बागमतीमा एकीकृत समाजवादीलाई दुई मन्त्री र एक राज्यमन्त्री

A+ A A-

बागमतीका मुख्यमन्त्री राजेन्द्रप्रसाद पाण्डेले मंगलबार सरकार विस्तार गरेका छन् । उनले संविधानको धारा १६८ को उपधारा ९ बमोजिम मन्त्री तथा राज्यमन्त्री थप गरेका छन् ।

स्रोतका अनुसार सरकारको नेतृत्व गरिरहेको एकीकृत समाजवादीबाट २ मन्त्री, एक राज्यमन्त्री नियुक्त भएका छन् ।

खानेपानी ऊर्जा तथा सिँचाइमन्त्रीमा एकीकृत समाजवादीका वसन्तप्रसाद मानन्धर र कृषि तथा पशुपन्छी विकासमन्त्रीमा समाजवादीकै वसुन्धरा हुमागाईं नियुक्त भएका हुन् । यसैगरी, कृषि तथा पशुपन्छी राज्यमन्त्रीमा एकीकृत समाजवादीकी इन्द्रमाया गुरुङ नियुक्त भएकी छन् ।

मुख्यमन्त्री पाण्डेले १५ मंसिरमा भौतिक पूर्वाधार विकास मन्त्रालय विभाजन गरेर खानेपानी, ऊर्जा तथा सिँचाइ मन्त्रालय र भूमि, व्यवस्था, कृषि तथा सहकारी मन्त्रालय फुटाएर कृषि तथा पशुपन्छी विकास मन्त्रालय बनाएका थिए । बागमतीमा कुल १४ वटा मन्त्रालय रहेकोमा मंगलबार सरकार विस्तारसँगै अब मुख्यमन्त्रीसहित ११ मन्त्री र एक राज्य मन्त्रीको सरकार बन्नेछ ।

मंगलबार माओवादी केन्द्र र एकीकृत समाजवादीबाट मात्रै मन्त्री नियुक्त भएका छन् । नेपाली कांग्रेसबाट पनि मन्त्री नियुक्त गर्ने तयारी गरे पनि कांग्रेसको महाधिवेशनका कारण तत्काल सम्भावना नभएको मुख्यमन्त्री तथा मन्त्रिपरिषद् कार्यालय स्रोतले जानकारी दिएको छ । पार्टीको महाधिवेशनपछि कांग्रेसबाट थप ३ जना मन्त्री र एक राज्यमन्त्री बन्नेछन् ।

कांग्रेसबाट सन्तोष चेपाङ भौतिक पूर्वाधार तथा योजना राज्यमन्त्री बन्नेछन् । कांग्रेसभित्र उनको नाममा सहमति जुटे पनि महाधिवेशनका कारण उनी तत्काल मन्त्री बन्न नपाएका हुन् ।

मुख्यमन्त्री पाण्डेले मंगलबार नै माओवादीका ३ जनालाई मन्त्री नियुक्त गरिसकेका छन् । श्रम, रोजगार तथा यातायात मन्त्री घनश्याम दहाल, वन तथा वातावरण मन्त्री विशाल खड्का र युवा तथा खेलकुदमन्त्री रत्नप्रसाद ढकाललाई नियुक्त गरिसकेका हुन् । नवनियुक्त मन्त्री तथा राज्यमन्त्रीको शपथ प्रदेश प्रमुखको कार्यालयमा साँझ ५ बजे तय गरिएको छ ।

मुख्यमन्त्री पाण्डेले ११ कात्तिकमा मुख्यमन्त्रीमा शपथ लिँदै चार सदस्यीय मन्त्रिपरिषद् विस्तार गरेका थिए । जसमा एकीकृत समाजवादीका कृष्णप्रसाद खनाल आन्तरिक मामिला तथा कानुनमन्त्री, कांग्रेसका कृष्णलाल भँडेल भौतिक पूर्वाधार विकासमन्त्री र माओवादीकी कुमारी मोक्तान सामाजिक विकासमन्त्री बनेकी थिइन् ।

पाण्डेले दोस्रो चरणमा माओवादी केन्द्र बागमतीको संसदीय दलका नेता शालिकराम जम्मकट्टेललाई आर्थिक मामिला तथा कानुनमन्त्री, कांग्रेसका निमा लामालाई स्वास्थ्यमन्त्री बनाएका थिए ।

प्रकाशित मिति: मंगलबार, मंसिर २८, २०७८ १६:५८