गगन र विश्वप्रकाश शेखरकाे प्यानलबाट महामन्त्री लड्ने सहमतिनजिक

A+ A A-

कांग्रेस महामन्त्रीका दुई सिटमा गगन थापा र विश्वप्रकाश शर्माले सँगै मिलेर लड्ने तयारी गरेका छन् । शेरबहादुर देउवा क्याम्पबाट विश्वप्रकाश शर्माले विद्रोह गरेसँगै दुई युवा नेताबीच छलफल तीव्र भएको छ ।

विश्वप्रकाश शर्माको अति निकट स्रोतले दुईवटा तथ्य एकैसाथ पुष्टि गर्‍याे । एक– देउवा क्याम्पबाट विश्वप्रकाशले औपचारिक विद्रोह गरेका छन् । दुई– शेखर कोइरालालाई सभापतिको उम्मेदवार मान्नेगरी गगन र उनी अब महामन्त्रीमा एकैसाथ लड्ने सहमति नजिक पुगेका छन् ।

विश्वप्रकाशले शिलापत्रसँग कुरा गर्दै यसबारेमा छलफल चलिरहेको खुलाए । तर औपचारिक प्रतिक्रिया दिन भने मानेनन् ।

देउवा क्याम्पले विश्वप्रकाशलाई सुरुमा महामन्त्री प्रत्याशीका रूपमा अघि बढाउन चाहे पनि कृष्णप्रसाद सिटौलाको प्रवेशसँगै विश्वप्रकाशलाई चुनौती थपियो ।

झापा गृहजिल्ला भएका सिटौला र विश्वप्रकाश पार्टीभित्रका कट्टर प्रतिद्वन्द्वी हुन् । सिटौला कुनै पनि हिसाबमा विश्वप्रकाशलाई रोक्न चाहन्छन् । उनी यसपल्ट गगनलाई पनि रोक्ने रणनीतिमा सक्रिय भएका छन् । गगन अघिल्लो महाधिवेशनसम्म सिटौलासँगै थिए । सिटाैलाले गगन र विश्व दुवैलाइ एकसाथ जवाफ दिनेगरी प्रदीप पाैडेललाइ महामन्त्रीमा अघि सारेका छन् । देउवाले यसमा अन्तिम जवाफ दिन भने अझै बाँकी छ ।

गगन निकट स्रोतले पनि याे फेरिएकाे नयाँ परिदृश्यमा विश्वप्रकाशसँग छलफल भइरहेको, त्यो सहमति नजिक रहेको पुष्टि गर्‍यो । शेखरले दुवै युवा नेतालाई राखेर महाधिवेशन प्रतिनिधिहरूको साझा माग गगन र विश्व एकैसाथ आउनुपर्छ भन्ने रहेकाले अब यो धारबाट सोच्न आग्रह गरेका छन् ।

विश्वप्रकाश निकट स्रोतले यो सहमति कार्यान्वयन हुने सम्भावना बढ्ता रहेको खुलाएको छ । यो सहमति लागू भएमा कांग्रेस महाधिवेशनमा नयाँ परिदृश्य देखिने छ ।

प्रकाशित मिति: शनिबार, मंसिर २५, २०७८ १३:०६