शालीन सिर्जनाको सानदार अभिनय यात्रा

A+ A A-

जब मेनस्ट्रिमका थुप्रै नायिकालाई उछिन्दै कलाकार सिर्जना सुब्बाले कामना फिल्मस् अवार्ड– २०७४ मा सर्वोत्कृष्ट नायिकाको ताज पहिरिइन्, तबको उनको चर्चा ह्वात्तै बढ्यो । प्रायः ‘ग्ल्यामरस मोडल’ले पाउँदै आएको उक्त अवार्ड ‘शालीन मोडल’ सुब्बाले पाएकामा कतिले खुसी व्यक्त गरे । कति ईष्र्याले जले ।

सरल स्वभाव, शालीन व्यक्तित्व र सानदार अभिनयका कारण सुब्बाको चर्चासँगै लोकप्रियता बढ्दो छ । ‘अवार्डको लोभले कलाकारितामा आएको होइन,’ उनी भन्छिन्, ‘राम्रो काम गर्दै गयो भने ढिलै भए पनि मूल्यांकनचाहिँ हुँदो रहेछ । खुसी छु ।’

अवार्डले आफूलाई थप जिम्मेवार बनाएको बताउने सुब्बाले आठवटा चलचित्रमा काम गरिसकेकी छन् । उनका समकक्षीले वर्षमै ७–८ वटा चलचित्रमा गर्छन् । तर पनि उनी कसैप्रति कुनै टिप्पणी गर्दिनन् ।

चलचित्रमा सिर्जनाको योगदान

चलचित्रको संख्या बढाउने भन्दा गुणस्तरमा बढी ध्यान दिन्छिन् उनी । रंगमञ्चबाट चलचित्रमा आएकी सुब्बा अहिले दुवै क्षेत्रमा व्यस्त छिन् । ‘नाटक सँगसँगै चलचित्रमा पनि काम गरिरहेकी छु,’ उनी भन्छिन्, ‘कला क्षेत्रलाई फराकिलो र व्यवस्थित बनाउन सक्रिय छु ।’

नाटकबाट अभिनय यात्रा सुरु गरेकी सिर्जनालाई रंगमञ्चको खुब माया लाग्छ । जहाँ काम गरे पनि राम्रो गर्ने चाहना भएको उनको भनाइ छ । ‘काम भएन भन्दैमा जस्तो पायो, त्यस्तै चलचित्रमा काम गर्दिनँ । समाजलाई सकारात्मक सन्देश दिने चलचित्र भयो भने मात्रै काम गर्न मजा आउँछ,’ उनले भनिन् ।

सिर्जनाले लुट २, आवाज, नतिजा, दीपशिखा, चक्कर, डाइङ क्यान्डल, मिस्टर भर्जिन, पञ्चेबाजालगायतका चलचित्रमा अभिनय गरेकी छन् ।

नाटकसँगै चलचित्र

अभिनेत्री बन्ने सपना थियो उनको । र, अभिनेत्री हुन लाज, डर सबै त्याग्नुपर्छ भन्ने बुझिसकेकी थिइन् । यसर्थ, आफूलाई पनि चलचित्र क्षेत्रमा स्थापित गर्न उनी लाज, डर त्याग्ने प्रयासमा लागिन् ।

तर, उनलाई नाटकबारे खासै थाहा थिएन । बिस्तारै बुझ्दै गइन् । नाटकमा प्रवेश गरिन् । ‘हिरोइन बन्ने सपना थियो, नाट्यकर्मी भइएछ,’ मुस्कुराउँदै उनले भनिन्, ‘अहिले त हिरोइन पनि भइयो ।’

सुब्बाले अहिलेसम्म ३० भन्दा बढी नाटकमा अभिनय गरिसकेकी छन् । उनले एउटा नाटक निर्देशनसमेत गरेकी छन् ।

कला क्षेत्रमा प्रवेश

स्कुल पढ्दा उनले कहिल्यै अभिनय गरिनन् । न कुनै गीतसंगीतमा भाग लिने अवसर नै पाइन् । तर, नायिका बन्ने हुटहुटीले उनलाई काठमाडौं ल्याइपुर्यो ।

प्लस टुपछि उनी काठमाडौं छिरिन्, २०६२ सालमा । सुरुमा गाउँकै काका पर्नेको एउटा कन्सलटेन्सीमा रिसेप्सनको जागिर खाइन् । काठमाडौं बस्ने बहाना मात्रै थियो, त्यो । रिप्सेसनको जागिर खाँदै उनी काठमाडौंको रंगीन दुनियाँबारे बुझ्दै गइन् ।

एक दिन गाउँले दिदीले ‘सुन्दरी प्रतियोगिता हुँदै छ एकपटक प्रतिस्पर्धा गर’ भनेर सुझाव दिइन् । सुझावअनुरुप उनी प्रतियोगितामा सहभागी भइन् । जहाँ उनी सेकेन्ड रनरअप भइन् । प्रतियोगितापछि धेरैको नोटिसमा परेकी उनलाई मैना नाटकमा अभिनय गर्न निर्देशक लोकेन्द्र लेखक प्रस्ताव गरे । नाटक खेलिन् ।

अभिनयपश्चात् काठमाडौंका ठूलाठूला पत्रिकामा समाचार बनेर छाइन्, उनी । त्यसपछि बद्री अधिकारीको निर्देशनमा बन्न लागेको चलचित्र ‘आवाज’का लागि नायिकाको प्रस्ताव आयो । प्रस्ताव स्विकारिन् । दमदार अभियन गरिन् ।

त्यसपछि आफ्नो अभिनयमा निखरता ल्याउन अनुप बरालको एक्टर्स स्टुडियोमा भर्ना भइन् । अभिनय सिक्दै चलचित्र र नाटकका काम गर्दै अघि बढिन् ।

त्यसपछि उनी विभिन्न सम्मानको भागीदार भइन् । इनास फिल्म अवार्डमा डाइङ क्यान्डलबाट उत्कृष्ट अभिनेत्रीको अवार्ड हात पारिन् ।

मण्डला नाटकघर उनकै नेतृत्वमा सञ्चालित छ । दयाहाङ राई, राजन खतिवडा, वुद्धि तामाङलगायतको टिमले मण्डला स्थापना गरेका हुन् । उक्त नाटकघरबाट उत्पादन भएका अधिकांश कलाकार सुपरस्टार भएका छन् ।

प्रकाशित मिति: मंगलबार, असार ३, २०७६ ०१:५२