कांग्रेस बागमतीको पदाधिकारीमा देउवा र पौडेलको बराबरी हिस्सा

A+ A A-

नेपाली कांग्रेस बागमती प्रदेश समितिको पदाधिकारीमा संस्थापन पक्ष र संस्थापनइतर समूहको बराबरी नतिजा आएको छ । कांग्रेस बागमतीमा पार्टी सभापति शेबहादुर देउवा र कृष्णप्रसाद सिटौला समूह बलियो देखिए पनि पदाधिकारीमा बराबरी हिस्सा बाँडिएको छ ।

हेटौँडामा १६–१८ मंसिरमा भएको अधिवेशनअन्तर्गत प्रदेश सभापतिमा देउवा–सिटौला पक्षका इन्द्रबहादुर बानियाँ निर्वाचित भएका थिए । उनले १ सय ५८ मतान्तरमा कांग्रेस नेता पौडेल समूहका जगदिश्वर नरसिंह केसीलाई पराजित गरेका हुन् ।

अधिवेशनबाट देउवा–सिटौला र पौडेल समूहका चार–चार जना पदाधिकारीमा निर्वाचित भएका छन् । सोमबार राति सम्पन्न पदाधिकारीको मतगणनामा कांग्रेस बागमतीको उपसभापतिमा पौडेल समूहका मोहनबहादुर बस्नेत र देउवा–सिटौला समूहका चन्द्र महर्जन विजयी भएका थिए । महर्जन प्रदेश सभापतिका उम्मेदवार कृष्ण सिटौला पक्षका भीमसेन दास प्रधानको प्यानलबाट चुनाव लडेका थिए ।

प्रदेश सभापतिको त्रिपक्षीय भिडन्तमा प्रधान तेस्रो भएका थिए । सभापतिमा कुनै पनि उम्मेदवारले ५१ प्रतिशत मत ल्याउन नसकेपछि पुनः मतदान भएको थियो । दोस्रो पटकको मतदानमा प्रधानले देउवा पक्षका बानियाँलाई समर्थन गरेपछि सभापतिमा बानियाँ र केसीको प्रतिस्पर्धा भएको थियो । दोस्रो चरणको मतदानमा बानियाँले १०८५ मत ल्याएका थिए भने केसीले ९२७ मत मात्रै पाए । कुल २१ सय ५१ मतमा २०२५ मत खसेको थियो ।

यसैगरी, उपसभापतिका उम्मेदवार देउवा–सिटौला पक्षका धर्मराज गौतमले १००४ र पौडेल पक्षका राजेन्द्र बुर्लाकोटीले ८३९ मत पाए पनि हार टार्न सकेनन् । महामन्त्रीमा पौडेल पक्षका कञ्चन चन्द्र बादेले ९९५ मत र देउवा–सिटौला पक्षका राजु श्रेष्ठले ९१० मत ल्याएर विजय हासिल गरे । महामन्त्रीका अन्य उम्मेदवार पौडेल पक्षका माईकल रामचन्द्र अर्याल ८९९, देउवा–सिटौला पक्षका तिलक प्रसाद रुवाली ७६०, देउवा–सिटौला पक्षका सुरेश श्रेष्ठ १६३ र गौरी प्रसाद दवाडीले १८८ मत प्राप्त गरेसँगै हार पनि व्यहोरे ।

खुलातर्फको सहमहामन्त्रीमा पौडेल पक्षका ऋषिराम घिमिरेले ९१६ मत र देउवा–सिटौला पक्षका हरिशरण श्रेष्ठले ८३९ मत ल्याएर विजयी भए । सहमहामन्त्रीका उम्मेदवारहरु वीरबहादुर तामाङ ८३५, महेन्द्र थिङ ८०१, राज कुमार पाठक २१७, जगन्नाथ धिमाल १५४ र जयनारायण सापकोटाले ८५ मत ल्याएका थिए ।

महिलातर्फको सहमहामन्त्रीमा पौडेल पक्षकी जीवन डंगोलले ९४९ मत प्राप्त गरी विजयी भइन् । उनका निकटतम प्रतिद्वन्द्वी देउवा–सिटौला पक्षकी निर्मला बस्ताकोटी खड्का ७८६ मत र मोतिमाया तामाङले २१८ मत प्राप्त गरेका थिए ।

हेटौँडा–१०, स्थित वनविज्ञान अध्ययन संस्थानमा प्रदेश सभापतिको मतगणना भएको थियो भने पदाधिकारी र सदस्यको मतगणना हेटौँडा–४ स्थित एक पार्टी प्यालेसमा भइरहेको छ । सदस्यहरूको मतगणना जारी छ । अधिवेशनबाट प्रदेश सभापति, दुई उपसभापति, दुई महामन्त्री, एक महिलासहित तीन सहमहामन्त्री र ८३ जना सदस्यसहित कुल ९१ जनाको प्रदेश कार्यसमिति चयन हुनेछ ।

प्रकाशित मिति: मंगलबार, मंसिर २१, २०७८ ११:०८