६६ हजार विदेशी कामदार भित्र्याउने काेरियाकाे तयारी, भाषा परीक्षा कहिले ?

A+ A A-

दक्षिण कोरियाले सन् २०२२ का लागि ६६ हजार विदेशी कामदार भित्राउने कोटा निर्धारण गरेको छ । गत शुक्रबार बसेको विदेशी कामदार पोलिसी निर्धारण समितिको बैठकले ६६ हजार कोटामध्ये ४२ हजार ५ सय ३० जना नयाँ कामदार र अन्य पुरानै कामदार लिने कोटा तोकेको हो ।

आगामी वर्ष कोरियन भाषा परीक्षामार्फत नयाँ र कोरियामा ४ वर्ष १० महिना रोजगारी गरेर फर्किएका कामदारकाे हकमा विशेष भाषा परीक्षा (सीबीटी) मार्फत कामदार लिने समितिको बैठकले निर्णय गरेको हाे ।

उत्पादनमुलक क्षेत्रमा ४३, कृषि तथा पशुपालन क्षेत्रमा ९ हजार ९ सय ३०, माछापालनमा ४ हजार ६ सय ४० र निर्माण क्षेत्रमा ३ हजार ९ सय ७० जना विदेशी कामदारको कोटा छुट्ट्याएकाे हाे ।

६६ हजार विदेशी कामदार भित्र्याउने नीति लिएको कोरियाले कुन देशबाट कति कामदार लिने र भाषा परीक्षा कहिले सञ्चालन गर्ने विषयमा भने प्रष्ट पारेको छैन ।

सन् २०२१ मा कोरियाले ५२ हजार विदेशी कामदारका लागि कोटा निर्धारण गरेकाे थियो । जसमा ५ हजार ४ सय जना नेपालका लागि कोटा निर्धारण गरिए पनि कोरोना भाइरसका कारण भाषा परीक्षा सञ्चालन भएन ।

कोरियाले हाल ओमिक्रोन भेरियन्टका कारण भाषा परिक्षा र देशकाे कोटा निर्धारण नगरेकाे कोरियन प्रवासी मजदुर युनियनका अध्यक्ष उदय राईले जानकारी दिए ।

कोरियाले नेपाल पाकिस्तात, भियतनाम, श्रीलंका, बंगलादेश, फिलिपिन्स, कम्बोडियालगायत एसियाका विभिन्न १६ वटा देशहरूबाट विदेशी कामदार लैजाने गरेको छ ।

कोरोना महामरी सुरु हुनुअघि नेपालबाट वार्षिक १० हजार कामदार रोजगारीका लागि कोरिया जाने गरेका थिए । कोरियामा कोरोनाको संक्रमण बढेपछि नेपाली कामदार जान बन्द भएको थियो ।

कोरियाबाट फर्किएकाहरूको विशेष कम्प्युटर बेस्ड टेस्ट गराइने र कोरोना जोखिम कम भएपछि यूबीटी प्रक्रियाबाट कोरियन भाषाको परीक्षा गराउने तयारी भइरहेको शाखाले जनाएको छ ।

यूबीटी परीक्षामा एउटा निश्चित अंक छुट्याइने र त्यसभन्दा बढी अंक ल्याउने परीक्षार्थीलाई त्यही दिन सीप परिक्षणसँगै शारीरिक परीक्षण सक्ने तयारी भैरहेको छ । शारीरिक परीक्षणको रूपमा कलर ब्लाइन्ड टेस्ट गराइने छ

विदेशी कामदारको अभाव झेलिरहेको कोरियाले गत वर्षको जनवरी १ देखि अप्रिल १२ तारिखसम्म भिसाअवधि सकिन लागेका विदेशी कामदारहरूलाई थप १ वर्ष भिसा थप गर्ने निर्णय गरेकोे थियो । हाल कोरियामा ५५ हजारभन्दा धेरै नेपाली कार्यरत छन् ।

प्रकाशित मिति: आइतबार, मंसिर २६, २०७८ १३:१९