राप्रपामा कमल थापा ढले, हेटौंडामा उनको योजना ढल्यो

A+ A A-

मकवानपुरमा राष्ट्रिय प्रजातन्त्र पार्टी (राप्रपा)का निवर्तमान अध्यक्ष कमल थापालाई सम्झिने थुप्रै कुरा छन् । हेटौंडालाई तत्कालीन नारायण अञ्चलको सदरमुकामदेखि बागमती प्रदेशको अस्थायी राजधानी बनाउन उनको योगदान छ । थापाले आफ्नो गृह नगरलाई प्रशासनिक क्षेत्रमा महत्वपूर्ण बनाउन भूमिका खेलेको अझै चर्चा छ । उनै थापाले हेटौंडाको मध्यमागमा पर्ने हुप्रचौरमा बासुदेव सभागृह बनाउन बजेट पठाए । शाही कालमा २०५९/६० तिर स्थानीय विकास मन्त्री हुँदा थापाले हेटौंडाको सुविधा सम्पन्न सभाहल निर्माण गर्न भन्दै मन्त्रालयको जगेडा कोषबाट बजेट पठाए ।

उनले सभाहल निर्माणमा कदम चालेपछि तत्कालीन जिल्ला विकास समिति र हेटौंडा नगरपालिकाले बजेट हाल्यो र संयुक्त लगानीमा ‘बासुदेव सभाहल’ बन्यो । बासुदेव सभागृह मुलुकमा २०६२/०६३ को जनआन्दोलनबाट गणतन्त्र आएपछि नामाकरण गरिएको हो । त्यसअघि कमल थापाले यसको नाम ‘ज्ञानेन्द्र सभागृह’ राखेका थिए । थापाले अझैसम्म पनि बासुदेव नभनेर ज्ञानेन्द्र सभागृहको नाममा सम्बोधन गर्छन् ।

दोस्रो जनआन्दोलनमा काठमाडौंमा शहादत प्राप्त गरेका मकवानपुरका शहीद बासुदेव घिमिरेको नाममा सभागृहको नामाकरण गरिएको थियो । बासुदेव सभागृह भत्काएर हेटौंडा उपमहानगरपालिको २०७६ पुसमा भ्युटावरसहितको व्यापारिक भवन बनाउने योजना अघि सारेपछि भने कलम थापा रिसाए । निर्माणपछि प्रयोगमै नआएको ‘सभागृह’ भत्काएर देखाउन हेटौंडाका नगर प्रमुख हरिबहादुर महतलाई चेतावनी पनि दिए । उनले चेतावनी दिएपछि सभागृह भत्काएर भ्युटावरसहितको व्यापारिक भवन निर्माण कार्य सुरु हुने भएपछि हेटौंडामा कमल थापासँगै उनले बनाएको सभागृह पनि ढल्यो भन्ने चर्चा सुरु भएको छ ।

राप्रपाको एकता महाधिवेशनबाट थापा अध्यक्षमा झापाका राजेन्द्र लिङ्देलसँग पराजित हुन पुगे । यता थापा पराजित भएको २४ घण्टा बित्न नपाउँदै उपमहानगरपालिकाले सभागृह भत्काएर भ्युटावरसहितको व्यापारिक भवन निर्माण गर्ने सम्झौता गर्‍यो । ‘यसलाई संयोग भन्ने की के भन्ने । थापाले कुनै पनि हालतमा भत्काउन दिन्न भन्थे । अहिले उनी पार्टीमा ढलेपछि यता सभागृह पनि ढल्ने भएछ’, हुप्रचौर आसपासकै एमालेका नेता भन्छन् ।

हेटौंडा–४, हुप्र (लोकतान्त्रिक चौर)मा बनेको बासुदेव सभागृह प्रयोगमा कहिल्यै आएन । सभा, गोष्ठी हुनुपर्ने सभागृहलाई लागूऔषध प्रयोगकर्ताले अखडा बनाए । २०७६ पुसमै राप्रपाको भातृ संगठन ट्रेड युनियन महासंघ नेपालको बागमती प्रदेशस्तरीय श्रमिक भेलालाई सम्बोधन गर्दै थापाले बासुदेव सभागृह र बासुदेव सभागृहसँगै रहेको स्वर्गीय राजा वीरेन्द्रको पूर्ण कदको शालिक भत्काउने आँट छ भन्दै चेतावनी दिएका थिए ।

२०६३ सालमा निर्माण सुरु भएर तीन वर्षसम्म लगातार स्थानीय विकास मन्त्रालयको जगेडा कोषको एक करोड ३० लाख रुपैयाँ खर्च गरिएको थियो, सभागृहमा । त्यसपछि सभागृह निर्माणको काम अघि बढ्न सकेको थिएन । त्यसैले सभागृहलाई सुधारका साथ अघि बढाएर लैजान तत्कालीन समयमा करिब चार करोड ३५ लाख रुपैयाँ लाग्ने तत्कालीन हेटौंडा नगरपालिकाले अनुमान गरेको थियो । हालसम्म दुई करोड भन्द धेरै खर्च भइसकेको सभागृह उपयुक्त नभएको भन्दै उपमहानगरपालिकाले भत्काउने निर्णय गरेको थियो ।

स्थानीय बजेटले नपुग्ने र राष्ट्रिय योजनामा नपरेपछि निर्माण अलपत्र परेको थियो । आठ कठ्ठा क्षेत्रफल रहेको भवनमा प्रदेशसभाको लागि आवश्यक पर्ने सत्तापक्षको लागि भवन, प्रतिपक्षी दलको कार्यालय, संसदीय समितिको लागि आवश्यक कार्यालय भवन निर्माण, मर्यादापालकको लागि भवन र पार्किङको लागि केही अपुग हुने भए पनि अन्य दृष्टिकोणले उपयुक्त हुने बताइएको थियो । तर, प्रदेश सरकारले पनि यसलाई खासै चासो नदिएपछि उपमहानगरपालिकाले अब भ्युटावरसहितको व्यापारिक भवन निर्माण गर्दैछ ।

१२ तलाको बहुउद्देश्यीय व्यापारिक भवन निर्माण गर्नका लागि सोमबार उपमहानगरपालिकाले बानियाँ निर्माण सेवासँग सम्झौता गरेको छ । व्यापारिक भवनको ठेक्का ४७ करोड ९३ लाख रुपैयाँ ७२ हजार रुपैयाँमा बानियाँ निर्माणले पारेको हो ।१२ तले भवनमा दुइ तलाको अण्डर ग्राउण्ड, चारतिरबाट लिफ्ट, दुईवटा भर्‍याङ, सबैभन्दा माथि भ्यूटावर निर्माण गरिने नगर प्रमुख महतले जानकारी दिए । सम्झौतामा तीन वर्षभित्र योजना सम्पन्न गर्नुपर्नेछ ।

यता राप्रपाका नेता तथा शाहीकालका मेयर मधु अधिकारीले सभागृह भत्काउनुलाई राप्रपामाथिकाे प्रहार भनेका छन् । उनले यस्ता गतिविधिकाे जनताले मूल्याङ्कन गर्ने बताए । अधिकारीकै पालामा सभागृह निर्माण भएकाे थियाे । उनले भने, 'याे हामीमाथिको प्रहार हो । जनताले मूल्याङ्कन गर्लान् ।' उनले सभागृहकाे मर्मतसम्भार गरेर पुनर्सञ्चालन गर्न माग गरे ।

प्रकाशित मिति: मंगलबार, मंसिर २१, २०७८ ०७:००