रियल मड्रिडमा चार वर्षपछि बल्ल भिन्दै देखिए भिनिसियस जुनियर

A+ A A-

शनिबार राति ला लिगा अन्तर्गतको खेलमा स्पेनिस क्लब रियल मड्रिडले रियल सोसिडाडको सामना गर्नुपर्ने थियो । मड्रिडको सुरुवाती ११ मा करिम बेन्जेमा, टोनी क्रुस, लुका मड्रिच, क्यासामिरोजस्ता स्टार खेलाडी मैदान उत्रिएका थिए ।

तर, शुभचिन्तक तथा खेल प्रेमीहरूको ध्यान २१ वर्षे फरवार्ड भिनिसियस जुनियरमाथि थियो । कारण, रियल मड्रिडबाट यस सिजनमा भिनिसियसले निकै उत्कृष्ट खेल प्रदर्शन गरिरहेका छन् ।

खेल सुरु भएको १६ औं मिनेटमा नै 'अट्राकिङ'मा खेलिरहेका कारिम बेन्जिमा घाइते भए । खेल्नै नसक्ने भएपछि करिम मैदानबाट बाहिरिए । अब खेलमा गोल निकाल्ने चुनौती भिनिसियसमाथि आइपर्‍याे ।

पहिलो हाफ गोलविहीन बन्यो । तर, दोस्रो हाफ सुरु हुनासाथ ४६औँ मिनेटमा भिनिसियसले रियल मड्रिडको लागि पहिलो गोल गरे, निकै उत्कृष्ट शैलीमा । जुन गाेलको अहिले निकै चर्चा भइरहेको छ ।

यस सिजनमा ला लिगामा भिनिसियसले गरेको यो १०औँ गोल हो, १६ खेलबाट । योसँगै उनी ला लिगामा सर्वाधिक गोलकर्ताको दोस्रो स्थानमा छन् ।

त्यस्तै, च्याम्पियन्स लिगमा पनि भिनिसियसले गोल गर्न सफल भएका छन् । यस सिजन च्याम्पियन्स लिगमा ५ खेल खेलेका भिनिसियसले २ गोल गरेका छन् ।

भिनिसियस गोलका कारणमात्र चर्चामा आएका होइनन्, उनले खेलमा देखाउने 'स्किल' निकै प्रशंसनीय छ । अग्रपंक्तिमा खेल्ने भिनिसियसले विपक्षीको रक्षापंक्तिमा रहेका खेलाडीलाई लामो समयसम्म छक्याउन सक्छन् । विपक्षी खेलाडीलाई झुक्याउने उनको शैली तारिफयोग्य छ ।

आलोचनापछिको यो चर्चा

भिनिसियसले यसै सिजनबाट मात्र आफ्नो प्रशंसा सुन्न पाएका छन् । नत्र उनले गाली र ट्रोलहरू खेपिरहनु पर्थ्यो ।

आलोचना नहोस् पनि किन ? रियल मड्रिडले उनलाई जे सोचेर क्लबमा भित्र्याएको थियो, त्यो प्रस्तुति उनले दिन सकेका थिएनन् । प्रशिक्षकले निकै मौका दिँदा पनि भिनिसियसले अपेक्षित खेल काैशल देखाउन सकेका थिएनन् ।

सन् २०१८ मा रियल मड्रिड प्रवेश गरेका भिनिसियसको सुरुवाती सिजनबाट नै खराब प्रदर्शन रह्यो । उक्त सिजनमा ३४ खेल खेलेका भिनिसियसले जम्मा ४ गोल गरे । २०१९-२० र २०२०-२१ मा पनि उनको प्रदर्शन निराशजनक थियो ।

खेलमा खराब प्रदर्शन गरेकै कारण भिनिसियसले रियल मड्रिडकै शुभचिन्तकबाट गाली सुन्नु परेकाे थियाे । गत सिजनमा भिनिसियसले प्राय: सबै खेल खेले । तर, जम्मा ५ गोल मात्र गरे । जुन लजास्पद थियो ।

यस सिजनको सुरुवातमा भिनिसियसबारे धेरै ट्रोल बने, 'के भिनिसियलले गत सिजनको ५ गोलको रेकर्ड ब्रेक गर्लान् ?'

सुरुवाती खेलबाट नै भिनिसियसले ट्रोल गर्नेहरूको मुख बन्द गरिदिए । किनकि, उनले त्यो रेकर्ड ब्रेक गर्नलाई धेरै समय लगाएनन् । ती ट्रोल गर्नेहरू अहिले उनको तारिफ गरिरहेका छन् । भिनिसियसलाई रियल मड्रिडको उदाउँदो तारा भनेर व्याख्या गर्नेहरूको संख्या धेरै छ ।

सुधारिएको खेल

भिनिसियसले यसअघिका सिजनमा 'वान भर्सेस वान'मा पनि गोल गर्न नसकेका उदाहरण छन् । सही निर्णय गर्न नसक्दा तथा आत्तिदा उनी बारम्बार गोल गर्नबाट चुक्थे । उनको प्रहार पनि फितलो देखिन्थ्यो ।

तर, यस सिजनमा भने भिनिसियसले खेलमा राम्रो निर्णय लिइरहेको देख्न सकिन्छ । उनको प्रहार पनि उत्कृष्ट छ । शान्त बनेर मैदान उत्रिने भिनिसियस खेलमा विश्वस्त देखिन्छन् । उनले तनावरहित खेल खेलिरहेको देख्न सकिन्छ ।

एक खेल म्यागजिनले त लेख्याे नै, 'भिनिसियसको सर्वाधिक सुधारिएको खेल' ।

साच्चिकै यस सिजनमा भिनिसियसले आफूलाई उलटपुलट बनाएका छन् । प्रशिक्षक कार्लो एन्सोलोटीसँग उनको सहकार्य जमेको छ । सधै गोल गर्नबाट चुक्ने भिनिसियसलाई एन्सोलोटीले गोल गर्न सक्ने बनाएका छन् ।

निरन्तर गोल गरेर प्रशंसा पाइरहँदा भिनिसियस दंग छन् । उनले भन्ने गरेका छन्, 'मलाई मेरो खेलले नै उर्जावन बनाइरहेको छ । गोल गर्दा तथा शुभचिन्तकबाट प्रशंसा पाउँदा म खुसी छु ।'

भिनिसियसकाे फुटबल करिअर

ब्राजिलियन भिनिसियसले आफ्नो फुटबल करिअर त्यहीँकाे क्लब फ्लामिङ्गोबाट सुरु गरेका हुन् । त्यहाँकै एकेडेमीबाट फुटबल प्रशिक्षण गरेका भिनिसियसले अन्डर–२० बाट व्यावसायिक फुटबल खेल्न सुरु गरेका हुन् ।

फ्लामिङ्गोको मुख्य टिममा परेपछि भिनिसियसमाथि धेरैको आँखा परेको थियो । किनकि, उनले पहिलो सिजनमा नै उत्कृष्ट खेल प्रदर्शन गरेका थिए ।

भिनिसियसलाई आफ्नो टिममा भित्राउन धेरै क्लबले प्रयास गरेका थिए । स्पेनिस क्लब बार्सिलोना पनि भिनिसियसलाई आफ्नो टिममा लिन चाहन्थ्यो । सोही समय रियल मड्रिडले पनि भिनिसियसलाई प्रस्ताव गर्‍याे । उक्त प्रस्तावलाई स्विकार्दै उनी रियल मड्रिड पुगे ।

उनले भनेका छन्, 'मलाई धेरै क्‍लबबाट अफर थियो । बार्साबाट पनि थियो । तर, मेरो भविष्य रियलमा देखेर नै यहाँ आएको हुँ ।'

भिनिसियस रियल मड्रिड भित्रिँदा जुलेन लोपेटेगुई प्रशिक्षक थिए । उनले भिनिसियसलाई राम्रो मौका दिएका थिए । तर, पछि क्लबले प्रशिक्षक लोपेटेगुईलाई बर्खास्त गरिदियो ।

त्यसपछि मुख्य प्रशिक्षक बनेर रियल मड्रिडमा आएका सान्टियागो सोलारीले भिनिसियसलाई चिनाए भन्दा फरक नपर्ला । भिनिसियस के हुन् ? उनको प्रतिभा कुन स्तरको छ ? भन्ने प्रमाण दिन सोलारीले धेरै सहयोग गरेका छन् । तर, सोलारी रहँदा पनि भिनिसियस चम्किनचाहिँ सकेनन् ।

रियल मड्रिडका स्टार खेलाडी जिदान बनेर रियल प्रवेश गरेपछि पनि भिनिसियसले राम्रो मौका पाएका थिए । तर, जिदानको समयमा पनि भिनिसियसको खेल करिअर खराब रह्यो । राम्रो खेले पनि उनी गोल गर्नबाट चुकिरहे ।

जारी २०२१–२२ को सिजनमा कार्लो एन्सोलोटी प्रशिक्षक बनेर आएपछि भिनिसियस भिन्न देखिइरहेका छन्र । अहिले उनी गोल त गरिरहेकै छन्, खेलमा पनि उत्तिकै राम्रो प्रभाव छाेडिरहेका छन् ।

प्रकाशित मिति: आइतबार, मंसिर १९, २०७८ १३:५१