मलेसियामा मजदुर आन्दोलित : माग सम्बाेधन भए विदेशीलाई फाइदा

A+ A A-

मलेसियामा विभिन्न क्षेत्रमा कार्यरत देश-विदेशका श्रमिक तलब बढाउन माग गर्दै आन्दोलनमा उत्रेका छन् । उनीहरू सन् २०२२ देखि मासिक तलब १५ सय रिङ्गेट, ३ सय रिङ्गेट भत्ता र सामाजिक सुरक्षा संस्था (सोसल सेक्युरिटी अर्गनाइजेसन) मा अनिवार्यताको माग गर्दै सडक आन्दोलनमा उत्रिएका छन् ।

तलब वृद्धि, सोक्सोमा दर्ता र भत्ताको माग गर्दै मलेसियन ट्रेड युनियन कांग्रेस नेतृत्वमा मजदुरहरू सडकमा उत्रिएका हुन् । हाल, मलेसिया सरकारले स्वदेशी तथा विदेशी कामदारका हकमा न्यूनतम मासिक १२ सय रिङ्गेट तोकेको छ । कोरोना महामारीका कारण रोजगारी गुमेका र महँगी बढेका कारण तलब वा भत्ता वृद्धिको माग गर्दै श्रमिक आन्दोलनमा उत्रिएको मलेसियाली सञ्चारमाध्यमहरूले जनाएका छन् ।

मलेसियाका मुख्य शहरमा शुक्रबारदेखि देश–विदेशका श्रमिक आन्दोलनमा उत्रिँदा श्रम र रोजगारी क्षेत्र समेत प्रभावित भएको छ । पछिल्लो समय दैनिक बढिरहेको महँगीले श्रमिकको जनजीवन सञ्चालनमा संकट उत्पन्न हुने र उनीहरूमा परिवारिक समस्यासमेत सिर्जना हुने समस्या रहेकाे मलेसियन ट्रेड युनियन कांग्रेसका महासचिव कामारूल बहारिन मन्सुरले औँल्याएका छन् ।

उनले मलेसियामा सन् २०२० देखि नै श्रमिक संगठनहरूले तलब वृद्धिको माग गर्दै आए पनि सरकारले वेवास्ता गरिरहेको आरोप लगाए । विगतमा कोरोनाको कारणले श्रम र रोजगारी क्षेत्र ठप्प भएका कारण तलब वृद्धिको विषय रोकिएको थियो ।

मलेसियन ट्रेड युनियन कांग्रेसले राष्ट्रिय तलब परामर्श परिषद्मार्फत राष्ट्रिय श्रम सल्लाहकार परिषदमा सरकार, रोजगारदाता र कर्मचारीबीच मजदुरको तलब सुविधा बढाउने विषयमा त्रिपक्षीय छलफलकाे माग समेत गरेकाे छ । याे विषयमा मलेसिया सरकारले केही प्रतिक्रिया दिएको छैन ।

मलेसियाका मजदुर संगठनहरूले प्रत्येक २ वर्षमा न्यूनतम पारिश्रमिकको पुनरावलोकन हुनुपर्ने, विदेशी कामदारको श्रम सम्झौता अनुसार सेवा सुविधा हेरफेर गर्नुपर्ने, रोजगारीको ग्यारेन्टीसहित रोजगारीका लागि करार जारी गर्नुपर्ने, सोक्सो, बीमा, महिला कामदारको सुरक्षा र मलेसियामा देश–विदेशका कामदारका हकमा वृद्धि हुने तलब तत्काल परिमार्जन गर्नुपर्ने माग राख्दै आएका छन् ।

मलेसियामा सन् २०११ यता विभिन्न माग राख्दै मजदुर सरकारविरुद्ध आन्दोलन गर्दै आएका छन् । सन् २०१५ मा ५ लाखभन्दा बढी देश–विदेशका श्रमिक आन्दोलनमा उत्रिएका थिए ।

आन्दोलनले विदेशी कामदारलाई फाइदा

मलेसियामा हाल चलिरहेको आन्दोलनको सरकारले सम्बोधन गरे विदेशी कामदारलाई फाइदा पुग्ने देखिएकाे छ । अहिले आन्दोलनमार्फत श्रमिकले माग गरेको तबल र भत्ता मलेसिया सरकारले वृद्धि गरे विदेशी कामदारको ४ सय रिङ्गेट तलब (१५ हजार) बढछ ।

यो आन्दोलनबाट विदेशी कामदारलाई पारिश्रमिकमा फाइदा पुग्ने म्यानपावर व्यवसायी कुमुद खनाल औल्याउँछन् । हाल, मलेसियामा ५ लाख नेपाली कामदार कार्यरत छन् ।

प्रकाशित मिति: सोमबार, मंसिर २७, २०७८ ११:१६