राप्रपामा दीपक बाेहाेरा असुरक्षित, एमालेमा जाने वा नयाँ पार्टी खाेल्ने दाेधारमा

राप्रपामा दीपक बाेहाेरा असुरक्षित, एमालेमा जाने वा नयाँ पार्टी खाेल्ने दाेधारमा

A+ A A-

राष्ट्रिय प्रजातान्त्रिक पार्टी (राप्रपा) भित्र केही त्यस्ता नेता छन्, जसलाई पार्टीले होइन, उसैले पार्टीलाई चिनाउँछ । पार्टीगत प्रभावभन्दा पनि व्यक्तिगत सामर्थ्य देखाएर उनीहरू बारम्बार सत्तामा पुग्ने गरेका छन् ।

निर्वाचनमा हारजति स्वाभाविक प्रक्रिया हाे । तर, जनमतका दृष्टिले राप्रपाका चार नेताहरू दीपक बोहोरा, विक्रम पाण्डे, राजेन्द्र लिङ्देन र धवलशमशेर राणा लाेकप्रिय मानिन्छन् । हिजाे राप्रपा महाधिवेशन सकिँदा लिङ्देन, पाण्डे र राणा उस्तै चर्चामा रहे । बाेहाेरा भने कतै देखिएनन् ।

महाधिवेशनअघि पार्टीभित्र तीन अध्यक्षपछिकाे चौथो वरीयतामा रहेका बोहोरा एकता महाधिवेशनमा खासै सक्रिय देखिएनन् । अध्यक्षमै दाबी गर्ने हैसियत राख्ने उनी कुनै पनि पदमा उम्मेदवार बनेनन् । अध्यक्षका प्रत्यासी कमल थापाकाे पक्षमा उभिएका उनी थापाले चुनाव जित्दा वरिष्ठ उपाध्यक्ष हुने दाउमा थिए । तर, थापाले चुनाव हारे ।

को हुन् दीपक बोहोरा ?

राप्रपा नेता बोहोरा पञ्चायतकालदेखिका सदावहार उम्मेदवार हुन् । पछिल्लो प्रतिनिधिसभाको निर्वाचनमा उनले रुपन्देही ४ बाट उम्मेदवारी दिएका थिए । त्यतिबेला उनी छैटाैँ पटक चुनावी मैदानमा उत्रिएका थिए । त्यसअघि २०७० काे संविधानसभा निर्वाचनमा उनी विजयी भएका थिए । २०७४ को निर्वाचनमा समेत २७ हजार ४ सय २२ मत ल्याएर बलियाे वाम गठबन्धनका उम्मेदवार घनश्‍याम भुसाललाई उनले आच्छुआच्छु पारेका थिए । एमालेबाट विजयी भुसालले ३२ हजार मत ल्याएका थिए ।

बाेहाेरा सत्तामा पटक-पटक पुग्ने नेता हुन् । पञ्चायतमा स्थापित यी नेताले गणतन्त्रपछि आपूर्ति, स्वास्थ्यलगायतका मन्त्रालय सम्हाले । २०७४ को निर्वाचनअघि उनी प्रचण्ड र शेरबहादुर देउवा नेतृत्वको मन्त्रिपरिषद्‌मा थिए ।

पञ्चायत जोगाउने आन्दोलनका अगुवा बाेहाेरा त्यतिबेला रूपन्देहीबाट विद्यार्थी मण्डलमा लागेका थिए । बोहोरा प्रचण्डको मन्त्रिपरिषद्‌मा (२०७३/०७४) मा आपूर्तिमन्त्री थिए भने २०७४ मा शेरबहादुर देउवाको मन्त्रिपरिषद्‍मा स्वास्थ्यमन्त्री थिए । प्रचण्डको मन्त्रिपरिषद्‌मा उनी सबैभन्दा धनी मन्त्री थिए ।

राप्रपामा कहाँ हराए बोहोरा ?

राप्रपा एकताको निर्वाचनमा धेरै सक्रिय देखिएनन् बोहोरा । यद्यपि, उनले कमल थापाको पक्षमा भने लबिङ गरेका थिए ।

यसअघिको पशुपति राणाकाे राप्रपा प्रजातान्त्रिक र प्रकाशचन्द्र लोहोनी नेतृत्वको राष्ट्रवादी राप्रपाको एकतापछि उनीसहितका नेताहरू २०७५ फागुनमा कमल थापा नेतृत्वकाे राप्रपा नेपालमा पुगेका थिए ।

पछि तीनवटै पार्टीको एकीकरणपछि आइतबार मात्रै एकता महाधिवेशन गरिएको छ । कमल थापाले प्यानलै बनाउँदा पनि बोहोराको नाम परेन । तर, बोहोरानिकट स्राेतका अनुसार, उनले कमल थापाले जित्दा वरिष्ठ उपाध्यक्षमा बार्गेनिङ गरेका थिए । ‘उहाँ कि अध्यक्ष हुनुपर्ने हो । त्यसो होइन भने अध्यक्षपछिको नेता उहाँ हो । त्यसकारणले कमल थापालाई विजयी बनाउने र वरिष्ठ उपाध्यक्ष बन्ने योजनाअनुसारै प्यानलमा बस्न नमान्नुभएको हो’, बोहोरानिकट एक नेताले भने ।

तर, यस विषयमा बोहोरा स्वयम्‌ले भने प्रतिक्रिया दिन मानेका छैनन् ।

बोहोराका दुई विकल्प

नेता बाेहाेरानिकट नेताहरूका अनुसार कमल थापाले चुनाव हारेपछि राप्रपाभित्र बाेहाेराले आफ्नाे राजनीति सुरक्षित देखेका छैनन् । त्यसैले अहिले उनी दुई विकल्पमाथि छलफल चलाइरहेका छन् ।

पहिलाे विकल्प हाे, एमालेमा प्रवेश गरेर रूपन्देहीबाट चुनाव लड्ने । स्रोतको दाबीअनुसार रुपन्देहीबाट एमालेले टिकट दिने निश्चित भएमा उनी एमाले प्रवेश गर्नेछन् ।

दाेस्राे विकल्प, कमल थापासँगै मिलेर नयाँ पार्टी खाेल्ने । एमालेसँग कुरा नमिले स्थानीय तह निर्वाचनअघि नयाँ पार्टी बनाउने दिशामा छलफल अघि बढेकाे बाेहाेरानिकट एके नेताले दाबी गरे ।

‘राप्रपामा कमल थापा समूहले अब राजसंस्था पुनर्स्थापनाकाे मुद्दा बिसाउन लागेकाे छ । उहाँ पनि अहिले राजारहित सनातन हिन्दुराष्ट्र र संघीयताविरुद्धको विषयलाई मूल एजेण्डा बनाएर नयाँ पार्टी खोल्ने मनस्थितिमा देखिनुहुन्छ,’ निकटस्थ नेताले भने ।

प्रकाशित मिति: सोमबार, मंसिर २०, २०७८ १५:५१