'चपली हाइट-३' र 'पुष्पा' विवाद : निर्णयकर्ता आफैँ, उल्लंघनकर्ता नि आफैँ

A+ A A-

अर्जुन कुमारको निर्माणमा बनेको फिल्म 'चपली हाइट ३' पुस २ बाट रिलिज हुने तरखरमा छ । कोरोना भाइरसको महामारीपछि रिलिज हुन लागेको यो नै पहिलो 'विग बजेट' फिल्‍म हो ।

फिल्मकर्मीसँगको सल्लाहपछि नै अर्जुन कुमारले रिलिज गर्ने आँट गरेका हुन् । धेरैले उनलाई सहयोगको आश्वासन दिएपछि करोडौँ लगानीमा निर्मित फिल्म रिलिजमा उनले दाउ थापेका छन् ।

तर जब अर्जुनले फिल्मको प्रचार-प्रसार सुरु गरे, तब उनले भनेजस्तो साथ भने पाएका छैनन् । भन्छन्, 'मैले आर्थिक सहयोग गर्दिनुस् भनेको छैन । तर, यहाँ त नैतिक सहयोग पनि पाइएन ।'

अर्जुनले फिल्मकर्मीबाट साथ त पाएनन् नै । बरु उनको फिल्मसँग जुधाउन विदेशी फिल्म भित्र्याइयो । 'चपली हाइट ३'सँगै दक्षिण भारतीय फिल्म 'पुष्पा' हलमा प्रदर्शित हुँदैछ। वितरक मनोज राठीले उक्त फिल्म नेपालमा चलाउने अधिकार लिएर नेपालमा रिलिज गर्न लागेका छन् ।

आफ्नो फिल्मसँग विदेशी फिल्म रिलिजकाे मिति तय गरेपिछ निर्माता अर्जुन कुमार आक्रोशित छन् । एक साताअघि एक पत्रकार भेटघाट कार्यक्रममा उनले भने, 'दक्षिण भारतीय फिल्मलाई हिन्दी डब गरेर नेपाल भित्र्याउनु नेपाली फिल्ममाथिको गद्दारी हो ।'

अर्जुनको आक्रोष यतिमै राेकिएन । उनले थपे, 'हिन्दी फिल्म आउँदा हामीले केही भनेका थिएनौँ । अब साउथको हिन्दी डब ल्याएर नेपाली फिल्मलाई जिस्काउन खोज्दैछन् । ती मान्छेहरू नेपाली फिल्मक्षेत्रका लागि घातक हुन् ।’

अर्जुनको यस्ताे आक्रोशका पछाडि केही आधार छन् । हलवाला तथा वितरकहरूको छाता संगठन 'नेपाल चलचित्र संघ'ले काेभिड–१९ महाव्याधिपछि हल खोल्ने निर्णय गर्दा केही नियमहरू बनाएको थियो । पहिलो- एक फिल्म रिलिज भएको २ हप्तापछि मात्र अर्को फिल्म रिलिज गर्नुपर्ने । दोस्रो- नेपाली फिल्म रिलिज हुँदा कुनै विदेशी फिल्म रिलिज गर्न नपाइने ।

तर, संघले बनाएको नियम उल्ङ्घन गर्दै वितरक राठीले विदेशी फिल्मलाई नेपाली फिल्मसँग जुधाएकाे भन्दै नेपाली फिल्मका लगानीकर्ता रूष्ट बनेका छन् ।

खुट्टा ढोग्छु, नेपाली फिल्ममाथि गद्दारी नगर्दिनुस्: अर्जुन कुमार

निर्माता अर्जुन कुमार आफूले अहिले आक्रोश नपोखेर आग्रह गरिरहेको बताउँछन् । उनले भने, 'यो समय भनेको नेपाली फिल्मलाई साथ दिनुपर्ने समय हो । तर, यहीँ समयमा नेपाली फिल्ममाथि गद्दारी भइरहेको छ । नेपाली फिल्मका दलालहरू सलबलाएका छन् ।'

नेपाली चलचित्र संघले बनाएको नियम उनीहरूले नै तोडिरहेको अर्जुनको गुनासो छ । पैसाका लागि उनीहरूले नेपाली फिल्मलाई मारिरहेको अर्जुनले बताए । 'सबैथोक पैसा होइन । पैसाकै लागि नेपाली फिल्मलाई नमारिदिनुस् । यो पीडित निर्माताको अनुरोध भयो', अर्जुनले विनय गरे ।

हिन्दी डब फिल्मको विरुद्धमा आवाज चर्को गरिरहदा अर्जुनले नेपाली फिल्मकर्मीबाट नै साथ पाएका छैनन् । उनलाई अर्ती-उपदेश दिनेहरू धेरै छन् । तर, उनीसँगै आवाज मिसाउने कोही छैन । अर्जुनको चित्त दुखाइ यहाँ पनि छ ।

'मैले मेरो फिल्मको लागि मात्र आवाज उठाएको होइन । नेपाली फिल्मक्षेत्रका लागि आवाज उठाएको हो,' अर्जुनले भने, 'यस्तो बेला मलाई कसले साथ दिनुभएको छ र ? सामाजिक सञ्जालमा अर्ती उपदेश दिँदैमा के हुन्छ ?'

अर्जुन नेपाली फिल्मक्षेत्रलाई चलायमान गराउनकै लागि आफूले २ करोडको दाउ खेलेको बताउँछन् । व्यक्तिगत स्वार्थभन्दा माथि उठेर कसैले फिल्म रिलिज गर्ने आँट नगर्दा आफू अगाडि सरेको अर्जुनको भनाइ छ ।

'मेरो मात्र स्वार्थ थियो भने म अहिले किन फिल्म रिलिज गर्न अगाडि सर्थें र ? म त फिल्मक्षेत्र केही चलायमान होस् भन्ने सोचेर नै रिलिज गर्न लागेको थिएँ । तर, गर्न खोज्नेलाई दिइन्न यहाँ', अर्जुनले भने, 'नेपाली फिल्मक्षेत्रमा धमिरा धेरै छन् ।'

नेपाली फिल्मको अस्तित्वका लागि लडाइँ गर्दा आफू भित्र-भित्रै रोइरहेको अर्जुनले सुनाए । 'नेपाली निर्मातालाई दलालहरूले माग्ने बनाए,' अर्जुनले गुनासो गरे ।

नेपाली फिल्मलाई नेपाली फिल्मकर्मीले नै साथ नदिए आफू २ पुसबाट पछि हट्ने सोचमा छन् उनी । उनले भने, 'यी दलालहरूले नेपाली फिल्मलाई सिध्याउनै खोजेका छन् । यस्तो अवस्थामा म मात्र होइन, अरुलाई पनि फिल्म रिलिज नगर्न भन्छु म त । यिनीहरूले कसै न कसै गरी नेपाली फिल्मलाई सिध्याउँछन् ।'

अशोक शर्मा भन्छन्, 'अर्जुनले नै नियम तोडे'

नेपाल चलचित्र संघको उक्त निर्णयको संयोजक थिए, अशोक शर्मा ।

अशोक अहिले आफ्नो बचाउ गरिरहेका छन् । शिलापत्रसँगको कुराकानीमा उनले भने, 'हामीले नेपाली फिल्म नजुधाउने भनेका हौँ । विदेशी फिल्म हाम्रो हातको कुरा होइन ।'

नेपाली फिल्मलाई समर्थन गर्ने इच्छा भए पनि विदेशी फिल्मको रिलिज रोक्न नसकिने उनको भनाइ छ । 'हामीले रोकेर विदेशी फिल्‍मको रिलिज रोकिने हुँदैन । उनीहरूले विश्वभर त्यही मितिमा रिलिज गरेका हुन्छन्', अशोकले भने, 'नेपालमा रिलिज रोक्‍ने हो भने सरकारी तवरबाट नै रिलिज रोक्ने निर्णय हुनुपर्छ । नत्र हाम्रो केही सिप लाग्दैन ।'

यो त विदेशी फिल्मको कुरा । 'चपली हाइट ३' रिलिज भएको अर्को साता नेपाली फिल्म 'चुरीफुरी' रिलिज हुँदैछ । अशोकलाई प्रश्न गरियो, 'नेपाली फिल्मले चाहिँ किन तपाईंहरूको नियम तोडे त ?'

अशोक अहिले फिल्मकर्मीहरूसँग आक्रोशित बनिरेहका अर्जुन कुमारले नै नियम तोडेको बताउँछन् । उनले भने, 'चुरीफुरीले चपली हाइट ३ भन्दा अगाडि नै रिलिज मिति तोकेको थियो । त्यो कुरा अर्जुन कुमारलाई पनि जानकारी दिएका थियौँ । मलाई एक हप्ता भए पनि पुग्छ भन्दै उहाँले नै फिल्म रिलिज गर्न हाम्रो निर्णय तोड्नुभएको हो ।'

अशोकका अनुसार उक्त निर्णय हुँदा चलचित्र विकास बोर्डको प्रतिनिधिका रूपमा अर्जुन कुमार पनि सँगै थिए । अशोक आफूले गरेको निर्णय अर्जुन आफैँले तोडेको बताउँछन् ।

उक्त निर्णय नेपाली फिल्मको हितका लागि भए पनि अहिले निर्माताहरूले नै उक्त नियम तोडिरहेको अशोकको भनाइ छ ।

अशोक आजको दिनमा पनि 'चपली हाइट ३'लाई साथ सहयोग गरिरहेको बताउँछन् । 'फिल्मको पोस्टर तथा ट्रेलर मैले शेयर गरेको छु । मजस्तै अन्य धेरै फिल्मकर्मीहरूले प्रचार सामग्रीहरू शेयर गरिदिनुभएको छ । हामीले गर्न सक्ने यति नै त हो', अशोकले भने ।

हामी बोल्न चाहन्नौँ : मनोज राठी

'पुष्पा'को नेपाल रिलिज अनुमति खरिद गरेका वितरक मनोज राठी यस विषयमा खुलेर कुरा गर्न चाहँदैनन् । अर्जुन कुमारले लगाइरहेको आरोपमा पनि उनले जवाफ दिन अस्वीकार गरे ।

शिलापत्रसँग मनोजले यत्ति भने, 'नेपाली फिल्म पनि राम्रो छ भने चलिहाल्छ । हलमा पनि राम्रो शो पाइहाल्छ । यसमा गुनासो गर्नुपर्ने कुरै छैन । पहिलो कुरा, आफ्नो फिल्ममा दम राख्‍नुपर्‍यो ।'

प्रकाशित मिति: शुक्रबार, मंसिर १७, २०७८ ०८:१७