नेताहरूलाई भोट माग्ने कांग्रेस कार्यकर्ताले देखाएको सांस्कृतिक विविधता

A+ A A-

बग्गीखानास्थित यलम्बर ब्याङ्क्वेटमा कांग्रेस नेता प्रकाशमान सिंहले पार्टी सभापतिको लागि उम्मेदवारी घोषणा गर्दै थिए । सिंहले उम्मेद्वारी घोषणा गर्नासाथ कांग्रेस महाधिवेशनस्थलको रौनक फेरियो । प्रदर्शनीमार्गमा प्रकाशमानका समर्थकले बाजागाजा सहित र्‍याली निकाले ।

सम्भवतः आज महाधिवेशनस्थलमा सिंहको पक्षमा भएको प्रदर्शन सबैभन्दा ठूलो थियो । नेवारी पोसाकमा सजिएका कार्यकर्ता सिंहको लागि भोट माग्न नाचगान गरिरहेका थिए । सिंहका समर्थकले एउटा सिङ्गै रुखको बोट नै र्‍यालीमा प्रयोग गरे ।

यस्तै, देउवाको समर्थनमा उर्लिएकाको भीड पनि कम्ती थिएन । उनीहरूले देउवाको निम्ति मत माग्दै नाचगान गरेको दृश्य महाधिवेशनस्थलमा देखियो । गगन थापालगायतका अन्य युवा नेताको समर्थनमा उत्रिनेहरू पनि धेरै नै थिए ।

त्यहाँ समाजिक विविधता पनि देखिन्थ्यो ।

जस्तो, प्रकाशमानको समर्थनमा उत्रिनेहरू अधिकांश नेवारी पोसाक र बाजागाजामा थिए भने विमलेन्द्र निधिको समर्थनमा उत्रिनेहरू अधिकांश मधेशी समुदायका थिए ।

त्यस्तै वर्तमान पार्टी सभापति एवं प्रधानमन्त्री शेरबहादुर देउवाको समर्थनमा मत माग्नेहरू पश्चिमी भाकामा गीत गाउँदै थिए । कोही थारुहरूको पोसाकमा सजिएका थिए त कोही मैथिली ।

केन्द्रीय तहका नेताहरू को–कुन समूहबाट लड्ने भनेर रस्साकस्सी चले पनि तल कार्यकर्ता भने सौहार्द्रता देखाउँदै थिए । उनीहरूले आफ्ना नेताहरूको पक्षमा त खुलेरै लागे तर विरोधमा भने उत्रिएनन् ।

याद रहोस्, यसअघि चितवनमा सम्पन्न एमाले महाधिवेशनमा केपी ओली पक्षले अपिल जारी गरेरै अध्यक्षका अर्का प्रत्यासी भीम रावललाई मत नदिन उर्दी जारी गरेको थियो । जुन लोकतान्त्रिक आचरणबाहिर रहेको भन्दै ओली पक्ष आलोचित बन्न पुग्यो ।

तर, कांग्रेस महाधिवेशमा भने कार्यकर्ताले थोरै भए पनि संयमता अपनाएको देखिन्थ्यो । यद्यपि मतदानको समय भने आउन बाँकी नै छ ।

शीर्षस्त नेताको ठूला जुलुसभित्रबाट अन्य नेताका स–साना जुलुस पनि मज्जैले छिरिरहेको थियो । कसैले कसैलाई निषेध गर्ने प्रयत्न गरेको पाइएन ।

जस्तो, प्रदर्शनीमार्गको एक कुनामा गण्डकी प्रदेशका रेशम बाँनियालाई मत माग्दै नाचगानमा व्यस्त थिए, केही कार्यकर्ताहरू । उनीहरूले गाइरहेको ‘बेनीको बजार तिरेमिरे...’ गीतले भीड सानै भए पनि सबैको ध्यान तानिरहेको थियो । चर्को आवाजको बीचमा पनि स–साना झुण्डले पनि नेताहरूलाई मत मागिरहेका थिए ।

समूह सानै किन नहोस्, आफूप्रति अरुको ध्यान तान्ने कला प्रायमा देखियो । केन्द्रीय सदस्यका प्रत्यासी अभि बहादुर घर्तीलाई मत माग्नेहरू मगर पोसाकमै सजिएका थिए । उनीहरूको त्यो पोसाकले पनि अन्य मान्छेहरूको ध्यान तानिरहेको थियो ।

सप्तरीकै महमद मुस्लिम कांग्रेस महाधिवेशनबाट युवा नेतृत्व चुन्ने उद्देश्यले काठमाडौं आएका रहेछन् । उनका अनुसार महाधिवेशनस्थल भृकुटीमण्डपमा सप्तरीबाट उनीजस्तै मुस्लिम समुदायका १४ जना आएका थिए । थोरै भए पनि भिन्न समूह बनाएर गगन थापाको लागि मत मागिरहेका थिए, उनीहरूले ।

‘गगनपुस्ताले जित्नुपर्छ भनेर हामी १४ जनाको टोली काठमाडौं आएका छौँ,’ उनले भने, ‘हामी सप्तरी क्षेत्र नं. १ बाट आएका हौँ ।’

सानै भए पनि यस्ता समूहले आफ्नो मौलिकता देखाएर ध्यान तानिराखेका थिए । आफ्ना नेताको लागि मत मागिरहेका थिए । अलि ठूला प्रदर्शन र जुलुसबीच पनि यस्ता समूह नथाकी निरन्तर चुनावी मैदानमा देखिए ।

प्रकाशित मिति: शनिबार, मंसिर २५, २०७८ २१:०४