तीन प्रदेशका गन्तव्य जोड्न ‘स्वर्ण त्रिकोण’

A+ A A-

हामीले पोखरा, चितवन र लुम्बिनीलाई जोडेर 'स्वर्ण त्रिकोण' (गोल्डेन ट्रेङ्गल) को अवधारणा ल्याएका छौँ । यो अवधारणाले आन्तरिक तथा अन्तर्राष्ट्रिय पर्यटकलाई पोखरा (गण्डकी प्रदेश), भरतपुर (बागमती प्रदेश) र लुम्बिनी (लुम्बिनी प्रदेश) भ्रमण गर्न उत्प्रेरित गर्नेछ ।

पोखरा पर्यटकीय राजधानी हो, जुन अन्तर्राष्ट्रिय पर्यटकले असाध्यै मन पराएको स्थान हो । पोखराबाट हिमाल देखिनुका साथै यहाँ फेवाताल, प्याराग्लाइडिङ, जिप फ्लाइङका सुविधाहरू पनि छन् । मौसमको हिसाबले पनि पोखरा रमाइलो ठाउँ हो । चितवन जहाँ विश्व सम्पदा सूचीमा सूचिकृत चितवन राष्ट्रिय निकुञ्ज छ । हात्ती चढेर बाघ, गैँडा हेर्न जाने जुन कन्सेप्ट छ, त्यसलाई जोड्ने योजना हो गोल्डेन ट्रेङ्गल ।

पोखराको सराङकोटमा प्याराग्लाइडिङ उडान गरिँदै । तस्वीरः अनुप/शिलापत्र

हामीले अगाडि सारेको अवधारणाले लुम्बिनीमा रहेका मायादेवी मन्दिर, राजा शुद्धोधनको दरबार तिलौराकोट, रामग्रामसँग पोखरा र चितवन जोडिन्छ । पोखरालाई विश्वसम्पदा सूचीमा सूचिकृत भएका दुईवटा ठाउँहरू (चितवन राष्ट्रिय निकुञ्ज र लुम्बिनी)लाई जोड्ने र यसलाई पर्यटकहरूले साँच्चै नै जिन्दगीभरको अविस्मरणीय अनुभव सँगाल्ने स्वर्ण त्रिकोणको रूपमा विकास गर्ने अवधारणाको रूपमा अघि सारेका छौँ ।

पोखरा, भरतपुर र लुम्बिनीको बीचमा पनि धेरै पर्यटकीय आकर्षण भएका क्षेत्र छन् । उदाहरणका लागि पोखराबाट भरतपुर जाँदा नवस्थापित गन्तव्य मानहुँकोट छ । देवघाट पनि बाटोमै पर्छ । भरतपुरको भूमि सकेर लुम्बिनी जाँदा बीचमा शाश्वत् धाम छ, जटायु रेस्टुरेन्ट, दाउन्ने मन्दिर छ ।

लुम्बिनी भ्रमण सकेर पोखरा आउँदा तानसेन छ । नेपालको ताजमहल भनेर चिनिने रानीमहल, पाल्पाकै भैरव मन्दिरमा एसियाकै सबैभन्दा ठूलो त्रिशुल छ । यी सबै ठाउँलाई प्रवर्द्धन गर्न, कोरोना महामारीले असाध्यै थिलथिलो भएको पर्यटन क्षेत्रलाई आन्तरिक र अन्तर्राष्ट्रिय पर्यटकमार्फत उकास्न ‘स्वर्ण त्रिकोण’ अवधारणालाई अघि सारेका हौँ ।

पर्यटन व्यवसायीलाई हामीले यो अवधारणामा आधारित रहेर प्याकेज बनाउन पनि आग्रह गरेका छौँ । ६ दिन ७ रात लाग्न सक्छ कि, त्योभन्दा बढी हुन्छ वा समय नभए हवाईमार्गबाट जान्छु भन्यो भने पोखराबाट भरतपुर सिधा उडान छ । त्यस्तै, भरतपुरबाट लुम्बिनी र लुम्बिनीबाट सिधै पोखरा हवाई सम्पर्क छ । छोटो समय भएका पर्यटकलाई पनि यसमा आकर्षण गर्न सकिन्छ ।

सूर्यास्त हेर्न चितवनको गोलाघाट पुगेका पर्यटकहरू । तस्वीरः अनुप/शिलापत्र

चरा पर्यटनमा रुचि भएका स्वदेशी वा विदेशी पर्यटकले नवलपुरको जटायु रेस्टुरेन्ट अवलोकन गर्न सक्छन् । चरा हेर्नकै लागि चितवन आफैँमा राम्रो ठाउँ हो । लुम्बिनीको जगदीशपुर ताल पनि अद्भुत छ । पर्यटकलाई धार्मिक चासो भए देवघाट, शाश्वत् धाम र बुद्ध जन्मस्थल लुम्बिनी जान सक्नुहुन्छ । कसैलाई साहसिक पर्यटनमा रुचि भए पोखरामा हामीसँग प्रशस्त साहसिक गतिविधि छन् । त्यस्तै, चितवनमा जंगल सफारी छ । चाहे परिवारमा यात्रा गर्दै गरेका परिवार हुन् वा विद्यार्थीहरू वा विशुद्ध पर्यटकीय हिसाबले हिँड्ने पर्यटकहरू, सबैका लागि स्वर्ण त्रिकोण आकर्षक प्याकेजको रूपमा पर्यटन व्यवसायीले विकास गर्नुहुन्छ भन्ने विश्वास छ ।

भण्डारी नेपाल पर्यटन बोर्ड, गण्डकीका प्रमुख हुन् ।

प्रकाशित मिति: बिहीबार, पुस ८, २०७८ ०७:४२