नेतृत्व हत्याउन लुम्बिनीमा माओवादीका नेताहरूकोे दौडधुप, कसले मार्ला बाजी ?

नेतृत्व हत्याउन लुम्बिनीमा माओवादीका नेताहरूकोे दौडधुप, कसले मार्ला बाजी ?

A+ A A-

एमालेले आफ्नो महाधिवेशन सकाएको छ, कांग्रेस पनि प्रदेश अधिवेशनहरू सकेर केन्द्रीय महाधिवेशनको तयारीमा छ । यसैबीचमा नेकपा माओवादी केन्द्रले पनि आफ्नो वडा र पालिका अधिवेशन सकिइसकेको छ भने प्रदेश अधिवेशनको तयारीमा छ ।

माओवादीले लुम्बिनी प्रदेश सम्मेलन दाङको भालुवाङक्षेत्रमा गर्न लागेपछि यो क्षेत्रका माओवादी नेताहरू नयाँ नेतृत्वको कसरतमा लागेका छन् । माओवादीले आफ्नो आधार इलाका मानेको क्षेत्र भएकाले पनि यहाँको नेतृत्वप्रति नेताहरूको चासो बढेको हो ।

पार्टीमा प्रदेश नेतृत्वको विशेष भूमिका रहने र आफ्नो आधार इलाकामा आफूअनुकूलको नेता ल्याउन पार्टीका शीर्ष नेताहरू दौडधुपमा लागेका छन् ।

२५ र २६ मंसिरमा हुन लागेको सम्मेलनको माओवादी केन्द्रका अध्यक्ष पुष्पकमल दाहाल प्रचण्डले भर्चुअल रूपमा उद्घाटन गर्नेछन् । लुम्बिनीबाट ८ सय प्रतिनिधि तथा त्यत्तिकै संख्यामा पर्यवेक्षक तथा सक्रिय कार्यकर्तालाई जुटाएर उद्घाटन गर्ने कार्यक्रम अन्तिम तयारीमा रहेको माओवादी केन्द्रका प्रदेश कार्यालय सचिव सुदर्शन बरालले जानकारी दिए ।

माओवादीले लुम्बिनी प्रदेशको १ सय ९ वटा पालिका, निर्वाचनक्षेत्रलाई भूगोल मानेर भूगोलबाट ६ सय प्रतिनिधि छानेको छ भने आयोजक, ज्येष्ठ कम्युनिस्ट मञ्च, विभिन्न विभाग र मनोनीत गरी थप २ सय प्रतिनिधि गरी ८ सय प्रतिनिधि छानेको नेता बरालले जानकारी बताए । सम्मेलनका लागि तयारी अन्तिम चरणमा पुगेको उनले बताए ।

उनका अनुसार माओवादीले यसपटक स्थानीय पालिकालाई कार्यकारी बनाएको छ । लुम्बिनी प्रदेशका १०९ वटै पालिकाबाट सम्मेलनमा भौगोलिक उपस्थिति हुनेछन् । माओवादीको लुम्बिनी प्रदेश कमिटी २०५ सदस्यीय हुनेछ । ‘२०५ सदस्यीय कमिटीमा १०९ जना पालिकाबाट छानिनेछन्, यसले गर्दा पालिका कार्यकारी भएको छ,’ उनले भने ।

मुलुक संघीयतामा गएसँगै जिल्ला संरचना खारेज भएको अवस्थामा पालिकालाई कार्यकारी बनाइएको माओवादीको भनाइ छ ।

माओवादीको हाल कायम रहेको जिल्ला कमिटीलाई जिल्ला समन्वय समिति बनाइने छ भने केन्द्र, प्रदेश र पालिकास्तरीय समिति कार्यकारी रहनेछन् । पालिकाको सम्बन्ध प्रदेश कमिटीसँग र प्रदेशको सम्बन्ध केन्द्रीय कमिटीसँग रहनेछ । २०५ सदस्यीय लुम्बिनी प्रदेश सम्मेलनमा ७६ जना खुला रूपमा छानिने छन् ।

माओवादीले महिला सहभागिता ३५ प्रतिशत गराउने भएको छ । यस आधारमा लुम्बिनी प्रदेश समितिमा ७० जनाको महिला प्रतिनिधित्व हुनेछ । दलितको प्रतिनिधित्व ३० जना अर्थात् १५ प्रतिशत हुनेछ भने मुस्लिम समुदायको सहभागिता ५ प्रतिशत हुनेछ । प्रदेश समितिमा १० जना मुस्लिमको कोटाबाट छानिनेछन् ।

बहुपदीय प्रदेश कमिटीमा एक जना अध्यक्ष, तीन जना उपाध्यक्ष, एक सचिव, एक सहसचिव र एक कोषाध्यक्ष गरी सात जना पदाधिकारी हुनेछन् । माओवादीले उपमहानगरबाट अनिवार्य तीन जना र नगर तथा गाउँपालिकाबाट दुई–दुई जना प्रतिनिधि सम्मेलनमा सहभागी गराउँदै छ । अरु प्रतिनिधि सदस्य संख्याका आधारमा तय गरिएको छ । लुम्बिनी प्रदेशमा माओवादीको कुल पार्टी सदस्य संख्या १ लाख १२ हजार रहेको र सबैभन्दा धेरै दाङमा १९ हजार ७ सय छन् ।

माओवादीको विधानअनुसार अब प्रदेश कमिटीमा रहने कुनै पनि नेता केन्द्रीय कमिटीमा रहन पाउने छैनन् । प्रदेश कमिटीको पदाधिकारी रहेका केन्द्रीय सदस्यहरूले अब भने कुनै एक रोज्नुपर्नेछ ।

प्रादेशिक संरचना बलियो बन्न लागेकाले यसअघि केन्द्रमा रहन चाहेका नेताहरू प्रदेशको नेतृत्वका लागि इच्छुक बनेका छन् । लुम्बिनीमा माओवादीले स्थायी कमिटी सदस्य चन्द्रप्रकाश खनाल बलदेवलाई इन्चार्ज बनाएको छ ।

माओवादीकाको आधार इलाकाभित्र पर्ने क्षेत्र भएकाले यो प्रदेशको निर्वाचनमा केन्द्रीय नेताहरूको पनि विशेष चासो छ । यहाँबाट केन्द्रमा प्रतिनिधित्व गर्ने नेताहरू धेरै भएकाले पनि उनीहरूको चासो बढेको हो ।

लुम्बिनीबाट नेता कृष्णबहादुर महरा, वर्षमान पुन, ओनसरी घर्ती, कुलप्रसाद केसी चन्द्रप्रकाश खनाल, बामदेव घिमिरे, सुदर्शन बराललगायतका प्रभावशाली नेताहरूले केन्द्रमा प्रभाव जमाएका छन् ।

माओवादी केन्द्रमा रहेर लामो समय मोर्चा सम्हालेका नेता टोपबहादुर रायमाझी, मणिचन्द्र थापा, चन्द्रबहादुर खड्का, नवीन रोकामगर, दधिराम न्यौपाने, गिरिधारीलाल न्यौपाने, दिनेश पन्थी, अनुप बराललगायतका नेताहरू एमालेमा मुख्य जिम्मेवारी पाएपछि त्यो खाडल पुर्न माओवादीलाई चुनौती थपिएको छ ।

यससँगै माओवादी सशस्त्रयुद्धमा मुख्य जिम्मेवारी दिएका र अहिले अलग्गै पार्टी बनाएका नेत्रविक्रम चन्द विप्लवको विशेष क्षेत्र पनि लुम्बिनी भएको, नेता मोहन वैद्य किरण तथा अहिले जनता समाजवादी पार्टी बनाएर साबिकका आफ्ना समर्थक नेता बाबुराम भट्टराईले समेट्न थालेपछि साविकका माओवादीलाई आफ्नो संगठनमा राखिरहन उसलाई चुनौती भएको हो ।

प्रदेश अध्यक्षमा यस्तो छ नेताहरूको लबिङ

लुम्बिनी प्रदेश अध्यक्षका लागि प्रदेश सांसद दीपेन्द्र पुन सिजल, प्रदेश सांसद दामा शर्मा, राष्ट्रियसभा सदस्य तथा अहिले पार्टीको प्रदेश कमिटी सदस्य जगप्रसाद शर्मा र पार्टी केन्द्रीय कार्यालयका सचिव डोरप्रसाद उपाध्याय अगाडि आएका छन् ।

नेताहरू वर्षमान पुन र ओनसरी घर्तीले रोल्पाका दीपेन्द्र पुन सिजललाई नेतृत्वमा ल्याउन चाहेका छन् भने नेता जनार्जन शर्मा प्रभाकर दामा शर्मालाई प्रदेशको नेतृत्वमा ल्याउन चाहन्छन् ।

तर, पार्टी केन्द्रले दुवै पक्षलाई विवादमा आउन नदिन कपिलवस्तुका डोरप्रसाद उपाध्यायलाई नेतृत्वमा पठाउन सक्नेगरी छलफल गरेको छ । उपाध्याय आफू केन्द्रीय कार्यालयमा रहेपनि पार्टीले निर्णय गरेर पठाए जिम्मेवार लिन तयार रहेको प्रतिक्रिया दिएका छन् ।

नेतृ दामा शर्माले धेरै साथीहरू केन्द्रमा रहने इच्छा गरेको र आफूले पनि केन्द्रमा पाएसम्म अरु इच्छा नभएको बताउँदै उनले माओवादीमा महिला सहभागिता धेरै भएकाले नेतृत्वमा पनि यही प्रकारले महिलाको सहभागिता हुने आशा व्यक्त गरिन् ।

प्रकाशित मिति: बिहीबार, मंसिर २३, २०७८ १३:५६