कांग्रेस नेतृत्व चयनका लागि प्रत्यासी र प्रतिनिधिमा देखिएको पुस्तान्तरणको आस

कांग्रेस नेतृत्व चयनका लागि प्रत्यासी र प्रतिनिधिमा देखिएको पुस्तान्तरणको आस

A+ A A-

सोमबार नेपाली कांग्रेसको नयाँ नेतृत्व चयनको निर्णयक दिन हो । देशभरबाट छानिएका ४७४३ महाधिवेशन प्रतिनिधिले मतदान मार्फत नेतृत्व चयन गर्दैछन् । कांग्रेसको निर्वाचन समितिले सोमबार बिहान ८ बजेदेखि साझ ५ बजेसम्म मतदानको समय तोकेको छ ।

कांग्रेस महाधिवेशनमा सहभागी महाधिवेशन प्रतिनिधि मात्र होइन विभिन्न पदमा उम्मेदवारी दिएकाहरूसमेत यसपटक कांग्रेसमा पुस्तान्तरण हुने आसमा छन् ।

भृकुटीमण्डपमा पत्रकारसँग कुरा गर्दै सभापतिका उमेदवार विमलेन्द्र निधिले कुनै हालतमा देउवालाई हराउनुपर्ने बताए । २६ वर्ष देउवासँग सहकार्य गरेका निधि यसपटक जसरी हुन्छ देउवालाई नेतृत्वबाट बिदा गर्नुपर्ने पक्षमा छन् । पहिलो चरणमा कसैले ५० प्रतिशत मत ल्याउन नसक्ने आँकलन गर्दै दोस्रो चरणको निर्वाचनमा देउवाविरुद्ध मोर्चा कस्ने रणनीति निधिको छ ।

‘दोस्रो चरणमा देउवाइतर पक्षबाट जसले बढी मत ल्याउँछ, सबैले उसैलाई सघाउँछौँ र जिताएर छाडछौँ’, निधिले भने ।

महाधिवेशनस्थलमा मतदातासँग मत माग्दै हिँडेका अधिकांश उम्मेदवारले नेतृत्व पुस्तान्तरणकै मुद्दा बोकेका थिए । १४औँ महाधिवेशनमा डा. शेखर कोइरालाको प्यानलबाट उपसभापतिका उम्मेदवार चन्द्र भण्डारीले पनि नेतृत्व पुस्तान्तरणको अभियान सफल पार्नुपर्ने बताए ।

कांग्रेसभित्र पुस्तान्तरणको बहस आफूहरूले नै भित्र्याएको भण्डारीको दाबी छ । यद्यपि पुस्तान्तरणसँगै समयसापेक्ष नयाँ विचार पनि आउनुपर्ने उनले बताए । ‘पुस्तान्तरणको बहसलाई हामीले अघि बढायौँ । मलाई लाग्छ यसले सफलता पाउँछ,’ उनले शिलापत्रसँग भने ।

महामन्त्रीका प्रतिस्पर्धी गगन थापा, मिनेन्द्र रिजाल र विश्वप्रकाश शर्मा पनि महाधिवेशन प्रतिनिधिसँग मत माग्दै हिँडिरहेका थिए । ‘मलाई देशभरका युवाको साथ छ, जित्नेमा ढुक्क छु,’ विश्वप्रकाश शर्माले भने ।

देउवा समूहबाट महामन्त्रीमा लडेका प्रदीप पौडेलले पनि नयाँ–पुरानो सबै पुस्ताबाट आफूले मत पाउने दाबी गरिरहे ।

उपसभापतिका अर्का उम्मेदवार महेश आचार्य पनि जित्नेमा आशावादी देखिन्थे । कुनै समूहमा नरहेका आचार्य स्वतन्त्र रूपमा मत मागिरहेका छन् । उनी भृकुटीमण्डपमा कार्यकर्तासँग बदाम खाँदै भलाकुसारी गरिरहेका भेटिए । उनको समूहमा जलवायु परिवर्तनदेखि अन्य विचारविमर्शको कुरा चलिरहेको थियो । अन्य नेतालेझैँ सकृय भएर आचार्यले मत मागिरहेको पाइएन ।

केही दिनअघि प्रदेश सभापतिमा गुरु घिमिरे पराजित बनेपछि आचार्य आलोचित बन्न पुगेका थिए । मतदानस्थलमा पुगेर पनि उनले भोट नहालेकोमा अधिकांश कार्यकर्ता उनीप्रति रुष्ट थिए । तिनै आचार्य हाल केन्द्रीय उपसभापतिको दौडमा छन् ।

यस्तै, केन्द्रीय सदस्यका प्रत्यासी प्रकाश रसाइली ‘स्नेही’ कांग्रेसमा धेरैपटक एउटै मान्छेले पद ओगटीराख्ने प्रवृत्तिको अन्त्य गर्न पुस्तान्तरण आवश्यक रहेको बताउँछन् । उनी संस्थापनइतर पक्षबाट सभापतिको उम्मेदवार रहेका शेखर कोइरालाको लागि मत मागिरहेका थिए ।

‘एउटै मान्छेले जीवनभर पद ओगटेर बस्ने कुरा राम्रो होइन । नेतृत्व परिवर्तन हुँदैमा सो समस्या हल भइहाल्ने पनि होइन । तर, नयाँ नेतृत्वले यसको लागि विशेष व्यवस्था गर्ने साहस देखाउनुपर्छ’, रसाइलीले शिलापत्रसँग भने ।

केन्द्रीय सदस्यका अर्का प्रत्यासी पुष्पा भुसाल भने नेतृत्व परिवर्तनको बहस मात्र पर्याप्त नभएको बताउँछिन् । नेतृत्व परिवर्तन मात्र भन्दा पनि कांग्रेसले सबैलाई समेटेर अघि बढ्नुपर्ने उनको मत छ । ‘आगामी निर्वाचनमा कसरी कांग्रेसलाई पहिलो पार्टी बनाउने भन्नेमा यो महाधिवेशनले दिशानिर्देश गर्दछ,’ उनी भन्छिन्, ‘त्यसैले सबै मिलेरै अगाडि बढ्नुपर्छ । नयाँ पुराना सबै पुस्ता मिलेर अघि बढ्न आवस्यक छ ।’

यसरी पुस्तान्तरणको बहसलाई लिएर भिन्नभिन्न आवाज भृकुटीमण्डपमा सुनिए । देउवाको पक्षमा मत माग्नेहरू पनि कम थिएनन् । यद्यपि अधिकांश नेताकार्यकर्ता भने कांग्रेस सुधारको लागि पनि नेतृत्व परिवर्तन अपरिहार्य रहेका बताउँछन् । यसपटक विगतमा भन्दा अधिकांश प्रतिनिधि युवा आएकोले पनि उनीहरू नेतृत्व परिवर्तन हुनेमा आशावादी थिए ।

काभ्रेबाट महाधिवेशन प्रतिनिधि बनेर आएका उस्पर सुनार यसपटक नयाँ पुस्ता नेतृत्वमा आउनेमा ढुक्क रहेको बताउँछन् । २६ वर्षीय उस्पर दोस्रो चरणमा जाने स्थिति आउने र त्यसबेला इतर पक्ष एक भएर देउवालाई हराउने विश्लेषण सुनाउँछन् ।

सर्लाहीबाट महाधिवेशन प्रतिनिधि बनेका हरिहर दुलाल पनि यसपटक देउवालाई नेतृत्वबाट बिदा गराउने सोचमा देखिन्छन् । उनका अनुसार उनको भोट सभापतिका प्रत्यासी शेखर कोइरालालाई जानेछ । ‘यसपटक देउवालाई हराउने नै हो । म पनि शेखरलाई सभापतिमा र महामन्त्रीमा गगन र विश्वप्रकाशलाई मत हाल्छु,’ उनले भने ।

संस्थापन इतरपक्षहरूले नेतृत्व परिवर्तनको आश गरिरहँदा भृकुटीमण्डपमा देउवा समूहको उपस्थिति पनि कम थिएन । अझ राना थारुलगायत सुदूरपश्चिमेली संस्कृति झल्किने पोसाक लगाएर मत माग्ने देउवा समूहकै थिए । देउवाले विगतका आन्दोलनमा गरेको त्यागबारे चर्चा गर्दै उनीहरूले देउवाका लागि भोट मागिरहेका थिए ।

कञ्चनपुरकी सुनिता चौधरी देउवाले आफ्नो भेगमा राम्रो काम गरेकोले उनैलाई जिताउनुपर्ने बताइन् । ‘मेरो ठाउँमा उहाँले राम्रो काम गर्नुभएको छ । पार्टीमा पनि सबैलाई मिलाएर निर्वाचनमा जाने क्षमता उहाँसँग छ । त्यसैले यसपटक शेरबहादुर देउवालाई,’ उनले भनिन् ।

प्रकाशित मिति: आइतबार, मंसिर २६, २०७८ २३:०४