म राजनीतिमा दर्शक होइन, खेलाडी बन्न आएकी हुँ : रेखा थापा

A+ A A-

कलाकारिताबाट राजनीतिमा प्रवेश गरेकी रेखा थापा गत बुधबारदेखि सुरू राष्ट्रिय प्रजातन्त्र पार्टी (राप्रपा)को महाधिवेशनमा नेतृत्वकाे दौडमा होमिएकी छिन् । पार्टीभित्रकाे महत्त्वपूर्ण मानिने महामन्त्रीको महिला कोटामा रेखाले उम्मेदवारी दिएकी छिन् । विगतमा अध्यक्ष कमल थापाबाट प्रभावित भएर राप्रपा प्रवेश गरेकाे बताउने रेखा अहिले उनै थापाविरुद्ध राजेन्द्र लिङ्देनको प्यानलबाट उम्मेदवारी दिएकी हुन् ।

रेखा पार्टीमा नयाँ नेतृत्वको खाँचो देखिएकाले उम्मेदवारी दिएको बताउँछिन् । शिलापत्रसँगको कुराकानीमा उनले भनिन्, 'लामो समयदेखि पार्टीको नेतृत्वमा एक-दुई वटा अनुहार दोहोरिरहनु भयो । उहाँहरूको नेतृत्वमा पनि जनताले अपेक्षा गरेअनुसारको काम भएन । त्यसैले अब नयाँ पुस्ताले नेतृत्व लिनुपर्छ भनेर नै उम्मेदवारी दिएकी हुँ ।'

नेपालका पार्टीहरूमा जहिल्यै युवा पुस्ता नेतृत्वमा आउनुपर्छ भन्ने आवाज उठ्ने गर्छ । तर, त्यसको अभ्यास खासै नभएको भन्दै रेखाले राप्रपाको यो महाधिवेशन उनीहरूको लागि पनि उदाहरण भएको बताइन् ।

'हामीले अन्य पार्टीमा पनि युवा नेतृत्व चाहिन्छ भन्ने सुनिरहेका छौँ । तर, खोई त उहाँहरूले आँट गर्नुभएको ?', रेखा भन्छिन्, 'मेरो उम्मेदवारी युवापुस्ताको परिक्षणका लागि पनि हो ।'

रेखाले आफ्नो उम्मेदवारी युवा मात्र होइन, महिलाको पक्षमा पनि भएको बताइन् । उनले भनिन्, 'पार्टी भित्रै पनि नेतृत्वले महिलाहरूलाई भनेजस्तै स्थान दिइएको पाइएको छैन । ठाउँमा पुगेका नेतृहरूले पनि त्यसको विषयमा बोलेको आवाज सुनिएन । अब उहाँहरूको आवाज सुन्नको लागि मैले नेतृत्वमा जाने निर्णय गरेकी हुँ ।'

कमल थापाबाट प्रभावित भएर राप्रपामा प्रवेश गरेकी रेखा अहिले उनै कमलका प्रतिस्पर्धी राजेन्द्र लिङ्देनको पक्षबाट चुनाव लड्दैछिन् । यसको एउटै कारण हो- नयाँ नेतृत्व ।

लिङ्देनको पक्षमा लाग्नुको कारणबारे रेखाले भनिन्, 'नेतृत्वमा एउटै अनुहार दोहोरिरहेको समयमा उहाँले उम्मेदवारी दिएर क्रान्ति गर्नुभएको छ । नयाँ मान्छेलाई साथ दिनुपर्छ भनेर नै म उहाँको पक्षमा उभिएको हुँ ।'

रेखासँग प्रतिस्पर्धा गर्न कमल थापाको प्यानलबाट कुन्ती शाही महामन्त्री (महिला) पदको उम्मेदवार बनेकी छिन् । कुन्ती राजनैतिक पृष्ठभूमिबाट आएकी नेतृ हुन् । रेखाले राजनीतिमा होमिएको लामो समय भएको छैन । उनको पृष्ठभूमि सिनेमा हो ।

रेखालाई प्रश्‍न थियो- राजनैतिक पृष्ठभूमिबाट आएकी कुन्ती शाहीसँग चुनावी मैदानमा हुनुहुन्छ । जित्ने आधार के देख्नुभएको छ ?'

रेखा आफू झण्डामुनि बसेर राजनीति नगरे पनि आफ्नो क्षेत्रबाट लामो समयदेखि राजनीति गरिरहेको तर्क गर्छिन । उनले भनिन्, 'राजनीतिक पृष्ठभूमिबाट आउने भनेको पार्टीकै झण्डा बोकेर पार्टीकै झण्डा मुनि बसेर काम गर्नुपर्छ भन्ने होइन । राजनीति भनेको समाजसेवा हो । मैले मेरो क्षेत्रबाट कलाकारिता क्षेत्रबाट यत्तिका समय समाजलाई परिवर्तनको लागि आवाज उठाइरहेको छु । के त्यसको मुल्याङ्कन हुन्न होला र ?'

रेखा राजनीतिक पृष्ठभूमिबाट आएका व्यक्तिहरूको परिक्षण भइसकेको र अब नयाँलाई परिक्षण गर्ने बेला आएको दोहोर्‍याउँछिन् ।

उनले थपिन्, 'मैले प्रतिस्पर्धा गर्न लागेको उम्मेदवार दुई पटक मन्त्री भइसक्नु भएको छ । तर, उहाँले महिलाको पक्षमा खासै बोल्नुभएको पाइएन । त्योमात्र होइन, उहाँले त अब खुल्लामा उम्मेदवारी दिएर नयाँ मान्छेलाई महिला काेटामा पालो दिनुपर्ने हो नि । त्यो पनि देखिएन । मेरो उम्मेदवारी चुप लागेर बस्नेहरू विरुद्ध पनि हो ।'

चुनावी माहोल हेर्दा आफूले जित्ने कुरामा रेखा आशावादी छिन् । तर, हारजितको कुनै पर्वाह उनलाई छैन । 'प्रतिस्पर्धा हो हारजित हुन्छ । त्यो स्वभाविक हो', रेखाले भनिन्, 'तर, जिते पनि नजिते पनि यो एउटा क्रान्ति भने हो । हामीले नयाँ पुस्ताको लागि क्रान्‍ति गरेका छौँ ।'

'म राजनीतिमा दर्शक बनेर बस्न आएकी हैन । म खेलाडी बन्न रुचाउने मान्छे हो', रेखाले फिल्मी डाइलगजस्तै जवाफ दिइन् ।

प्रकाशित मिति: शुक्रबार, मंसिर १७, २०७८ १२:३१