देउवाकाे गृहप्रदेशमा सभापतिका पाँच दाबेदार, पाैडेल समूहले गरेन आँट

A+ A A-

सुदूरपश्चिम प्रदेशकाे कांग्रेस सभापति बन्न विद्यार्थी नेतादेखि पूर्वराजदूतसम्मले उम्मेदवारी घोषणा गरेका छन् । कैलालीका पार्टी सभापति नरनारायण शाह (मनु), बझाङका पूर्वराज्यमन्त्री तथा राजदूत अर्जुनजंगबहादुर सिंह, अछामका पूर्वराज्यमन्त्री गोविन्दबहादुर शाह, कैलालीका महाधिवेशन प्रतिनिधि हिमबहादुर रावल र डोटीका महाधिवेशन प्रतिनिधि पुष्पकुमार शाहीले प्रदेश सभापतिका लागि उम्मेदवारी घोषणा गरेका छन् ।

यी पाँचै जना संस्थापन समूहका हुन् । अधिवेशन सुरु हुनैलाग्दा संस्थापनइतरका कुनै पनि नेता सभापतिका आकांक्षी देखिएका छैनन् । सभापितबाहेक प्रदेश समितिका अन्य विभिन्न पदमा पनि उम्मेदवारी घोषणा गर्ने क्रम जारी छ ।

प्रदेशको महामन्त्रीका लागि कैलाली क्षेत्र नम्बर ४ का महाधिवेशन प्रतिनिधि उत्तम कठायत र अछाम क्षेत्र नम्बर २ का बलबहादुर कुँवरले उम्मेदवारी घोषणा गरेका छन् । यस्तै, कैलाली क्षेत्र नम्बर ३ बाट महाधिवेशन प्रतिनिधिमा निर्वाचित युवा नेता लक्ष्मण शाही र बाजुराबाट महाधिवेशन प्रनिनिधिमा निर्वाचित गुरुदेव केसीले प्रदेश सहमहामन्त्रीमा उम्मेदवारी घोषणा गरेका छन् ।

आज दिउँसो २ बजे धनगढीको ओम पार्टी प्यालेसमा प्रदेश अधिवेशन उद्घाटन हुने कार्यतालिका रहेको प्रदेश अधिवेशन प्रचारप्रसार समिति संयोजक नृपबहादुर सुनारले जानकारी दिए । उनका अनुसार आज प्रदेश अधिवेशन उद्घाटन हुने र शुक्रबार मनोनयन गरेर शनिबार मतदान हुने कार्यतालिका छ ।

अधिवेशनका लागि प्रदेशका ९ वटै जिल्लाका १६ संसदीय निर्वाचन क्षेत्र र ३२ प्रदेशसभा क्षेत्रबाट गरी ९७२ प्रतिनिधि धनगढी पुगिसकेका सुनारले बताए ।