झण्डा, ब्यानर र गेट सजावटमा मात्रै कांग्रेसको २० लाख खर्च, व्यवसायीलाई भ्याइनभ्याइ (भिडियो)

झण्डा, ब्यानर र गेट सजावटमा मात्रै कांग्रेसको २० लाख खर्च, व्यवसायीलाई भ्याइनभ्याइ (भिडियो)

A+ A A-

नेपाली कांग्रेसको १४औँ महाधिवेशनमा करिब २० लाखबराबरको झण्डा र ब्यानर लाग्ने देखिएको छ । महाधिवेशनका लागि झण्डा, ब्यानर र गेट व्यवस्थापनको जिम्मा पाएका कांग्रेस नेता गोविन्द पुडासैनीका अनुसार काठमाडौंमा मात्रै पार्टीका करिब १० हजार झण्डा र चुनाव चिह्न रुख अङ्कित झण्डा राखिने काम भइरहेको हो ।

१० हजारमा ५ हजार झण्डा रुख चिह्न अंकित हुनेछन् । रुख चिह्न भएको झण्डा भने सबै एकै आकारका हुनेछन् । बाँकी ५ हजार झण्डा भने फरकफरक आकारका रहनेछन् । कम्तीमा ७५ देखि ३ सय रुपैयाँसम्मका झण्डा महाधिवेशनमा प्रयोग हुने पुडासैनीले बताए ।

त्यस्तै, महाधिवेशनको प्रचारका लागि विभिन्न ठाउँमा ब्यानर टाँग्ने काम भइरहेको छ । पुडासैनीका अनुसार आकाशे पुलहरूमा अहिलेसम्म करिब ५० प्रतिशत ब्यानर राख्ने काम सम्पन्न भइसकेको छ । बुधबार बेलुकीसम्म लगभग सबैतिर ब्यानर राखिसकिएको छ ।

‘कुल मिलाएर गेट, झण्डा, ब्यानरलगायत सजावटको काममा करिब २० लाख खर्च हुने अनुमान छ । ७५ देखि ३ सय रुपैयाँसम्मका झण्डा प्रिन्ट गर्न विभिन्न प्रेसहरूमा जिम्मा दिएका छौँ,’ पुडासैनीले शिलापत्रसँग भने ।

पार्टी प्रवक्ता विश्वप्रकाश शर्माले मंगलबार पार्टीको झण्डा हस्तान्तरण गरी महाधिवेशनस्थल भृकुटीमण्डपबाट पोलमा झण्डा लगाउने अभियानको प्रारम्भ गरेका थिए । सोहीअनुरुप खम्बाखम्बामा झण्डा राख्नेजस्ता शृंगारका काम भइरहेको हो ।

कांग्रेसले कोटेश्वर, त्रिभुवन अन्तर्राष्ट्रिय विमानस्थल, गौशाला, माइतीघर मण्डला, त्रिपुरेश्वर, थापाथली, कालीमाटी, त्रिचन्द्र कलेज, बागबजार, सिंहदरबार, महाराजगञ्ज, बल्खु, बालाजुक्षेत्रमा ठूला १४ स्वागतद्वार बनाइरहेको छ । महाधिवेशनस्थल भृकुटीमण्डपवरपर पनि झण्डै १० स्वागतद्वार बनाइने पुडासैनीले बताए ।

प्रिन्टिङ प्रेसलाई काम चापाचाप

कांग्रेसको महाधिवेशन नजिकिएसँगै प्रिन्टिङ प्रेसहरूलाई कामको चाप बढेको छ । कांग्रेस पार्टीका तर्फबाट छापिएका ब्यानर, झण्डाबाहेक नेताहरूका व्यक्तिगत प्रसारसामग्री बनाउन व्यस्त देखिन्छन्, छपाइ व्यवसायीहरू ।

बागबजारमा रहेको भिजन क्रिएसनकी अस्मिता थापा ब्यानर र कार्डहरू बनाएको खातापाता मिलाउन अभ्यस्त थिइन् । पछिल्लो समय कांग्रेसी उम्मेदवारहरूको प्रचारसामग्री बनाउनै व्यस्त हुनुपरेको उनी बताउँछिन् ।

‘केन्द्रीय सदस्यमा दाबी गरेकादेखि विभिन्न पदाधिकारीका निम्ती ब्यानर बनाउने कामको चाप छ । प्राय:जसो चुनावको समयमा यस्तै नै हुन्छ’, उनले भनिन् ।

अस्मिताका अनुसार उनीहरू ब्यानर बनाउन चाहिने ‘फ्लेक्स’देखि आवश्यक सामग्री चीनबाट मगाउँछन् । यो समय राजनीतिक दलको महाधिवेशनको समय भएकाले पहिले नै त्यस्ता सामग्री मगाएर राखेको उनको भनाइ छ ।

त्यस्तै, बागबजारकै ऐभरेस्ट आर्टमा झण्डा बनाउने र बेच्ने काम तीव्र रूपमा भइरहेको पाइन्छ । एभरेस्ट आर्टका उदय कुमारका अनुसार महाधिवेशनको समय भएकाले राजनीतिक दलको झण्डा बनाउने काम धेरै आएको छ ।

‘पहिलाको तुलनामा हामीलाई भ्याइनभ्याइ छ । नेताहरूको फोटो भएको झण्डादेखि विभिन्न कपडाका सामग्री बनाइरहेका छौँ’, उनले भने, ‘अझ हिजोअस्तिभन्दा आज त कम हो । अब त बनाएका झण्डा प्रयोग गर्ने दिन नै आइसकेकाले चाप केही घटेको छ । हिजोअस्ति त यति बोल्ने फुर्सद पनि थिएन ।’

यसरी झण्डाहरू बनाउनका लागि क्षेत्रपाटीबाट कपडाहरू मगाउने गरेको उदय कुमारले बताए ।

बागबजारक्षेत्रमा मात्रै विभिन्न स्टेसनरीदेखि कपडा पसलसम्मले राजनीतिक दलका झण्डाहरू बेचिरहेका भेटिन्छन् । हरेक राजनीतिक दलको महाधिवेशनको लहर चलेकाले पनि प्रिन्टिङ व्यवसाय फस्टाएको व्यापारीहरूको भनाइ छ ।

तस्वीरहरूः सुशील श्रेष्ठ/शिलापत्र

प्रकाशित मिति: बुधबार, मंसिर २२, २०७८ २०:४८