राष्ट्रिय परिचयपत्र नम्बर लिन राति ३ बजेदेखि लाइन, सेवाग्राही भन्छन्– ‘२ मिनेटमा हुने काम ३ दिन लाग्यो’

राष्ट्रिय परिचयपत्र नम्बर लिन राति ३ बजेदेखि लाइन, सेवाग्राही भन्छन्– ‘२ मिनेटमा हुने काम ३ दिन लाग्यो’

A+ A A-

रोल्पाका गोविन्द परियार बिहान ३ बजे नै काठमाडौं जिल्ला प्रशासनअगाडि आएर लाइनमा उभिए । उनी वैदेशिक रोजगारीमा जाने सोच बनाएर पासपोर्ट बनाउन एक साताअघि काठमाडौं आएका हुन् ।

परियारले भने, 'राहदानी बनाउन अनिवार्य राष्ट्रिय परिचयपत्र चाहिँदो रहेछ । त्यही भएर आइतबारदेखि राष्ट्रिय परिचयपत्र बनाउन काठमाडौं जिल्ला प्रशासन कार्यालयमा टोकन लिनका लागि धाएको छु ।'

‘आइतबारदेखि टोकन लिन आए पनि पाएको छैन । कहिले १ सय ५० जनालाई टोकन बाँडेर बन्द भयो भन्छन् । कहिले के मिलेन भनेर फर्काउँछन् । राष्ट्रिय परिचयपत्रको टोकन नम्बर लिन नै तीन दिन धाएँ,’ उनले भने, ‘अनलाइनबाट दुई मिनेटमा हुने काम कार्यालय धाएर तीन दिन लाइनमा उभिनुपर्छ । सरकारी कार्यालयका सबै काम अनलाइनबाटै हुन्छ भन्छन् तर, त्यो कुरा व्यवहारमा लागू भएन ।’

परियारजस्तै धादिङकी दीपा तामाङ पनि राष्ट्रिय परिचयपत्र बनाउन बिहान ३ बजे नै आएर लाइनमा बसेकी छिन् । उनले अध्ययनका लागि जापान जान राहदानी बनाउन लागेको सुनाइन् ।

बिहान नआए पालो नपाइने सुनेर बिहानै कंलकीदेखि साथीसँग टोकन लिन आएको दीपाले बताइन् । ‘अनलाइनबाट हुने काम भए पनि टोकन लिन लाइनमा बस्नुपरेको छ । अनलाइनबाट राष्ट्रिय परिचयपत्र लिन फारम भर्दा २ देखि ५ मिनेटमा काम हुन्छ । तर, टोकन लिन दुई दिनदेखि धाउनुपर्‍यो,’ उनले भनिन्, ‘राष्ट्रिय परिचयपत्र नम्बर नभए राहदानी बन्दैन । राहदानी छिटो चाहिएका कारण राष्ट्रिय परिचयपत्र नम्बर लिनुपर्ने बाध्यता छ ।’

अनलाइनको जमानामा टोकन लिनका लागि समेत भौतिक रूपमा उपस्थित हुनुपर्दा समस्या भएको उनको तर्क छ । तामाङ र परियारजस्तै काठमाडौं जिल्ला प्रशासनअगाडि दैनिक ५ सयभन्दा धेरै सेवाग्राहीको भिड लाग्ने गरेको छ । ५ सयभन्दा बढी सेवाग्राही लाइनमा बसे पनि कार्यालयले दिनमा १ सय ५० वटासम्म मात्र टोकन वितरण गर्दै आएको छ ।

कार्यालयका सूचना अधिकारी उमाकान्त अधिकारीका अनुसार सेवाग्राहीको मागभन्दा पनि चुस्त गतिमा काम गर्ने गरी टोकन विवरण गरिँदै आएको हो । राष्ट्रिय परिचयपत्र बनाउनेहरूको भिड बढ्दै गएपछि समयतालिका मिलाएर टोकन वितरण गर्न थालिएको र सेवाग्राहीका मागअनुसार सकेसम्म छिट्टै काम गर्दै आएको उनको भनाइ छ ।

सरकारले गत १ मंसिरदेखि विद्युतीय पासपोर्ट (इ–पासपोर्ट) बनाउँदा राष्ट्रिय परिचयपत्र अनिवार्य गरेको छ । राष्ट्रिय परिचयपत्र दर्ता नम्बर नभएका व्यक्तिले राहदानी बनाउन निवेदन दिनसमेत पाइँदैन ।

मंसिर महिनायता काठमाडौं जिल्ला प्रशासन कार्यालय र देशभरका जिल्ला प्रशासन कार्यालयअगाडि राष्ट्रिय परिचयपत्र बनाउन सेवाग्राहीको भिड लाग्ने गरेको छ ।

ई–पासपोर्ट बनाउने सेवाग्राहीले सबै प्रक्रिया पूरा गरेपछि तत्काल राष्ट्रिय परिचयपत्र नम्बर मात्र वितरण गर्दै आएको पञ्जीकरण विभागका निर्देशक युवराज कट्टेलले बताए । देशभरका सबै जिल्लाबाट राष्ट्रिय परिचयपत्रको नम्बर वितरण भइरहेको छ । तर, राहदानी बनाउन धेरै व्यक्ति काठमाडौं आएका कारण मात्र यहाँ भिड बढेको उनको भनाइ छ ।

विभागले हाल ८० हजार मात्र राष्ट्रिय परिचयपत्र वितरण भएको र चालु आर्थिक वर्षभित्र ३० लाख राष्ट्रिय परिचयपत्र वितरण गर्ने लक्ष्य राखेको छ । ई–पासपोर्ट बनाउने सेवाग्राहीको मागलाई मध्यनजर गरेर राष्ट्रिय परिचयपत्रको नम्बर द्रुतगतिमा वितरण सबै जिल्लाबाट भइरहेको उनले जानकारी दिए ।

प्रकाशित मिति: मंगलबार, पुस ६, २०७८ १७:०३