क्यानले किन गर्‍यो कप्तानसहित चार खेलाडीलाई कारबाही ? ज्ञानेन्द्र भन्छन्- म सार्वजनिक रूपमै बोल्छु

क्यानले किन गर्‍यो कप्तानसहित चार खेलाडीलाई कारबाही ? ज्ञानेन्द्र भन्छन्- म सार्वजनिक रूपमै बोल्छु

A+ A A-

नेपाल क्रिकेट संघ (क्यान)को बुधबारको एउटा निर्णयले क्रिकेट खेलाडीमा ठूलो तरंग ल्याएको छ । क्यानले नेपाली राष्ट्रिय क्रिकेट टिमका कप्तान ज्ञानेन्द्र मल्ललाई जिम्मेवारीबाट हटाएर उनको ठाउँमा सन्दीप लामिछानेलाई कप्तान बनाएकाे छ ।

मल्लसहित उपकप्तान दीपेन्द्रसिंह ऐरीको पनि जिम्मेवारी खाेसिएकाे छ । त्यस्तै, टिमका ‘मेडियम फास्ट बलर’ सोमपाल कामी र कमलसिंह ऐरीलाई समेत कारबाही गरिएकाे छ ।

बुधबार बसेको क्यानको बोर्ड बैठकले कप्तानको जिम्मेवारी लामिछानेलाई दिने र अन्य खेलाडीलाई कारबाही गर्ने निर्णय गरेको हो । क्यानको कारबाहीसँगै मल्लसहित चार खेलाडीले सन् २०२२ को सेन्ट्रल कन्ट्रयाक्टमा सुरुको ६ महिनाका लागि सहभागी हुन नपाउने भएका छन् ।

खेलाडी वर्गीकरणमा असन्तुष्टि जनाउँदै मल्लसहितका ती खेलाडीले क्यानविरुद्ध मिडियाबाजी गरेको भन्दै क्यानले कारबाही गरेको हो । यसअघि क्यानले उनीहरूसँग स्पष्टीकरणसमेत साेधेकाे थियो । स्पष्टीकरण चित्तबुझ्दो नआएकाे भन्दै निर्मम कारबाही गरिएकाे हाे ।

कप्तान मल्लसहित दिपेन्द्र ऐरीहरूले क्यानविरुद्ध मिडियामा बोलेको कुराबारे क्यानका कार्यवाहक सचिव प्रशान्त मल्लको नेतृत्वमा समिति बनाएरै छानबिन गरिएकाे थियो ।

उक्त समितिले कप्तान मल्लसहित दिपेन्द्र ऐरी, सोमपाल कामी र कमल ऐरीले क्यानविरुद्ध सार्वजनिक रूपमा बोल्दै जानु खेलाडी अनुशासनकाे गम्भीर उल्लंघन भएको ठहर गर्दै प्रतिवेदन दिएपछि उनीहरू कारबाहीमा परेका हुन् । सचिव मल्लले भने, ‘क्यानविरुद्ध सार्वजनिक रूपमा बोलेको विषयबारे केही गल्ती महसुस गरेका छन् कि भनेर हामीले कारबाहीको प्रक्रिया राेकेका थियाैँ । तर, उनीहरूले छुट्टाछुट्टै मागेको स्पष्टीकरणको सामूहिक रूपमा जवाफ दिए । र, क्यानविरुद्ध बोल्नु ठीक हो भन्ने आशय दिए । त्यो खेलाडीको अनुशासनमा पर्ने कुरा थिएन ।’

अनुशासनको विषयमा क्यानले खेलबाट प्रतिबन्ध लगाउन सक्ने अधिकार रहे पनि उनीहरूलाई खेल्ने मौका भने दिइएको उनी बताउँछन् । क्यानले सन् २०२२ को सेन्ट्रल कन्ट्रयाक्टको ग्रेडिङ गर्न गत वैशाखमा एउटा समिति बनेको थियो । उक्त समितिले कुन तहमा कुन खेलाडीलाई राख्ने भन्ने अध्ययन गरेको थियो । जसमा ‘ए’ ‘बी’ र ‘सी’ गरेर राष्ट्रिय क्रिकेट खेलाडीको वर्गीकरण गरेको थियो ।

त्यसैका आधारमा क्यानले कप्तान मल्ल र उपकप्तान ऐरीलाई ‘ए’, सोमपाल कामीलाई ‘बी’ तथा कमल ऐरीलाई ‘सी’ ग्रेडमा राखेको थियो । जसमा कामीबाहेक सबै खेलाडी ग्रेडिङमा सन्तुष्ट भए पनि कामीले भने असन्तुष्टि जनाएका थिए । कामीकै विषयमा कप्तान मल्लसहित उपकप्तान दिपेन्द्र र कमलले क्यानको वर्णीकरणका बारेमा मिडियामै असन्तुष्टि पोखेका थिए ।

त्यहीँ विषयले क्यान र उनीहरूबीच विवाद चुलिएको हो । सचिव मल्लले ग्रेडिङबारेको विवाद क्यानभित्रै खोज्नुपर्नेमा खेलाडी मिडियामा जानु नै दुःखद भएको बताए । ‘सोमपालबाहेक सबै खेलाडी ग्रेडिङको विषयमा सन्तुष्टै थिए । उहाँ आफू ‘बी’मा परेकोका असन्तुष्टि हो भने क्यानमा निवेदन दिन सक्नुहुन्थ्यो । त्यो गर्नु भएन । त्योबाहेक कप्ताल मल्लले ग्रेडिङको विषयमा क्यानको बैठकमा बोल्दा हुन्थ्यो । तर, एकैचोटि मिडियामा जानुभयो । त्यो राम्रो कुरा थिएन,’ मल्लले भने ।

क्यानका अध्यक्ष चतुरबहादुर चन्द पनि खेलाडीले अनुशासन उल्लंघन गर्दा कारबाही गर्न बाध्य भएकाे बताउँछन् । ‘धेरै कुरा मिडियामा आइनै सक्यो । कारबाहीको प्रमुख कारण अनुशासन नै हो । क्यानकाे आफ्नो नियम छ । खेलाडीले सार्वजनिक रूपमा बोल्दा क्यानको अनुमति लिनैपर्छ,' उनले भने, 'क्यानप्रति केही असन्तुष्टि छ भने बैठकमा कुरा राख्दा हुन्छ । तर, क्यानविरुद्ध सार्वजनिक रूपमा बोल्नु खेलाडीको अनुशासनभित्र पर्दैन ।’

क्यानले समितिको अध्ययनका आधारमा ग्रेडमा राख्दा पछिल्लो एक वर्षमा खेलको अन्तर्राष्ट्रिय खेलदेखि त्यसमा गरेको पर्फमेन्स, अनुशासनलाई आधार मानेर ग्रेड छुट्याएको थियो । जसमध्ये कामीको पछिल्लो वर्षको पर्फमेन्स अन्य वर्षको तुलनामा सन्तोषजनक नभएको क्यानको दाबी छ । क्यानले राष्ट्रिय टिममा परेका पाँच जना खेलाडीलाई ‘ए’, ६ जनालाई ‘बी’ र ७ जना खेलाडीलाई ‘सी’ ग्रेडमा राखेको थियो । ग्रेडका आधारमा खेलाडीको सेवासुविधा हुने गर्छ ।

कप्तान मल्लले भने क्यानको कारबाहीबारे सार्वजनिक रूपमै आफ्नो धारणा राख्ने भन्दै अहिले नै भने केही नबोल्ने बताए । ‘म यो कारबाहीबारे बोल्छु नै तर, अहिले हाेइन । म पछि बोल्छु,’ मल्लले भने ।

पूर्वक्रिकेट कप्तान एलबी क्षत्रीले भने खेलाडीकै कारण अहिले उकालो लाग्दै गरेको क्रिकेटमा खेलाडीलाई यसरी कारबाही गर्नु समग्र क्रिकेटका लागि दु:खद पक्ष भएको बताए ।

‘अनुशासन खेलाडीमा मात्रै लागू हुनु दुःखद कुरो हो । अझ हाम्रोजस्तो देशका क्यानसँग कुनै पूर्वाधार नभएको अवस्थामा खेलाडीकै कारण क्यानको महत्त्व छ,' क्षत्रीले भने, 'नेपालको क्रिकेटमा अन्तर्राष्ट्रिय क्रिकेट संघको जस्तो नियम राख्ने हो भने कुनै खेलाडी र पदाधिकारी नै बस्न सक्दैनन् ।’ क्यानको यो निर्णयले अन्य खेलाडीमा समेत नराम्रो असर पर्ने उनी बताउँछन् ।

प्रकाशित मिति: बिहीबार, पुस १, २०७८ १६:२५