एमालेका १९ पदाधिकारीमध्ये लुम्बिनीका मात्रै ७ जना, केन्द्रीय समितिमा पनि उल्लेख्य उपस्थिति

एमालेका १९ पदाधिकारीमध्ये लुम्बिनीका मात्रै ७ जना, केन्द्रीय समितिमा पनि उल्लेख्य उपस्थिति

A+ A A-

नेकपा (एमाले) को १०औँ महाधिवेशनबाट निर्वाचित १९ पदाधिकारीमध्ये लुम्बिनी प्रदेशका मात्रै ७ जना छन् । लुम्बिनीबाट उपाध्यक्ष, महासचिव, उपमहासचिव र सचिवमा गरी सात जना निर्वाचित भएका हुन् । यो पदाधिकारीको करिब ३७ प्रतिशत हो ।

महासचिवका दाबेदार रहेका रूपन्देहीका विष्णु पौडेल उपाध्यक्ष बनेका छन् । पौडेल रूपन्देही क्षेत्र नम्बर २ बाट निर्वाचित सांसद हुन् । त्यस्तै दाङका युवराज ज्ञवाली पनि उपाध्यक्षमा निर्वाचित भए ।

महत्वका साथ हेरिएको महासचिवमा शंकर पोखरेल निर्विरोध भए । लुम्बिनी प्रदेशको पूर्वमुख्यमन्त्री पोखरेल केपी ओलीका विश्वासपात्र समेत हुन् । पोखरेललाई ओलीले महासचिव बनाउने संकेत विधान महाधिवेशनमै गरेका थिए ।

लुम्बिनी प्रदेशबाटै प्रदीप ज्ञवाली उपमहासचिव बनेका छन् भने गोकर्ण विष्ट सचिव बनेका छन् । त्यस्तै रुपन्देहीका छविलाल विश्वकर्मा सचिवमा निर्वाचित भए । उनले पछिल्लो ४ वर्ष पार्टीमा उल्लेख्य जिम्मेवारी पाएका थिएनन् ।

त्यस्तै माओवादी पृष्ठभूमिका टोपबहादुर रायमाझी पनि सचिवमा निर्वाचित भए । उनी नेकपा विभाजित हुँदा माओ‌वादी केन्द्र छाडेर एमालेमा रहेका थिए ।

एमालेको केन्द्रीय लेखा आयोग र अनुशासन आयोगमा पनि लुम्बिनीको उल्लेख्य उपस्थिति छ । अनुशासन आयोगको उपाध्यक्षमा रूपन्देहीका नेत्र पन्थी निर्वाचित हुँदा लेखा आयोगको उपाध्यक्षमा कपिलवस्तुका विष्णु पन्थीले बाजी मारेका छन् ।

एमाले पदाधिकारीमा लुम्बिनी प्रदेशले उल्लेख्य उपस्थिति जनाए पनि सोही प्रदेशका घनश्याम भुसाल उपाध्यक्षमा पराजित भए । एमालेको अघिल्लो महाधिवेशनबाट भुसाल उपमहासचिवमा निर्वाचित भएका थिए ।

त्यस्तै केन्द्रीय सदस्यमा लुम्बिनीबाट ४ दर्जनभन्दा बढी नेता समेटिएका छन् ।

प्रकाशित मिति: मंगलबार, मंसिर १४, २०७८ २०:५१