बागमतीमा त्रीपक्षीय भिडन्त

A+ A A-

नेपाली कांग्रेसको बागमती प्रदेश अधिवेशनअन्तर्गत सभापतिसहित पदाधिकारीमा त्रिपक्षीय भिडन्त हुने पक्का भएको छ ।

कांग्रेस बागमती प्रदेशको नेतृत्वका लागि संस्थापन पक्षबाट इन्द्रबहादुर बानियाँ (मकवानपुर), वरिष्ठ नेता रामचन्द्र पौडेल समूहबाट जगदिश्वर नरसिंह केसी (नुवाकोट) र नेता कृष्ण सिटौलाको समूहबाट भीमसेनदास प्रधान (काठमाडौं)ले उम्मेदवारी दर्ता गराएका हुन् । निर्वाचन कार्यतालिका अनुसार शुक्रबार बानियाँ, केसी र प्रधानले उम्मेदवारी दर्ता गराएपछि त्रिपक्षीय चुनावी प्रतिस्पर्धा पक्का भएको हो ।

अधिवेशनमा ८ पदाधिकारीसहिन कुल ९१ पदका लागि दुई सय ५७ जनाको उम्मेदवारी परेको निर्वाचन समितिले जानकारी दिएको छ । अधिवेशनले सभापतिसहित ८ जना पदाधिकारी र ८३ जना सदस्य चयन गर्नेछ । खुलातर्फ ४८ र ३५ जना समावेशीतर्फबाट सदस्य निर्वाचित हुनेछन् । तर, खुल्ला सदस्यमा ८५ जना र समावेशी सदस्यतर्फ एक सय ४८ जनाको उम्मेदवारी परेको हो ।

यसैगरी देउवा–सिटौला पक्षबाट एक मात्र सभापतिको उम्मेदवार बनाउने कसरत गरिए पनि बानियाँ र प्रधानले आ–आफ्नो अडान नछाडेपछि छुट्टाछुट्टै उम्मेदवारी दिएका हुन् । प्रधानलाई मनाउन संस्थापन पक्षले शुक्रबार साँझसम्मै प्रयास गरेको नेताहरूले बताएका छन् । निर्वाचन कार्यतालिका अनुसार साँझ ६ बजे उम्मेदवारको अन्तिम नामावली प्रकाशन गर्नुपर्नेमा संस्थापन पक्षबाट समय धकेलिएको जनाइएको छ । तोकिएको समय भन्दा ढिला गरी उम्मेदवारहरूको अन्तिम नामावली प्रकाशन गरिएको थियो ।

केसी संस्थापनइतर पक्षबाट एक्ला उम्मेदवार बनेका छन् । सभापतिमा दाबी गर्दै आएका मधु आचार्य, रमेश धमला र राजुनाथ जोशीले केसीलाई समर्थन गर्ने निधो भएपछि नुवाकोटका केसी संस्थापनइतरबाट एक्ला उम्मेदवार तय भएका हुन् । उनलाई कांग्रेस नेता पौडेलसहित पूर्वमहामन्त्री प्रकाशमान सिंह, डा.रामशरण महत, अर्जुननरसिंह केसी, गगन थापालगायतका नेताहरूको समर्थन छ ।

बानियाँलाई सभापतिमा विजयी गराउन केन्द्रीय नेताहरू सहमहामन्त्री प्रकाशशरण महत, केन्द्रीय सदस्य महालक्ष्मी डिना उपाध्याय हेटौंडामा क्रियाशील छन् । प्रधानको पक्षमा केन्द्रीय नेताहरू भने देखिएका छन् । प्रधानले प्यानलसहितको उम्मेदवारी घोषणा पनि गरेका थिएनन् । केसी र बानियाँले भने छुट्टाछुट्टै प्यानलसहित उम्मेदवारी घोषणा गरेर उम्मेदवारी दर्ता गरेका थिए ।

यसैगरी केसीको प्रस्तावकमा मधुप्रसाद आचार्य र सर्मथकमा कृष्ण बानियाँ (सबुज) छन् । त्यस्तै अर्का सभापति पदका प्रत्यासी बानियाँको प्रस्तावकमा तीर्थ लामा र सर्मथकमा दुर्लभ थापा छन् । अर्का उम्मेदवार प्रधानको प्रस्तावकमा शिवप्रसाद हुमागाईँ र सर्मथकमा कुन्दनराज काफ्ले छन् ।

बानियाँको प्यानलमा उपसभापति पदका लागि मदनकृष्ण श्रेष्ठ (भक्तपुर) र धर्मराज गौतम (काठमाडौं), महामन्त्रीमा राजु श्रेष्ठ (काठमाडौं) र तिलक रुवाली (धादिङ), सहमहामन्त्रीमा हरिशरण श्रेष्ठ (सिन्धुपाल्चोक), महेन्द्र थिङ र महिलातर्फ निरु खड्का (ललितपुर) उम्मेदवार छन् । सभापतिका अर्का प्रत्यासी उम्मेदवार केसीको प्यानलमा उपसभापतिमा राजेन्द्र बुर्लाकोटी र मोहनबहादुर बस्नेत, महामन्त्री पदका लागि माइकल रामचन्द्र अर्याल र कञ्चनचन्द्र बादे श्रेष्ठ छन् । सहमहामन्त्रीमा ऋषिराम घिमिरे, दिलबहादुर तामाङ र महिलातर्फ जीवन डंगोल छन् ।

प्रधान नेतृत्वको प्यानलमा उपसभापति पदका लागि पर्शुराम पोख्रेल र चन्द्र महर्जन उम्मेदवार रहेका छन् । महामन्त्री पदमा गौरीप्रसाद दुवाडी र सुरेश श्रेष्ठ, सहमहामन्त्रीमा जयनारायण सापकोटा, राजकुमार पाठक र महिलातर्फ मोतीमाया तामाङको उम्मेदवारी रहेको निर्वाचन समितिले जानकारी दिएको छ ।

अधिवेशनबाट प्रदेश सभापति एक, उपसभापति दुई, महामन्त्री दुई, सहमहामन्त्री तीन महिलासहित र ८३ जना सदस्यसहित ९१ जनाको प्रदेश कार्यसमिति चयन गरिने भएको छ । निर्वाचन कार्यतालिका अनुसार आज बिहान ९ बजेदेखि अपराह्न ४ बजेसम्म मतदान हुनेछ । प्रदेश प्रतिनिधिकारूपमा चुनिएर आएका करिब दुई हजार १ सय ३७ मतदाताले मतदान गर्ने प्रदेश निर्वाचन समितिका संयोजक वरिष्ठ अधिवक्ता केशवप्रसाद काफ्लेले जानकारी दिए ।

प्रकाशित मिति: शनिबार, मंसिर १८, २०७८ ०६:२८