कृषि सामग्री कम्पनीले उठायाे हात, रसायनिक मलकाे थप हाहाकार हुने निश्चित

A+ A A-

सरकारले रसायनिक मल खरिद बिक्रीको जिम्मा दिएको कृषि सामग्री कम्पनीले यसवर्ष पनि पर्याप्त मात्रामा रसायनिक मल खरिद गर्न नसक्ने बताएको छ । चालु आर्थिक वर्षमा भारत, चीन र अन्य देशबाट करिब २ लाख मेट्रिक टन मात्रै रसायनिक मल खरिद गर्न सक्ने कम्पनीले जानकारी दिएको हो ।

सरकारले चालु आर्थिक वर्षमा मल खरिदका लागि जम्मा १५ अर्ब अनुदान रकम विनियोजन गरेको छ । विश्व बजारमा रसायनिक मलको मूल्य हरेक साता वृद्धि भइरहेको छ । जसका कारण अनुदान रकमले करिब २ लाख मेट्रिक टन मात्रै मल खरिद गर्न सकिने कम्पनीले जनाएको छ ।

अन्तर्राष्ट्रिय बजारमै रसायनिक मलको मूल्यमा वृद्धि भइरहेका कारण नेपालकाे कृषिका लागि आवश्यक मल ल्याउन नसकिने देखिएकाे कम्पनीका प्रबन्ध सञ्चालक नेत्रबहादुर भण्डारीले बताए ।

अन्तर्राष्ट्रिय बजारमा गत वर्षको तुलनामा प्रतिमेट्रिक टन ३ सय अमेरिकी डलरभन्दा बढीले रसायनिक मलको मूल्यमा वृद्धि भएको छ । जसका कारण सरकारले विनियाेजन गरेकाे रकमले करिब २ लाख मेट्रिक टन मात्रै मल खरिद गर्न सकिने भण्डारीले बताए ।

‘प्रतिमेट्रिक टन ६ सय ७० डलरमा मल खरिदको ठेक्का हुँदै आएको थियो । यो वर्ष रकम बढेर ९ सय ४८ डलर पुग्ने सम्भावना छ', उनले भने, ‘२० पटकसम्म बोलपत्र आह्वान गर्नुपर्ने बाध्यता भइरहेको छ । पछिल्ला सबै ठेक्का रद्द भइरहेका छन् ।’

घाटा हुने भएपछि मल ल्याउन कुनै पनि कम्पनीले चासो नदिएकाे उनको भनाइ छ । नेपालमा रसायनिक मलको उत्पादन हुँदैन । किसानहरूले हरेक वर्ष मल अभावकाे समस्या भाेगिरहेका छन् । कृषि सामाग्री कम्पनीका अनुसार नेपालमा बर्षेनि ८ लाख मेट्रिक टन मलको माग हुन्छ । तर, सरकारले जसोतसो ५ लाख मेट्रिक टन मात्रै आयात गर्न सकिरहेकाे थियाे ।

भण्डारीले यो वर्ष पनि विगतका वर्षभन्दा अझ धेरै मलकाे हाहाकार हुने संकेत गरे । कोभिडका कारण रसायनिक मल उत्पादन गर्ने कम्पनी बन्द भएर उत्पादन कम हुँदा विश्व बजारमा मल अभाव देखिएको बताइएकाे छ ।

प्रकाशित मिति: बुधबार, मंसिर १५, २०७८ ०९:५३