कोरोनाको ओमिक्रोन भेरियन्ट देखिएपछि मलेसिया र खाडीका देशमा कडाइ, नेपाली कामदार प्रभावित होलान् ?

कोरोनाको ओमिक्रोन भेरियन्ट देखिएपछि मलेसिया र खाडीका देशमा कडाइ, नेपाली कामदार प्रभावित होलान् ?

A+ A A-

दक्षिण अफ्रिका हुँदै कोभिड-१९ को ओमिक्रोन भेरियन्ट विश्वका विभिन्न मुलुकमा फैलिइरहेकाे छ । नेपालीहरू कार्यरत मलेसिया, खाडीका देश, दक्षिण कोरिया र युरोपलगायत करिब ३१ मुलुकमा ओमिक्रोन भेरियन्ट पुष्टि भइसकेकाे छ ।

कोरोनाका कारण करिब दुई वर्ष थला परेको वैदेशिक रोजगारी क्षेत्र कोरोनाविरुद्धको खोप आएपछि लयमा फर्किन थालेको थियो । तर, ओमिक्रोनको संक्रमण बढेपछि पुनः यो क्षेत्र प्रवाभित हुने देखिएकाे छ । पछिल्लो समय नेपाली कामदारहरूको गन्तव्य देशमा समेत ओमिक्रोन भाइरस फेला परेपछि ती देशले भिसा लागेका कामदारसमेत केही समयका लागि लिन बन्द गर्ने थालेका छन् ।

यूएई

नेपाली कामदारको मुख्य रोजगार गन्तव्य देश यूएईमा कोरोनाको नयाँ भेरियन्ट ओमिक्रोनको संक्रमण देखा परेको छ । यूएई सरकारले यो भाइरस नियन्त्रणका लागि प्रयास भइरहेको जनाएको छ । यूएईमा गत बुधबार अर्को एक खाडी मुलुक हुँदै आइपुगेका अफ्रिकी नागरिकमा ओमिक्रोन भेरियन्ट पुष्टि भएको थियो । यूएईले दक्षिण अफ्रिका, नामिबिया, बोत्सवाना, जिम्बाबे, मोजाम्बिक, लेसोथो र इस्वाटिनी गरी सातवटा देशबाट आउन बन्देज लगाएको छ ।

नेपाली कामदारका हकमा भने अहिलेसम्म आधिकारिक निर्णय केही नभएकाे यूएईस्थित नेपाल दूतावासले जनाएको छ । यूएई रोजगारीमा जानका लागि करिब ७ हजार कामदारले श्रम स्वीकृति लिएको वैदेशिक रोजगार विभागले जनाएको छ ।

कतार

कतारमा पनि कोरोनाको नयाँ भेरियन्ट पुष्टि भएकाे छ । कतारमा रोजगारीका लागि आएका एक जोडी अफ्रिकी नागरिकमा गत मंगलबार ओमिक्रोन देखा परेको थियो । कतारले पनि तत्कालका लागि दक्षिण अफ्रिका, नामिबिया, बोत्सवाना, जिम्बाबे, मोजाम्बिक, लेसोथो र इस्वाटिनीलगायत २६ देशबाट आउने विदेशी नागरिकका लागि प्रतिबन्ध लगाएको छ ।

कतार रोजगारीमा जानका लागि १५ हजारभन्दा धेरै नेपाली कामदारले श्रम स्वीकृति लिएको तथा ७ हजारभन्दा धेरैले हवाई टिकट लिइसकेको विभागले जनाएको छ । ओमिक्रोन भाइरस फेला परेपछि कतारले नेपाली कामदारका विषयमा भने केही आधिकारिक निर्णय नगरेको र तत्काल नेपाली कामदार नरोकिने कतारस्थित नेपाली दूतावासले जनाएको छ ।

साउदी अरब

साउदी अरबको स्वास्थ्य मन्त्रालयले बुधबार उत्तर अफ्रिकी देशबाट आएका एक साउदी नागरिकमा कोभिड–१९ को ओमिक्रोन भेरियन्ट भेटिएपछि संक्रमित नागरिक र उनीसँग नजिकको सम्पर्कमा रहेकाहरूलाई सम्बन्धित स्वास्थ्य प्रक्रियाहरू अवलम्बन गरी अलग्गै राखिएको बताएको छ ।

साउदी अरेबियाले दक्षिण अफ्रिका, नामिबिया, बोत्सवाना, जिम्बाबे, मोजाम्बिक, लेसोथो र इस्वाटिनी जाने र आउने उडानहरू बन्द गर्दै अर्को सूचना नआएसम्मका लागि ती देशसँग सबै उडान बन्द गरेको प्रेस विज्ञप्ति जारी गरेको छ ।

साउदीमा रोजगारीका लागि जान ९ हजारभन्दा बढी कामदारले श्रम स्वीकृति लिएको र ४ हजारभन्दा धेरै हवाई टिकट लिएर उडानको तयारीमा रहेको विभागले जनाएको छ । यस्तै, मलेसिया, कुवेत, ओमान, बहराइन र जोर्डनले समेत अफ्रिका, नामिबिया, बोत्सवाना, जिम्बाबे, मोजाम्बिक, लेसोथो र इस्वाटिनी आउने नागरिकलाई प्रतिबन्ध लगाएका छन् । यी देशले नेपालीका कामदारका हकमा भने अहिलेसम्म आधिकारिक निर्णय नगरेको त्यहाँ नियोगहरूले जानकारी दिएका छन् ।

इजरायल पनि बन्द

पहिलो चरणमा केयर गिभरमा इजरायल जाने तयारीमा रहेका सबै विदेशी नागरिकहरूका लागि इजरायलमा प्रवेश निषेध गरिएको छ । इजरायलले अर्को सूचना जारी नगरेसम्म इजरायल कामदार पठाउने प्रक्रिया रोकिन सक्ने संकेत विभागले गरेको छ । दक्षिण अफ्रिका र अन्य ६ अफ्रिकी देशहरूलाई रेड लिस्टमा राख्दै ती देशबाट स्वदेश फर्कने इजरायलीहरूले १४ दिनको क्वारेन्टाइन बस्नुपर्ने व्यवस्था गरेको छ ।

दक्षिण कोरिया

दक्षिण कोरियामा पनि कोरोनाको नयाँ भेरियन्ट ‘ओमिक्रोन’ फेला परेको छ । कोरियाको रोग नियन्त्रण तथा रोकथाम एजेन्सी (केडीसीए) का अनुसार हालै नाइजेरियाबाट दक्षिण कोरिया आएका एक दम्पतीमा नयाँ भेरियन्ट ओमिक्रोन देखिएको हो ।

कोरियाले शनिबारदेखि लागू हुने गरी दक्षिण अफ्रिकासहित बोत्स्वाना, जिम्बाबे, नामिबिया, लसोथो, मोजाम्बिक, मालावीलगायतबाट हवाई उडानसहित आवागमनमा अनिश्चितकालका लागि प्रतिबन्ध लगाएको छ । अन्य देशका हकमा भने नयाँ भेरियन्ट देशमा फैलिनबाट रोक्नका लागि विभिन्न नियमको घोषणा गरिएको छ ।

ओमिक्रोन कोरियामा देखिएपछि यहाँ रहेका नेपालीमा पनि त्रास फैलिएको छ । ओमिक्रोनका कारण नेपाली श्रमिक कोरिया ल्याउने काम फेरि रोकिन सक्ने खतरा बढेको छ । आगामी साता कोरिया रोजगारीका लागि उड्न तयारी अवस्थामा रहेका कामदारलाई समेत नयाँ भेरियन्टका कारण प्रभाव परेको छ । अहिलेसम्म कोरियाबाट केही जानकारी नआएकाले उनीहरू समयतालिका अनुसार पठाइने वैदेशिक रोजगार विभागअन्तर्गतको ईपीएस शाखाले जनाएको छ ।

जापान

सानो संख्यामा भए पनि नेपाली कामदार जाने जापानले नयाँ भेरियन्टका कारणले मंगलबारदेखि विदेशीहरूलाई आफ्नो देश प्रवेशमा रोक लगाएको बताएको छ । अर्को सूचना जारी नभएसम्म कुनै विदेशी नागरिकलाई प्रवेशमा रोक लगाइएको त्यहाँको अध्यगमन विभागले जनाएको हो ।

अस्ट्रेलियाले न्युजिल्यान्ड र सिंगापुरबाहेक सबै देशका नागरिकहरूका लागि १५ डिसेम्बरसम्म सीमाना बन्द गरेको छ । साथै, अस्ट्रेलिया नागरिक र अस्ट्रेलियन पीआर भएकाहरूका लागि ७२ घण्टाभित्रको पीसीआर रिपोर्ट र घर वा होटलमा आइसोलेसनमा बस्नका लागि नयाँ नियम बनाएको छ ।

कोरोनाविरुद्धको खोप आएपछि नेपालबाट वैदेशिक रोजगारीमा जाने क्रममा तीव्रता आएको थियो । गत कात्तिकमा ५४ हजार ९ सय १८ जना वैदेशिक रोजगारीमा जान श्रम स्वीकृति लिएका थिए ।

१५ मंसिरसम्ममा ३० हजारभन्दा धेरै श्रम स्वीकृति जारी भएको वैदेशिक रोजगार विभागले जनाएको छ । विभागका अनुसार तीन सातामा ४० हजारभन्दा बढी नेपाली कामदारले विभिन्न देश रोजगारीमा जानका लागि टिकटसमेत लिइसकेका छन् ।

प्रकाशित मिति: शुक्रबार, मंसिर १७, २०७८ १५:४५