रुखमा बाँधेर टाउकाे छिनालेकाे अवस्थामा युवककाे शव, अडियाे फेला

A+ A A-

कैलालीमा भूपेन्द्र बडुवाल हत्या प्रकरण सेलाउन नपाउँदै फेरि अर्काे हत्या भएको छ । जानकी गाउँपालिका वडा नम्बर ९ का २५ वर्षीय अरुण दासको बीभत्स ढंगले हत्या गरिएकाे अवस्थामा शव फेला परेकाे हाे ।

वडा नम्बर ९ कै अमरावती सामुदायिक वनमा रुखमा बाँधेर टाउकाे छिनालेकाे अवस्थामा उनकाे शव फेला परेकाे प्रहरीले जनाएकाे छ ।

जिल्ला प्रहरी कार्यालय कैलालीका प्रहरी प्रमुख एसपी विश्व अधिकारीले युवकको शव जंगलमा घाँटी रेटिएको अवस्थामा फेला परेको बताए । एसपी अधिकारीका अनुसार दासको बीभत्स ढंगले हत्या गरिएको छ । उनलाई सुरुमा रुखमा बाँधेर नग्न बनाइएको छ । त्यसपछि घाँटी रेटेर टाउको अलग पारिएकाे छ ।

एसपी अधिकारीसहित प्रहरी टोली अनुसन्धानका लागि शनिबार नै तालिमप्राप्त कुकुरसहित घटनास्थल पुगेको थियो । अहिले पनि प्रहरी घटनास्थलमै खटिएको छ । मृतकका आमा-बुवा भारतबाट आइरहेका छन् । शव घटनास्थलमै छ ।

यस्तै, घटनापछिको फोन रेकर्ड पनि प्रहरीले फेला पारेको छ । हत्यापछि दुई युवकबीच भएको फोन रेकर्ड बाहिरिएको हो । एसपी अधिकारीका अनुसार फोन रेकर्ड सुन्दा आपसी विवादमा हत्या भएको देखिन्छ ।

‘हत्यापछिको अडियो रेकर्ड फेला पारेका छौँ,’ एसपी अधिकारीले भने, ‘घटनाको अनुसन्धान भइरहेको छ ।' फोन रेकर्डमा आफूलाई मनोज भनेर परिचय गराएका युवकले एक जनाको घाँटी रेटेर टाउको छिनालिएको बताएका छन् ।

फोन रेकर्डमा मनोजले भनेका छन्, ‘घाटी अलग छ । शरीर अलग छ । एक-दुई दिनमा तपाईँ थाहा पाउनुहुन्छ ।’ मनोजले नेपालगञ्जको रुपैडिया नाकाहुँदै भारत गइरहेको समेत फोनमा बताएका छन् । अहिलेसम्म कसैलाई नियन्त्रणमा भने नलिएकाे प्रहरीले जनाएकाे छ ।

गएकाे २३ कात्तिकमा लम्कीचुहा नगरपालिका– ३ का २३ वर्षीय भूपेन्द्र बडुवालको धारिलो हतियार प्रहार गरेर हत्या भएको थियो । कैलालीमा एकपछि अर्को हत्या हुन थालेपछि स्थानीयवासी त्रसित बनेका छन् ।

प्रकाशित मिति: आइतबार, पुस ४, २०७८ १२:३४