माओवादी केन्द्र लुम्बिनीको अध्यक्षमा सुदर्शन बराल, सचिवमा महरा र जनार्दनको लबिङ

माओवादी केन्द्र लुम्बिनीको अध्यक्षमा सुदर्शन बराल, सचिवमा महरा र जनार्दनको लबिङ

A+ A A-

नेकपा माओवादी केन्द्रको लुम्बिनी प्रदेश अध्यक्षमा गुल्मीका सुदर्शन बराल सर्वसम्मत भएका छन् । नेतृत्व दाबी गर्नेहरूले अडान नछोडेपछि माओवादी केन्द्रको लुम्बिनी प्रदेश अधिवेशनले पदाधिकारी टुंगो लगाउन सकेको थिएन । मंसिर २५ र २६ गते भएको प्रदेश अधिवेशनले अध्यक्षसहितका पदाधिकारी टुंग्याउन नसकेपछि २१७ सदस्यीय कमिटी चयन गरेको थियो ।

सोही प्रदेश कमिटीले अध्यक्षमा बराललाई चयन गरेको हो । अन्य पदाधिकारी भने अझै टुंगिएको छैन । प्रदेश कमिटी र केन्द्रीय नेतृत्वबीच बराल अध्यक्ष हुने विषयमा सहमति भए पनि अन्य पदाधिकारी टुंगिन बाँकी रहेकाले लिखित निर्णय नभएको एक नेताले बताए ।

लुम्बिनी प्रदेशमा शंकर पोखरेल नेतृत्वको सरकारमा सामाजिक विकास मन्त्रीसमेत रहेका बराल माओवादी नेता कृष्णबहादुर महरा र वर्षमान पुनको प्रस्तावमा अध्यक्ष बनेका हुन् ।

उनी प्रदेशमा पुन निकट नेता मानिन्छन् । माओवादीमा लुम्बिनी प्रदेश अध्यक्षमा रोल्पाका दिपेन्द्र पुन र दाङका होमराज शर्माले दाबी गर्दै आएका थिए । उनीहरू दुवै जना २ सय १७ सदस्यीय प्रदेश कमिटीको सदस्यमै नपरेपछि बराल सर्वसम्मत भएका हुन् ।

माओवादीले प्रदेश समितिमा तीन उपाध्यक्ष, एक सचिव, तीन सहसचिव र एक कोषाध्यक्ष रहने व्यवस्था गरेको छ । तीन उपाध्यक्षमा बाँकेका आइपी खरेल, रुकुमकी जुनकुमारी रोक मगर, कपिलवस्तुका रुद्र बञ्जाडेको दाबी छ ।

त्यस्तै सचिवमा दाङका तुलसीराम पुन, लुमाकान्त न्यौपाने, बर्दियाका दुर्गाबहादुर थारु, रोल्पाका निमकान्त डागी, प्युठानका प्रकाश अधिकारीले पनि दाबी गर्दै आएका छन् ।

सचिवका लागि माओवादी प्रवक्ता महराले तुलसीराम पुनलाई अघि सारेका छन् । तर, अर्थमन्त्रीसमेत रहेका नेता जनार्दन शर्माले लुमाकान्त न्यौपानेलाई बनाउन खोजेपछि टुंगो लाग्न सकेको छैन ।

प्रकाशित मिति: बिहीबार, पुस १, २०७८ १५:३३