रुने प्रिन्सी, प्रिज्मा ठानेर 'बले'लाई गाली गर्दै दर्शक

तस्वीर : उद्धव रसाइली

A+ A A-

अहिले सामाजिक सञ्जालमा टिकटकमा 'ट्विनी गर्ल'को नामले परिचित प्रिज्‍मा-प्रिन्सी खतिवडाकाे एउटा भिडियाे क्लिप भाइरल छ। 'रमाइलो छ' नामक युट्युब च्‍यानलमा उनीहरूले दिएको अन्तर्वार्ता र उनीहरूको रुवाबासी सामाजिक सञ्जालमा छाताछुल्ल भएको छ । टिकटकदेखि फेसबुकसम्म उनीहरूकाे भिडियाे फैलिएकाे छ ।

भिडियोमा बहिनी प्रिन्सी रोएकी छिन् । आफूले प्रेम सम्बन्धमा पाएको धोका र आफ्नो प्रेमीले गरेको गलत व्यवहार सुनाउँदै उनले आँसु झारेकी छिन् ।

उनले रुँदै भनेकी छिन्, 'मैले कहिले पनि रिलेसनसिपमा रेस्पेक्ट पाइनँ । त्योचाहिँ जहिले पनि पार्टनरबाट खोज्थेँ । मैले रेस्‍पेक्ट दिनुस् भन्दा उहाँले रिलेसनसिपमा रेस्पेक्ट अर्न गर्नुपर्छ भन्नुभाथ्यो । त्यो कुराले अहिलेसम्म हर्ट गर्छ । किनकि, म त्यो क्यारेक्टरको केटी नै हैन, जुन आफ्नो पार्टनरलाई दिएको रेस्पेक्ट गुमाओस् । संसारमा मैले सबैभन्दा हेट गर्ने उहाँलाई नै हो । मेरो आँसु उहाँलाई लाग्छ पनि होला ।'

प्रिन्सीको कुरामा कुरा मिलाउँदै दिदी प्रिज्मा थप्छिन्, 'जहाँ सम्मान छ, त्यहाँ माया आफैँ हुन्छ । भिख मागेर पाएको सम्बन्ध पनि के सम्बन्ध ?'

अन्तर्वार्तामा रुवाबासी । तस्वीर : उद्धव रसाइली

कुनै समय प्रिन्सी टिकटकबाट नै चर्चामा आएका मञ्जिल बस्नेतको प्रेममा छिन् भन्ने समाचार बन्थे । तर, दुवैले यस्ताे हल्लालाई स्विकारेका भने थिएनन् ।

उनीहरूले केही म्युजिक भिडियोमा सँगै काम गरेका थिए । त्यसैले पनि उनीहरूको सम्बन्धको चर्चा चल्ने गरेको थियो । एकसाथ देखिनु, सँगै टिकटक बनाउनु, प्रेमिल गीतहरूमा एक-अर्कालाई मेन्सन गर्नुले दर्शकमाझ उनीहरू सम्बन्धमा छन् कि भन्ने शंका उब्जाएकाे थियाे ।

प्रिन्सीकै कुराअनुसार उनीहरूकाे केही महिनाअगाडि नै ब्रेक-अप भइसकेको थियो । सम्बन्ध बिग्रेपछि मन्जिल केही समय सामाजिक सञ्जालबाट टाढा थिए । टिकटकमा अपलोड भएका सम्पूर्ण भिडियो हटाएर उनी पुर्ख्याैली घरमा लामो समय बसे । मन्जिल डिप्रेसनमा नै पुगेका छन् भन्ने गसिपहरू पनि म्युजिक भिडियो नगरीमा हल्ला थियो ।

अहिले प्रिन्सीले अन्तर्वार्तामा मन्जिलकै विषयमा टिकाटिप्पणी गरेकी हुन् भनेर अनुमान लगाउन गाह्रो नपर्ला ।

मन्जिलबारे भएको टिप्पणीबाट गाली भने सागर लम्साल 'बले'ले खानु परेको छ । सामाजिक सञ्जाल प्रयोगकर्ताहरूले 'बले'ले अत्याचार गरेको भन्दै गालीको वर्षा गरेका छन् । यसको पनि कारण छ ।

प्रिन्सी, मन्जिल, सागर र प्रिज्मा

मन्जिल र प्रिन्सीको प्रेम फक्रिँदै गर्दा सागर लम्साल 'बले' र प्रिज्माको पनि प्रेम सुरु भएको थियो । एक म्युजिक भिडियोको छायाँकन सेटमा भेट भएका बले र प्रिज्माको त्यहीँबाट प्रेम फक्रिएको थियो । प्रिज्मा र प्रिन्सी 'सक्किगोनी'का केही भागमा देखिएपछि उनीहरूको प्रेम झनै मौलायो ।

तर, पछिल्लो समय बले र प्रिज्माको ब्रेक-अपका समाचारहरू छताछुल्ल छन् । धेरै मिडियामा उनीहरूको ब्रेक-अपको गसिप लेखिएका छन् । विवाहको विषयमा कुरा नमिल्दा उनीहरू छुट्टिएको समाचार बनिरहेका छन् ।

त्यसाे त, न उनीहरूले आफूहरूबीचको प्रेम स्विकारेका थिए, न ब्रेक-अप भएको कुरालाई नै मानेका छन् । सागर यस विषयमा कुरै नगर्ने भन्दै पन्छिरहेका छन् । प्रिज्मा भने आफूहरूको लभ नै नपरेको भन्दै ब्रेक-अपको हल्लालाई गलत भएको स्पष्टीकरण दिइरहेकी छिन् ।

उनीहरूको प्रेम थियो वा थिएन, उनीहरूले नै जानुन् । तर, प्रिन्सीले अर्कै मान्छेलाई इङ्गित गरेर गरेको टिप्पणीका कारण 'बले'माथि गालीकाे वर्षा भइरहेकाे छ । प्रेममा निच व्यवहार देखाएको भन्दै बलेलाई दर्शकले गाली गरिरहेका छन् ।

जुम्ल्याहा प्रिज्मा-प्रिन्सी हेर्दा उस्तै देखिन्छन् । निकटबाहेक अरूलाई दिदी-बहिनी छुट्याउन गाह्रो पर्छ । दर्शकहरू पनि प्रिन्सीलाई प्रिज्मा देखेर 'बले'माथि खनिएका छन् ।

प्रकाशित मिति: सोमबार, मंसिर २०, २०७८ १३:१८