भारतविरुद्ध भारतकै ज्वाइँ !

A+ A A-

भारत र पाकिस्तानबीचको एक दिवसीय क्रिकेट विश्वकपमा एक पक्षीय नतिजा छ । भारतले पाकिस्तानविरुद्धका सबै ७ भेटमा जित हासिल गरेको छ । आइतबारको खेलमा भारतले पाकिस्तानलाई ८९ रनले पराजित गर्यो ।

विश्वकपमा फेरि एक पटक भारतसँग पराजित भएपछि पाकिस्तानी क्रिकेटरको स्वदेशमा चर्को आलोचना भइरहेको छ । तर सबैभन्दा बढी शोएब मलिकको आलोचना भएको छ । उनी भारतकी टेनिस स्टार सानिया मिर्जाका पति अर्थात भारतका ज्वाई हुन् ।

भारत र पाकिस्तानबीच राजनीतिक स्तरमा रहेको तनाव खेल मैदानमा समेत देखिने गर्छ । त्यसैले खेल मैदानमा आफ्ना खेलाडीले राम्रो नखेल्दा स्वभाविक आक्रोश देखिने गरेको छ ।

पाकिस्तानी ट्विटर प्रयोगकर्ताले शोएब मल्लिकलाई लिएर विभिन्न ट्विट गरेका छन् । कतिपयले उनलाई भारतीय भएको बताइरहेका छन् भने कतिपयले शोएब मलिक २०० रनले दोहोरो शतक बनाउन चुकेको भन्दै मजाक उडाएका छन् ।

ट्विटरमा एक भिडियो शेयर गरिएको छ, जसमा सानिया मिर्जा पनि सँगै रहेकी छन् र एक जना धुमपान गरिरहेका छन् । आक्रोशित पाकिस्तानी प्रशंसकले भारतसँगको खेलका लागि कडा मेहनत गर्दै शोएब मलिक भन्दै आक्रोश पोखेका छन् ।

आइतबारको खेलमा पाकिस्तानका पूर्व कप्तान मलिकलाई हार्दिक पान्ड्याले शून्य रनमा बोल्ड गरिदिएका थिए । यसअघिका दुई खेलमा पनि उनी यसरी नै आउट भएका थिए । उनको यो करियरकै अन्तिम खेल भएको समेत बताएका छन् ।

आईसीसी विश्वकपमा शोएबले तीन खेल खेलेका छन् । जसमा इंग्ल्यान्डविरुद्ध ८ रन बनाएका थिए भने अस्ट्रेलिया र भारतविरुद्ध शून्य रनमै आउट भएका छन् ।

उनले विश्वकपपछि वान डे क्रिकेटबाट सन्यास लिने बताइसकेका छन् । पछिल्ला ३० खेलमा शोएब मलिकले तीन खेलमा मात्रै अर्धशतक बनाएका छन् ।

सन् २०१८ देखिका खेलमा उनले २५.३३ को औसतमा जम्मा ६ सय ८ रन बनाएका छन् । आफ्नो अन्तिम विश्वकपमा उनी टिमका लागि बोझ बनेको पाकिस्तानी खेल पत्रकारले टिप्पणी गरेका छन् । आगामी खेलहरुमा उनको स्थानमा आसिफ अलीले स्थान पाउने सम्भावना छ ।

शोएबले कुल २८७ वान डेमा उनले ७ हजार ५३४ रन बनाएका छन् । अलराउन्डर भएका कारण पनि उनले टिममा स्थान पाउँदै आएका छन् ।
उनी यस्ता दुई खेलाडी मध्ये एक हुन्, जो सन् १९९० को दशकबाट क्रिकेट खेलिरहेका छन् । अर्का वेस्ट इन्डिजका क्रिस गेल हुन् ।

प्रकाशित मिति: सोमबार, असार २, २०७६ २३:५४