शैक्षिकसत्र सुरु भएको पाँच महिनामा पनि दार्चुलामा किताब पुगेन, विद्यार्थी मर्कामा

शैक्षिकसत्र सुरु भएको पाँच महिनामा पनि दार्चुलामा किताब पुगेन, विद्यार्थी मर्कामा

A+ A A-

दार्चुलाको अपि हिमाल गाउँपालिकाका विद्यार्थीले शैक्षिकसत्र सुरु भएको पाँच महिना बितिसक्दा पनि पुस्तक पाएका छैनन् । कक्षा १ देखि १० सम्मका करिब ५० प्रतिशत विद्यार्थीले अझै पनि किताब पाएका छैनन् ।

गाउँपालिकाका शिक्षा शाखा प्रमुख वीरेन्द्र साउदका अनुसार पुस्तक ल्याउने जिम्मा पाएका व्यक्तिले फट्याइँ गर्दा विद्यार्थीले पुस्तक नपाएका हुन् । गाउँपालिकाले गएको १५ असारमा स्थानीय कमलेश सिंहलाई पुस्तक ल्याउने जिम्मा दिएको थियो । तर, सिंहले समयमै किताब नल्याइदिँदा विद्यार्थीहरू मारमा परेका हुन् ।

अपि हिमाल गाउँपालिकामा २३ वटा विद्यालय छन् । करिब २३ हजार विद्यार्थी सो गाउँपालिकाभित्र अध्ययनरत छन् । ‘हाम्रा विद्यार्थीले अहिलेसम्म पुस्तक पाएका छैनन् । कमलेश सिंहलाई पनि पटकपटक पत्रै काट्दा पनि पुस्तक ल्याउनुभएन,’ साउदले भने, ‘जबकि उहाँले स्कुलबाट सबै पैसा बुझिसक्नुभएको छ ।’

किताब ल्याउने जिम्मा पाएका सिंह भने धनगढीमै पुस्तक अभाव भएकाले ल्याउन नसकिएको बताउँछन् । धनगढीमा जनक शिक्षा सामग्री केन्द्रको शाखा कार्यालय छ । ‘मैले पैसा पनि १० लाख २६ हजार स्कुलबाट लिएको सत्य हो । तर, अब किताब लिने ठाउँमै पुस्तक छैन त मैले कसरी ल्याउनु ?’, सिंहले शिलापत्रसँग भने ।

तर, जनक शिक्षा सामग्री केन्द्रका प्रवक्ता चित्र आचार्य भने पुस्तक अभाव नरहेको बताउँछन् । ‘हामीले हाम्रो कार्यालयबाट धनगढीमा किताब पठाइसकेका छौँ । यस वर्ष किताब अभाव हुन दिएका छैनौँ । सायद किताब वितरण गर्ने एजेन्टले पैसा लिएर फट्याइँ गरेको हुनुपर्छ’, उनले भने ।

त्यस्तै, जनक शिक्षा सामग्री केन्द्रको धनगढी शाखा पनि पुस्तक अभाव नरहेको बताउँछ । केन्द्रीय कार्यालयबाट आएका पर्याप्त किताब शाखा कार्यालयमा उपलब्ध रहेको शाखाका प्रमुख ध्रुव पन्तले शिलापत्रलाई बताए ।

‘हामीसँग पर्याप्त किताब छन् । विभिन्न ठाउँबाट माग भएबमोजिम पठाइरहेका छौँ । अपि गाउँपालिकामा पनि माग भयो भने सोहीअनुसार पठाउन तयार छौँ,’ पन्तले भने, ‘सायद किताब ल्याउने जिम्मा पाएका एजेन्टले नै फट्याइँ गरेजस्तोे छ । त्यस्तो हो भने हामी सम्बन्धित व्यक्तिलाई कारबाही गर्छौं ।’

प्रकाशित मिति: मंगलबार, मंसिर २१, २०७८ १७:२९