्यसूची प्रस्तुत नगरेको नेकपा माओवादी केन्द्रका एक सांसदले बताए ।

सभामुखले जबाफ दिने कार्यसूची हटाएपछि मुख्यमन्त्री पाण्डेले बैठकमै उठेर सदनमा उठेका प्रश्नहरूको जबाफ दिन समय मागेका थिए । पाण्डेले बोल्दाबोल्दै सभामुखले रुलिङ गर्दै जबाफ दिने कार्यसूची नभएको बताइरहेका थिए ।

एमालेले लाञ्छना बोकेर हिँड्योः मुख्यमन्त्री पाण्डे

सदनमा जबाफ दिने क्रममा मुख्यमन्त्री पाण्डेले एमालेले आफूमाथि लाञ्छना बोकेर हिँडेको आरोप लगाएका छन् । एमालेले केन्द्रको सिको प्रदेशमा गरिरहेको भन्दै प्रश्न उठाएर एमालेका सांसद सदनमा उपस्थिति नभएकोमा पाण्डेले आपत्ति जनाए ।

‘मूख्यमन्त्रीमाथि लाञ्छना बोकेर हिँड्नु राम्रो होइन । मैले आफ्नो प्रष्टीकरण दिन पाउनुपर्छ,’ पाण्डेले भने । उनले उठेका प्रश्नहरूको जबाफ दिने कार्यसूची भए पनि सभामुखले हटाएकोमा आपत्ति जनाएका थिए ।

मुख्यमन्त्री पाण्डेले बजेट अभावका कारण सुरुङमार्गको योजना हटाएको बताएका छन् । सडक पूर्वाधार राम्रो नभएको र चार्जिङ स्टेशनसमेत निर्माण भइनसकेका कारण विद्युतीय बस सञ्चालनको योजना रोकेको पाण्डेको भनाए छ ।

५६ दिने मुख्यमन्त्रीलाई १२९० दिन सरकार चलाएका डोरमणि पौडेलले काम गरेन भनेर प्रश्न गर्नु हास्यापद भएको प्रतिक्रिया पाण्डेले दिएका छन् । उनले एमालेकै सरकारको पालामा १२ वटा मन्त्री रहेको बताए ।

प्रकाशित मिति: बिहीबार, पुस ८, २०७८ २०:१६