एसईईको प्रश्नपत्र छपाइमा अन्योल : गतसालकै प्रयोग गर्ने कि नयाँ छाप्ने ?

A+ A A-

राष्ट्रिय परीक्षा बोर्डले एसईईको प्रश्नपत्र छपाइको काम अझै सुरु गरेको छैन । गतसालकै पुराना प्रश्नपत्र प्रयोग गर्ने या नयाँ छाप्ने भन्ने टुंगो नलाग्दा बोर्डले प्रश्नपत्र छाप्ने सुरसार गरेको छैन ।

अघिल्ला वर्षहरूमा कात्तिकबाटै प्रश्नपत्र छपाइको काम सुरु हुन्थ्यो । यस वर्ष पुस महिना लागिसक्दा पनि प्रश्नपत्र छपाइबारे बोर्डले निर्णयसमेत गर्न सकेको छैन ।

राष्ट्रिय परीक्षा बोर्डको एसईईतर्फका परीक्षा नियन्त्रक रुद्र अधिकारीका अनुसार बोर्डसँग गतसालकै प्रश्नपत्रहरू पर्याप्त रहेकाले प्रश्नपत्र छाप्न हतार नगरिएको हो । आवश्यक परेको अवस्थामा पोहोर एसईईका लागि छापिएको प्रश्नपत्र प्रयोग गर्न सकिने उनले बताए ।

कोरोना महामारीका कारण गतसाल एसईई परीक्षा भएको थिएन । सोही प्रश्नपत्र यस वर्ष प्रयोग गर्न सकिने अधिकारीको दाबी छ । गतवर्ष एसईईका लागि २ करोड २८ लाख रुपैयाँ खर्चेर बोर्डले ५१ लाख ७४ हजार सेट प्रश्नपत्र छापेको थियो ।

‘हामीसँग रहेका पोहोरकै प्रश्नपत्र प्रयोग गर्न सकिने अवस्थामा छ । गतसाल नछापिएका अन्य सेटहरू पनि प्रयोगमा ल्याउन सकिन्छ । त्यसैले नयाँ सेट बनाउनुपर्ने दबाब पनि छैन,’ अधिकारीले भने, ‘प्रश्नपत्रको त्यति ठूलो समस्या हुँदैन । बरु कहिले गर्ने, के गर्ने भनेर बोर्डले निर्णय दिनुपर्‍यो । हामी सधैँ तयार नै छौँ ।’

आगामी वर्षदेखि नयाँ पाठ्यक्रम लागू हुने भएकाले पनि प्रश्नपत्रको नयाँ सेट बनाउनुपर्ने दबाब नरहेको अधिकारी बताउँछन् । उनका अनुसार अघिल्लो वर्षमा भने प्रश्नपत्र बाहिरिएको वा ‘इमर्जेन्सी’ चाहिन सक्ने अवस्थालाई ध्यानमा राखेर प्रश्नपत्रका अतिरिक्त ‘सेट’ तयार गर्नुपर्ने बाध्यता थियो ।

‘पहिलाचाहिँ प्रश्नपत्रका सेटहरू धेरै बनाउनुपर्ने हुँदा अगाडिबाटै तयारी थालिन्थ्यो । तर, चालु पाठ्यक्रमका लागि यस वर्ष अन्तिम भएकाले पुरानै प्रश्नपत्रले पनि काम दिन्छ । बोर्डले निर्णय गरेको अवस्थामा हामी काम गर्न तयार छौँ,’ उनले भने ।

राष्ट्रिय परीक्षा बोर्डका प्रवक्ता जंगबहादुर अर्याल पनि पुरानै सेट प्रयोगमा आउन सक्ने बताउँछन् । यद्यपि यसबारे बोर्डले औपचारिक निर्णय नगरेको उनले बताए । नयाँ, पुरानो जुनै प्रश्नपत्र छाप्नुपरे पनि बोर्डले समयमै काम सक्ने उनको भनाइ छ ।

‘पोहोरकै प्रयोग गर्ने या नयाँ प्रश्नपत्र तयार गर्ने भन्ने विषयमा निर्णय भएको छैन । समय आएपछि हामी निर्णय दिन्छौँ । हाम्रोतर्फबाट हुनुपर्ने काम रोकिँदैन’, अर्यालले शिलापत्रसँग भने ।

प्रकाशित मिति: आइतबार, पुस ४, २०७८ १९:१५